Women Empowerment: ఆడవారికి అద్భుత అవకాశం.. జాబ్ మేళాకు హాజరవ్వండి.. మంచి జీతంతో ఉద్యోగం పొందండి

మహిళలు ఆర్థికంగా నిలదొక్కుకుని, సమాజంలో తమకంటూ ఒక ప్రత్యేక గుర్తింపును సంపాదించుకోవాలనే లక్ష్యంతో తెలంగాణ రాష్ట్ర మహిళా భద్రతా విభాగం హైదరాబాద్ సిటీ పోలీసులు ఒక వినూత్న కార్యక్రమానికి శ్రీకారం చుట్టారు. మోవో (MOWO) సోషల్ ఇనిషియేటివ్స్, భరోసా సంస్థల సహకారంతో నగరంలోని మహిళల కోసం ప్రత్యేకంగా ‘డ్రైవింగ్ ఉద్యోగ మేళా’ను నిర్వహిస్తున్నారు. ఈ కార్యక్రమం ద్వారా మహిళలను కేవలం ప్రయాణికులుగానే కాకుండా.. రవాణా రంగంలో సారథులుగా తీర్చిదిద్దాలని ప్రభుత్వం భావిస్తోంది.

ఈ ఉద్యోగ మేళా ప్రధాన ఉద్దేశం మహిళలకు బైక్ టాక్సీలు, ఈ-ఆటోలు (E-Autos) నడపడంలో నైపుణ్యాన్ని అందించడం. ముఖ్యంగా మహిళా ప్రయాణికుల కోసం మహిళా డ్రైవర్లను అందుబాటులోకి తీసుకురావడం ద్వారా నగరంలో రవాణా వ్యవస్థను మరింత సురక్షితంగా మార్చాలని లక్ష్యంగా పెట్టుకున్నారు. ఈ మేళాలో ఎంపికైన వారికి ఉచితంగా శిక్షణ ఇవ్వడమే కాకుండా.. వారు సొంతంగా ఉపాధి పొందేలా పూర్తి సహకారం అందిస్తారు.

ఉచిత శిక్షణ, లైసెన్స్ సదుపాయం..

ఈ పథకం కింద దరఖాస్తు చేసుకున్న మహిళలకు బైక్‌లు, స్కూటర్లు మరియు ఈ-ఆటోలు నడపడంలో నిపుణులైన మహిళా ట్రైనర్ల ద్వారా ఉచితంగా శిక్షణ ఇస్తారు. డ్రైవింగ్ నైపుణ్యాలతో పాటు, రోడ్డు భద్రత, ట్రాఫిక్ నిబంధనలు, ఆపత్కాలంలో తీసుకోవాల్సిన జాగ్రత్తలపై ప్రత్యేక తరగతులు నిర్వహిస్తారు. శిక్షణ పూర్తి చేసుకున్న అభ్యర్థులకు డ్రైవింగ్ లైసెన్స్ పొందే ప్రక్రియలో పూర్తి సహాయ సహకారాలు అందజేస్తారు. అంతేకాకుండా, శిక్షణ అనంతరం వంద శాతం ఉద్యోగ అవకాశాలు కల్పించడమే కాకుండా.. మూడు నెలల పాటు మెంటార్‌షిప్, కౌన్సెలింగ్ కూడా అందిస్తారు.

ఆర్థిక స్వావలంబన కోసం వాహన రుణాలు..

శిక్షణ పొందిన మహిళలు సొంతంగా వాహనం కొనుగోలు చేయాలనుకుంటే, వారికి వాహన రుణాలు (Loans) లేదా లీజు/రెంటు పద్ధతిలో వాహనాలను అందించేలా అధికారులు ఏర్పాట్లు చేస్తున్నారు. దీనివల్ల ఆర్థికంగా వెనుకబడిన మహిళలు కూడా ఎటువంటి పెట్టుబడి లేకుండా గౌరవప్రదమైన ఉపాధిని పొందవచ్చు.

కీలక వివరాలు.. 

ఈ ఉద్యోగ మేళాలో పాల్గొనడానికి హైదరాబాద్‌కు చెందిన 21 నుండి 45 ఏళ్ల లోపు మహిళలు అర్హులు. దరఖాస్తుదారులకు గతంలో ఎటువంటి డ్రైవింగ్ అనుభవం లేకపోయినా పర్వాలేదు. ఆసక్తి గల వారు తమ వెంట ఆధార్ కార్డును తప్పనిసరిగా తీసుకురావాలి. ఒకవేళ ఇప్పటికే డ్రైవింగ్ లైసెన్స్ కలిగి ఉంటే దానిని కూడా వెంట తెచ్చుకోవచ్చు.

వేదిక, సమయం వివరాలు

ఈ మెగా జాబ్ మేళా జనవరి 3వ తేదీ (శుక్రవారం) ఉదయం 10:30 గంటల నుండి మధ్యాహ్నం 1:00 గంట వరకు అంబర్‌పేట్‌లోని పోలీస్ ట్రైనింగ్ సెంటర్ (PTC)లో నిర్వహించబడుతుంది. ఆసక్తి ఉన్న మహిళలు మరిన్ని వివరాల కోసం 89788 62299 నంబర్‌ను సంప్రదించవచ్చు లేదా పోస్టర్‌లోని క్యూఆర్ (QR) కోడ్‌ను స్కాన్ చేసి రిజిస్టర్ చేసుకోవచ్చు. మహిళలు ఈ అద్భుత అవకాశాన్ని వినియోగించుకుని ఆర్థికంగా అభివృద్ధి చెందాలని నిర్వాహకులు కోరుతున్నారు.

ALSO READ: The Raja Saab 2.o Trailer: మన టైం స్టార్ట్ అయింది.. మరో ట్రైలర్ రిలీజ్ చేసిన రాజా సాబ్!