రాష్ట్రంలో భారీ వర్షం.. రాబోయే రెండు రోజులు జాగ్రత్త, ఈ జిల్లాల్లో కుండపోత వానలు

తెలంగాణ రాష్ట్రాన్ని భానుడి భగభగలు వణికిస్తున్నాయి. ప్రస్తుతానికి దాదాపు అన్ని జిల్లాల్లో ఉష్ణోగ్రతలు 40 డిగ్రీల మార్కును దాటేశాయి. రాబోయే 15 రోజుల్లో ఎండల తీవ్రత గరిష్ట స్థాయికి చేరుకుంటుందని వాతావరణ శాఖ హెచ్చరించింది. రాష్ట్రంలోని పలు ప్రాంతాల్లో 45 నుంచి 48 డిగ్రీల వరకు ఉష్ణోగ్రతలు నమోదయ్యే అవకాశం ఉంది. ముఖ్యంగా మే 16 నుంచి 20వ తేదీ మధ్య ఉత్తర తూర్పు తెలంగాణ జిల్లాల్లో వేడి గాలులు విపరీతంగా వీస్తాయని నిపుణులు అంచనా వేస్తున్నారు. ఎండ తీవ్రతతో ప్రజలు అల్లాడిపోతుంటే భారీ వడగాలులు ఆరోగ్య సమస్యలకు దారితీసే ప్రమాదం ఉందని వైద్యులు సూచిస్తున్నారు.

ఎండలు దంచికొడుతున్నా మరోవైపు అకాల వర్షాలు రాష్ట్రాన్ని పలకరిస్తున్నాయి. వెదర్ మ్యాన్ బాలాజీ అంచనా ప్రకారం వికారాబాద్, నారాయణపేట్, మహబూబ్ నగర్ జిల్లాల్లో వర్షాలు కురిసే అవకాశం ఉంది. అలాగే భద్రాద్రి కొత్తగూడెం, ఖమ్మం జిల్లాల్లో కూడా వానలు పడే ఛాన్స్ ఉందని ఆయన పేర్కొన్నారు. మిగిలిన జిల్లాల్లో పొడి వాతావరణం కొనసాగుతుందని స్పష్టం చేశారు. వర్షం కురిసిన సమయంలో వాతావరణం కాస్త చల్లబడుతున్నా ఆ తర్వాత పెరిగే ఉక్కపోత జనాన్ని ఉక్కిరిబిక్కిరి చేస్తోంది. ఎండ వర్షం కలగలిసిన ఈ వింత వాతావరణం వల్ల సామాన్యులు తీవ్ర ఇబ్బందులు పడుతున్నారు.

అకాల వర్షాల వల్ల రైతన్నల పరిస్థితి దారుణంగా మారింది. కల్లాల్లో ఆరబోసిన వరి ధాన్యం తడిచి ముద్దవుతుండటంతో రైతులు ఆవేదన వ్యక్తం చేస్తున్నారు. గాలి దుమారాలతో కూడిన వర్షం వల్ల ఇతర పంటలు కూడా దెబ్బతింటున్నాయి. కొనుగోలు కేంద్రాల్లో ధాన్యం తరలింపు ఆలస్యం కావడం వల్ల అన్నదాతలకు కంటిమీద కునుకు లేకుండా పోయింది. భారీ ఈదురు గాలుల కారణంగా తోటల్లో పండ్ల రాలడం వంటి నష్టాలు సంభవిస్తున్నాయి. పంటను కాపాడుకోవడానికి రైతులు పడుతున్న పాట్లు వర్ణనాతీతం.

రాబోయే రెండు రోజులు జాగ్రత్త..!

హైదరాబాద్ వాతావరణ కేంద్రం తెలిపిన వివరాల ప్రకారం రాబోయే రెండు రోజులు రాష్ట్రంలో వర్ష సూచన ఉంది. భూపాలపల్లి, ములుగు, కొత్తగూడెం, ఖమ్మం, నాగర్ కర్నూల్ జిల్లాల్లో ఉరుములు మెరుపులతో కూడిన వానలు పడవచ్చు. గంటకు 30 నుంచి 40 కిలోమీటర్ల వేగంతో వీచే ఈదురు గాలులు జనజీవనాన్ని అస్తవ్యస్తం చేసే అవకాశం ఉంది. అదే సమయంలో ఎండల తీవ్రత కూడా ఏమాత్రం తగ్గబోదని అధికారులు హెచ్చరిస్తున్నారు. పగటిపూట గరిష్ట ఉష్ణోగ్రతలు పెరగడం వల్ల ప్రజలు అత్యవసరమైతే తప్ప బయటకు రావద్దని సూచిస్తున్నారు.

వేసవి తీవ్రత పెరుగుతున్న నేపథ్యంలో ప్రజలు తగిన జాగ్రత్తలు తీసుకోవాలని ప్రభుత్వం కోరుతోంది. ముఖ్యంగా వృద్ధులు చిన్నారులు ఎండ పట్ల అప్రమత్తంగా ఉండాలి. ఒకవైపు వడగాల్పులు మరోవైపు ఉరుములతో కూడిన వర్షాలు ప్రజలను అయోమయంలో పడేస్తున్నాయి. రాబోయే రెండు వారాలు వాతావరణంలో భారీ మార్పులు ఉంటాయని అంచనాలు చెబుతున్నాయి. ప్రకృతి వైపరీత్యాల వల్ల పంట నష్టపోకుండా రైతులు తగిన రక్షణ చర్యలు చేపట్టాలని అధికారులు కోరుతున్నారు.

ALSO READ: తప్పు చేస్తే వదిలే ప్రసక్తే లేదు.. బండి భగీరథ్ కేసుపై.. సీఎం రేవంత్ సంచలనం