Rain Updates : భారీ వర్షం.. తెలంగాణ ఆగమాగం..

Rain Updates : వరుసగా కురుస్తున్న వర్షాలతో తెలంగాణ జిల్లాల్లో వాగులు వంకలు పొంగి పొర్లుతున్నాయి. రోడ్లపై నీరు నిలిచిపోయి.. వాహనాల రాకపోకలకు ఇబ్బంది ఏర్పడుతోంది. వికారాబాద్ జిల్లా దారూర్ మండలం నాగసముందర్ దగ్గర రోడ్ పై ప్రమాదకరంగా వాగు ప్రవహిస్తోంది. దీంతో వికారాబాద్ రాకపోకలు బంద్ అయ్యాయి. మరోవైపు కోటపల్లి రిజర్వాయర్ నిండి అలుగు పారుతోంది.

కొమురం భీమ్ ఆసిఫాబాద్ జిల్లా సిర్పూర్‌లో ఎడతెరిపి లేకుండా కురుస్తున్న భారీ వర్షాలకు పెన్ గంగ నది ఉధృతంగా ప్రవహిస్తోంది. బ్యాక్ వాటర్ రావడంతో పారిగాం మీదుగా వెళ్లే కౌటాల మండలం గ్రామాలకు రాకపోకలు స్తంభించిపోయాయి. వెంకట్రావు -పోడ్సా అంతర్రాష్ట్ర వంతెన వరదనీటిలో మునిగిపోయింది. సిర్పూర్ మండలంలోని అంతర్రాష్ట్ర రహదారులను రెవెన్యూ అధికారులు పోలీసులు పరిశీలించారు. ఈ రహదారుల్లో ఎలాంటి ప్రయాణాలు సాగించకుండా చూడాలని సిబ్బందిని ఆదేశించారు.

నిజామాబాద్ జిల్లా వ్యాప్తంగా కూడా భారీ వర్షాలు కురుస్తున్నాయి. బాల్కొండ, భీంగల్, వేల్పూర్, కమర్పల్లి, మోర్తాడ్ మండలాల్లో దాదాపు 3 సెంటీమీటర్ల వర్షపాతం నమోదైంది. భారీ వర్షాలకు వేల్పూర్ చెరువుకు గండి పడింది. రాళ్ళ వాగు, కప్పల వాగు, పులాంగ్ వాగు, పెద్ద వాగు, కేశపూర్ వాగులు పొంగి పొర్లుతున్నాయి. భీంగల్ లో ఇళ్లలోకి వరద నీరు చేరింది. అటు మాణిక్ బందర్ వద్ద వాగు కట్ట తెగిపోయింది.

భద్రాద్రి కొత్తగూడెం జిల్లా మణుగూరు సింగరేణి డివిజన్ వ్యాప్తంగా భారీ వర్షాలు కురుస్తున్నాయి. ఈ కారణంగా బొగ్గు ఉత్పత్తి నిలిచిపోయింది. గత వారం రోజులుగా కురుస్తున్న వర్షాలకు సింగరేణి సంస్థకు భారీగా నష్టం వాటిల్లినట్లు తెలుస్తోంది. సుమారు లక్ష టన్నులకు పైగా బొగ్గు ఉత్పత్తికి, 4 లక్షల టన్నులకు పైగా మట్టిని వెలికి తీసే పనులకు ఆటంకం కలిగింది.