Minister Thummala: నిధులు ప్రజలవి.. మీ జాగీరు కాదు, హరీష్ రావుకు మంత్రి తుమ్మల కౌంటర్

సిద్దిపేట జిల్లా నంగునూర్ మండలం నర్మెట ఆయిల్ పామ్ ఫ్యాక్టరీ వేదికగా రాజకీయ వాతావరణం వేడెక్కింది. ముఖ్యమంత్రి సభ ఏర్పాట్లను పరిశీలించిన మంత్రులు తుమ్మల నాగేశ్వరరావు, పొన్నం ప్రభాకర్ అనంతరం నిర్వహించిన మీడియా సమావేశంలో మాజీ మంత్రి హరీశ్ రావుపై నిప్పులు చెరిగారు. అభివృద్ధి పనుల క్రెడిట్ విషయంలో జరుగుతున్న వివాదంపై మంత్రి తుమ్మల ఘాటుగా స్పందించారు.

ప్రభుత్వ నిధులు ప్రజల సొత్తని.. మాట్లాడేటప్పుడు పద్ధతి ఉండాలని మంత్రి తుమ్మల హితవు పలికారు. కాళేశ్వరం ప్రాజెక్టుకు ఎల్లంపల్లి కీలకమని, ఆ ప్రాజెక్టును వైఎస్ రాజశేఖర్ రెడ్డి హయాంలో కాంగ్రెస్ పూర్తి చేసిందని గుర్తు చేశారు. తాము స్విచ్ వేస్తేనే నీళ్లు వచ్చాయని చెప్పుకోవడం హాస్యాస్పదమని పేర్కొన్నారు. ఏ పథకమైనా పాలకులు ఎవరైతే వారి ఖాతాలోకి వెళ్తుందని, ఇది కేవలం ప్రజల విజయమని స్పష్టం చేశారు. నర్మెట ఫ్యాక్టరీ నిర్మాణం విషయంలో తాను లేకపోయినా పనులు ఆగేవి కావని చెప్పారు. ప్రతిపక్ష ఎమ్మెల్యే నియోజకవర్గం అని వివక్ష చూపకుండా, సిద్దిపేట భౌగోళిక ప్రాధాన్యతను గుర్తించి మొదటి ప్రాధాన్యతగా ఇక్కడే ఫ్యాక్టరీ మంజూరు చేశానని వివరించారు. నేతలు తమ స్థాయిని తగ్గించుకుని చిల్లర మాటలు మాట్లాడకూడదని హెచ్చరించారు.

గత బీఆర్ఎస్ ప్రభుత్వం నాలుగు విడతలుగా రుణమాఫీ చేయడం వల్ల రైతులపై 8530 కోట్ల వడ్డీ భారం పడిందని తుమ్మల విమర్శించారు. నాలుగేళ్ల జాప్యం వల్ల రైతులు తీవ్రంగా నష్టపోయారని గుర్తు చేశారు. రాష్ట్రంలోని 42 బ్యాంకుల నుంచి సమాచారం సేకరించి రూ.2 లక్షల లోపు రుణాలున్న 25 లక్షల మంది రైతులకు ఒకే విడతలో రుణమాఫీ చేసిన ఘనత రేవంత్ రెడ్డి ప్రభుత్వానికే దక్కుతుందని కొనియాడారు. ప్రతి రైతు వివరాలను పారదర్శకత కోసం గ్రామ పంచాయతీలకు పంపించామని తెలిపారు. ప్రతిపక్షాలు కేవలం రైతులను రెచ్చగొట్టడమే లక్ష్యంగా అబద్ధాలు ఆడుతున్నాయని మండిపడ్డారు.

గత పాలనలో అరాచకాలు, అవినీతి పెరగడం వల్లే ప్రజలు బుద్ధి చెప్పారని మంత్రి విమర్శించారు. దళితులకు మూడెకరాల భూమి, దళిత బంధు, నిరుద్యోగ భృతి వంటి హామీలు ఏమయ్యాయని ప్రశ్నించారు. తొమ్మిది రోజుల్లో $9,000$ కోట్లు రైతుల ఖాతాల్లో వేసిన ఏకైక ప్రభుత్వం తమదేనని గర్వంగా చెప్పారు. ప్రస్తుతం ప్రభుత్వం చేస్తున్న అప్పులు గత ప్రభుత్వం చేసిన పాపాల వడ్డీలు కట్టడానికే సరిపోతున్నాయని ఆవేదన వ్యక్తం చేశారు. గతంలోని మంచి పథకాలను కొనసాగిస్తూనే కొత్త పథకాలను అమలు చేస్తున్నామని వివరించారు.

కాళేశ్వరం ప్రాజెక్టును అవినీతి కోసం అడ్డదిడ్డంగా నిర్మించారని మంత్రి దుయ్యబట్టారు. బ్యారేజీలు అంటే కేవలం 1, 2 టీఎంసీల సామర్థ్యం ఉండాలని, గత పాలకుల నిర్వాకం వల్ల తాము నిద్రలేని రాత్రులు గడుపుతున్నామని పేర్కొన్నారు. ప్రాజెక్టు కింద బాంబులు పెట్టి కూల్చుతున్నారన్న విమర్శలు మతిలేనివని కొట్టిపారేశారు. రాష్ట్ర అభివృద్ధి కోసం భగవంతుడు ఇచ్చిన శక్తి మేరకు పని చేస్తామని చెప్పారు. రేపు రైతు భరోసా కింద రూ.3600 కోట్లు విడుదల చేస్తామని కీలక ప్రకటన చేశారు.

ALSO READ: KTR: ఓట్ల కోసం కోటి మోసాలు.. 840 రోజులైనా ఒక్క గ్యారెంటీ కూడా..? కేటీఆర్ సంచలన విమర్శలు