కేరళలో ప్రధాని మోదీని ఓడించాం.. ఇక జోరు తగ్గేదేలే, ఢిల్లీలో సీఎం రేవంత్ కీలక వ్యాఖ్యలు

తెలంగాణ ముఖ్యమంత్రి రేవంత్ రెడ్డి హస్తిన పర్యటన రాజకీయంగా రాష్ట్ర అభివృద్ధి పరంగా ప్రాధాన్యత సంతరించుకుంది. హైదరాబాద్ నగరాన్ని అంతర్జాతీయ స్థాయి హంగులతో తీర్చిదిద్దడమే ధ్యేయంగా ఆయన ఈ పర్యటనను కొనసాగిస్తున్నారు. ముఖ్యంగా పెండింగ్‌లో ఉన్న మెట్రో ఫేజ్-2 ప్రాజెక్టుకు మోక్షం కలిగించే దిశగా ఆయన అడుగులు వేస్తున్నారు. కేంద్ర పట్టణాభివృద్ధి శాఖ మంత్రి మనోహర్ లాల్ ఖట్టర్‌తో భేటీ అయి మెట్రో విస్తరణ పనులకు అవసరమైన అనుమతులు త్వరితగతిన మంజూరు చేయాలని కోరనున్నారు.

నగరంలో పెరుగుతున్న జనాభా అవసరాలకు అనుగుణంగా రవాణా వ్యవస్థను బలోపేతం చేయడం అత్యవసరమని ముఖ్యమంత్రి భావిస్తున్నారు. ప్రస్తుతం మెట్రో ఫేజ్-2 ప్రతిపాదనలు కేంద్ర ప్రభుత్వం వద్ద పరిశీలనలో ఉన్నాయి. వీటిని త్వరగా ఆమోదింపజేసి పనులు ప్రారంభించాలని రాష్ట్ర ప్రభుత్వం పట్టుదలతో ఉంది. శంషాబాద్ ఎయిర్‌పోర్టు కనెక్టివిటీతో పాటు పాతబస్తీ మార్గంలో మెట్రో విస్తరణపై సీఎం రేవంత్ రెడ్డి కేంద్రమంత్రికి వివరించనున్నారు. కేంద్ర ప్రభుత్వం నుంచి వచ్చే నిధులు సకాలంలో అందితే ప్రాజెక్ట్ వేగంగా పూర్తవుతుందనేది ఆయన విశ్వాసం.

మరోవైపు ఈ పర్యటనలో ఆయన రాజకీయ అంశాలపై కూడా కీలక వ్యాఖ్యలు చేశారు. కేరళ ఎన్నికల ఫలితాలు కాంగ్రెస్ శ్రేణుల్లో కొత్త ఉత్సాహాన్ని నింపాయని రేవంత్ రెడ్డి పేర్కొన్నారు. అక్కడ బీజేపీ అగ్రనేతలు నరేంద్ర మోదీ, అమిత్ షా ద్వయాన్ని కాంగ్రెస్ నేతలు రాహుల్ గాంధీ, ప్రియాంక గాంధీ, మల్లికార్జున్ ఖర్గే సమర్థవంతంగా ఢీకొట్టి ఓడించారని కొనియాడారు. కేరళ విజయం కాంగ్రెస్ పార్టీ నైతిక బలాన్ని పెంచిందని ఆయన అభిప్రాయపడ్డారు. దేశవ్యాప్తంగా కాంగ్రెస్ పునరుజ్జీవం పొందుతోందని కేరళ తీర్పు అందుకు నిదర్శనమని చెప్పారు.

హైదరాబాద్ నగరాన్ని విశ్వనగరంగా మార్చే ప్రక్రియలో మెట్రో రైలు విస్తరణ వెన్నెముక వంటిదని ముఖ్యమంత్రి స్పష్టం చేశారు. కేవలం రవాణా సౌకర్యం మాత్రమే కాకుండా ఉపాధి అవకాశాల కల్పన రియల్ ఎస్టేట్ వృద్ధికి ఇది దోహదపడుతుందని వివరించారు. కేంద్రం సానుకూలంగా స్పందిస్తుందనే ఆశాభావంతో ఆయన ఉన్నారు. ఢిల్లీ పర్యటనలో ఇతర కేంద్ర మంత్రులను కూడా కలిసి రాష్ట్రానికి రావలసిన నిధులు ఇతర అభివృద్ధి పథకాల గురించి చర్చించే అవకాశం ఉంది. రాష్ట్ర ప్రయోజనాలే పరమావధిగా సీఎం తన పర్యటనను పక్కా ప్రణాళికతో కొనసాగిస్తున్నారు.

ALSO READ: దేవాదాయ శాఖ చరిత్రలోనే ఇదో కీలక అడుగు.. ఇక ఆ సమస్యకు చెక్..!