ములుగు జిల్లాలోని మేడారం సమ్మక్క-సారలమ్మ మహాజాతర అత్యంత అంగరంగ వైభవంగా సాగుతోందని రాష్ట్ర పంచాయతీరాజ్, గ్రామీణాభివృద్ధి శాఖ మంత్రి సీతక్క పేర్కొన్నారు. జాతరలో భాగంగా అమ్మవార్లను దర్శించుకున్న అనంతరం ఆమె మీడియాతో మాట్లాడారు. చిన్న చిన్న సంఘటనలు మినహాయిస్తే, భక్తులకు ఎలాంటి ఇబ్బందులు కలగకుండా జాతర బ్రహ్మాండంగా కొనసాగుతోందని ఆమె సంతోషం వ్యక్తం చేశారు.
సమ్మక్క-సారలమ్మలు ఎంతో మహిమగల తల్లులని, మనస్ఫూర్తిగా ఏది కోరుకున్నా వారు నెరవేరుస్తారని సీతక్క విశ్వాసం వ్యక్తం చేశారు. ‘సమ్మక్క తల్లి ఆశీస్సులతోనే రాష్ట్రంలో కాంగ్రెస్ ప్రభుత్వం ఏర్పడింది, రేవంత్ రెడ్డి ముఖ్యమంత్రి అయ్యారు. నేను మంత్రిని అయ్యాను’ అని ఆమె పేర్కొన్నారు. రాబోయే రోజుల్లో తమ ప్రభుత్వానికి మరింత సంకల్ప బలాన్ని ప్రసాదించాలని, సకల జనుల దేవతలు తమ ప్రభుత్వానికి ఎల్లప్పుడూ అండగా ఉండాలని ఆమె ప్రార్థించారు.
మేడారం పవిత్రతను కాపాడుతూనే, భక్తుల సౌకర్యార్థం మరిన్ని శాశ్వత అభివృద్ధి పనులు చేపట్టనున్నట్లు మంత్రి ప్రకటించారు. ‘మేడారంలో మౌలిక సదుపాయాల కల్పనకు త్వరలోనే శ్రీకారం చుడతాం. భక్తులు ప్రతి ఏటా పెరిగే అవకాశం ఉన్నందున, శాశ్వత ప్రాతిపదికన నిర్మాణాలు చేపట్టి ఈ ప్రాంతాన్ని మరింత అభివృద్ధి చేస్తాం’ అని హామీ ఇచ్చారు. గిరిజన సంస్కృతికి ప్రతీకగా నిలిచే ఈ జాతరను అంతర్జాతీయ స్థాయిలో మరింత గుర్తింపు పొందేలా కృషి చేస్తామన్నారు.
తన రాజకీయ గురువు, కాంగ్రెస్ అగ్రనేత రాహుల్ గాంధీ కోసం కూడా సమ్మక్క తల్లిని ప్రత్యేకంగా వేడుకున్నట్లు సీతక్క తెలిపారు. దేశ ప్రజల సంక్షేమం కోసం రాహుల్ గాంధీ పడుతున్న తపనను అమ్మవార్లు ఆశీర్వదించాలని కోరుకున్నట్లు చెప్పారు. ‘రాహుల్ గాంధీ కుటుంబం అధికారంలో ఉంటేనే పేద ప్రజలకు, సామాన్యులకు మేలు జరుగుతుంది. దేశ భవిష్యత్తు వారి నాయకత్వంతోనే ముడిపడి ఉంది’ అని ఆమె అభిప్రాయపడ్డారు.
మేడారానికి తరలివస్తున్న లక్షలాది మంది భక్తులకు తాగునీరు, పారిశుధ్యం, రవాణా విషయంలో ఎలాంటి లోటుపాట్లు రాకుండా అధికారులు నిరంతరం పర్యవేక్షిస్తున్నారని, భక్తులు కూడా క్రమశిక్షణతో దర్శనాలు చేసుకోవాలని సీతక్క సూచించారు.
Share
Nara Lokesh: 2019 తప్పు మళ్ళీ జరగకూడదు.. ప్రభుత్వ కార్యక్రమాలను ఇంటింటికీ తీసుకెళ్లాలని పార్టీ శ్రేణులకు లోకేష్ ఆదేశం!
The kerala Story 2: ది కేరళ స్టోరీ 2 టీజర్ రిలీజ్..ఆదా శర్మ తప్పుకున్నట్టేనా?
