Uttam Kumar Reddy: తెలంగాణ నీటి హక్కుల విషయంలో రాజీపడే ప్రసక్తే లేదని, ఆంధ్రప్రదేశ్ ప్రతిపాదించిన పోలవరం-బనకచర్ల లేదా నల్లమల సాగర్ ప్రాజెక్టుకు ఎటువంటి అనుమతులు లేవని రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి స్పష్టం చేశారు. ఈ ప్రాజెక్టుకు సంబంధించి అటు కేంద్ర జలశక్తి మంత్రి సి.ఆర్. పాటిల్, ఇటు సెంట్రల్ వాటర్ కమిషన్ (CWC) చైర్మన్ కూడా తమకు రాతపూర్వక వివరణ ఇచ్చారని ఆయన వెల్లడించారు. డీపీఆర్ (DPR) కాదు కదా, కనీసం ప్రీ-ఫీజబిలిటీ రిపోర్ట్కు కూడా అనుమతి ఇవ్వలేదని కేంద్రం స్పష్టంగా చెప్పిందని ఆయన పేర్కొన్నారు. కేవలం రాజకీయ ఉద్దేశాలతోనే బీఆర్ఎస్ నేతలు అవాస్తవాలను ప్రచారం చేస్తూ ప్రజలను భయపెడుతున్నారని ఆయన మండిపడ్డారు.
ఢిల్లీలో జరిగిన తాజా సమావేశంలో తెలంగాణ ప్రతినిధులు తమ వాదనను బలంగా వినిపించారని మంత్రి తెలిపారు. నల్లమల సాగర్ ప్రాజెక్టును ఎజెండాలో చేర్చడానికి తెలంగాణ ప్రభుత్వం ఏమాత్రం ఒప్పుకోలేదని, కేవలం అంతర్రాష్ట్ర జల వివాదాలపై చర్చించడానికి మాత్రమే మొగ్గు చూపామని వివరించారు. ఈ రోజు సమావేశంలో కూడా సి.డబ్ల్యూ.సి చైర్మన్ ఈ ప్రాజెక్టుకు ఎటువంటి అనుమతులు లేవని ఇరు రాష్ట్రాల అధికారుల సమక్షంలో స్పష్టం చేశారని గుర్తు చేశారు. రాష్ట్ర ప్రయోజనాల కోసం ప్రతి చుక్క నీటిని కాపాడుకోవడానికి చర్చలకు సిద్ధమే కానీ, ఒక్క చుక్క నీటిని కూడా వదులుకోబోమని ఉత్తమ్ కుమార్ రెడ్డి పునరుద్ఘాటించారు.
బీఆర్ఎస్ పదేళ్ల పాలనలో ఇరిగేషన్ రంగాన్ని సర్వనాశనం చేశారని మంత్రి విమర్శించారు. రూ. 1.8 లక్షల కోట్లు ఖర్చు చేసినా, పాలమూరు-రంగారెడ్డి, సీతారామ వంటి ప్రాజెక్టుల ద్వారా కనీసం ఒక్క ఎకరాకు కూడా కొత్తగా నీరు ఇవ్వలేదని ఆరోపించారు. కాళేశ్వరం ప్రాజెక్టు పేరుతో భారీగా అప్పులు చేసి, చివరకు మేడిగడ్డ బ్యారేజీ కూలిపోయే పరిస్థితికి తెచ్చారని ధ్వజమెత్తారు. కల్వకుర్తి, నెట్టెంపాడు, ఎస్ఎల్బీసీ టన్నెల్ వంటి పెండింగ్ ప్రాజెక్టులను పూర్తి చేయకుండా కేవలం దోపిడీ వ్యవస్థగా మార్చారని విమర్శించారు. పార్లమెంటులో ఆర్థిక సర్వే గణాంకాలను ప్రస్తావిస్తూ, కాళేశ్వరం ద్వారా లక్ష ఎకరాల ఆయకట్టు కూడా కొత్తగా రాలేదని ఆయన వాదించారు.
కాంగ్రెస్ ప్రభుత్వం వచ్చిన ఈ రెండు ఏళ్లలోనే కృష్ణా, గోదావరి బేసిన్లలో గత పదేళ్ల కంటే ఎక్కువ ఆయకట్టుకు నీళ్లు ఇచ్చామని, రికార్డు స్థాయిలో వరి సాగు జరిగిందని మంత్రి గారు పేర్కొన్నారు. తెలంగాణను భారతదేశంలోనే నంబర్ వన్ రైస్ ప్రొడ్యూసింగ్ స్టేట్గా నిలిపింది తమ ప్రభుత్వమేనని స్పష్టం చేశారు. ఇరిగేషన్ శాఖలో గత పదేళ్లుగా నిలిచిపోయిన పదోన్నతులు, బదిలీలు, మరియు నియామకాలను పూర్తి చేసి శాఖను ప్రక్షాళన చేశామన్నారు. ఆదిత్యా నాథ్ దాస్ వంటి సమర్థవంతమైన అధికారుల సలహాలతో తెలంగాణ నీటి హక్కులను కాపాడటానికి తాము చిత్తశుద్ధితో పనిచేస్తున్నామని, బీఆర్ఎస్ నేతలు చేసే అబద్ధపు ప్రచారాలను ప్రజలు నమ్మవద్దని కోరారు.
Read Also: సమ్మక్క ఆశీస్సులతో రేవంత్ రెడ్డి సీఎం అయ్యారు.. మంత్రి సీతక్క కీలక వ్యాఖ్యలు
Share
Prabhas: నీ గొంతు నా మనసును తాకింది.. హీరోయిన్ పై ప్రభాస్ ప్రశంసలు..
Kavitha: తెలంగాణ వచ్చి 12 ఏళ్లు అయినా.. అదే పరిస్థితి ఏం మారింది..? మేడారంలో కవిత సంచలన వ్యాఖ్యలు
