Platform Ticket Train Travel| రైల్వే స్టేషన్‌కు వెళ్లినప్పుడు ప్లాట్‌ఫామ్ టికెట్ తీసుకోవడం చాలామందికి అలవాటు. కుటుంబ సభ్యులను రైలెక్కించడానికి, ప్రయాణికులను రిసీవ్ చేసుకోవడానికి ఈ టికెట్ ఉపయోగపడుతుంది. అయితే, ఈ టికెట్ తీసుకుంటే రోజంతా స్టేషన్‌లో ఉండవచ్చా? అత్యవసర పరిస్థితుల్లో ఇదే టికెట్‌తో రైలెక్కవచ్చా? అనే సందేహాలు చాలామందికి ఉంటాయి. ఈ నిబంధనలు తెలియకపోతే అనవసరమైన జరిమానాలు చెల్లించాల్సి రావచ్చు. అందుకే ప్లాట్‌ఫామ్ టికెట్‌కు సంబంధించిన ముఖ్యమైన విషయాలను ప్రతి ఒక్కరూ తెలుసుకోవాలి.
చాలామంది ప్లాట్‌ఫామ్ టికెట్ కొనుగోలు చేస్తే రోజంతా చెల్లుతుందని భావిస్తారు. కానీ సాధారణంగా ఈ టికెట్ గడువు కేవలం రెండు గంటలు మాత్రమే ఉంటుంది. టికెట్ కొనుగోలు చేసిన సమయం నుంచే ఈ గడువు ప్రారంభమవుతుంది.
ఉదాహరణకు, ఉదయం 10 గంటలకు టికెట్ తీసుకుంటే మధ్యాహ్నం 12 గంటల వరకు మాత్రమే ఉపయోగించుకోవచ్చు. ఆ తర్వాత టికెట్ చెల్లుబాటు కాదు. కాబట్టి అవసరానికి మించి స్టేషన్‌లో ఎక్కువసేపు ఉండకూడదు. టికెట్‌పై పేర్కొన్న నిబంధనలను కూడా పరిశీలించాలి.
ప్లాట్‌ఫామ్ టికెట్లు అపరిమితంగా అందుబాటులో ఉండవు. ప్రతి స్టేషన్ సామర్థ్యం, ప్రయాణికుల రద్దీ ఆధారంగా రైల్వే అధికారులు నిర్ణయాలు తీసుకుంటారు. స్టేషన్‌లో ఇప్పటికే ఎక్కువ మంది ఉంటే అదనపు ప్రవేశాన్ని నియంత్రించవచ్చు. అలాంటి సమయంలో ప్లాట్‌ఫామ్ టికెట్లు ఇవ్వడానికి సిబ్బంది నిరాకరించవచ్చు. ప్రయాణికుల భద్రత, రద్దీ నియంత్రణ కోసం ఈ చర్యలు తీసుకుంటారు.
Also Read: రైలు ప్రయాణంలో విండో సీటు కావాలా? టికెట్ బుక్ చేసే ముందు ఇది తెలుసుకోండి
అత్యవసరంగా ప్రయాణించాల్సి వచ్చినప్పుడు ప్లాట్‌ఫామ్ టికెట్‌తో రైలెక్కవచ్చా అనే సందేహం చాలామందికి ఉంటుంది. అయితే, ప్లాట్‌ఫామ్ టికెట్ సాధారణ ప్రయాణ టికెట్‌కు ప్రత్యామ్నాయం కాదు.
అత్యవసర పరిస్థితుల్లో రైలెక్కాల్సి వస్తే వెంటనే టీటీఈని సంప్రదించాలి. తాను ప్రయాణించాల్సిన విషయాన్ని వివరించి, గమ్యస్థానం వరకు సరైన టికెట్ తీసుకోవాలి. టీటీఈ నిబంధనల ప్రకారం టికెట్ జారీ చేసి, వర్తించే ఛార్జీలను వసూలు చేయవచ్చు.
ప్లాట్‌ఫామ్ టికెట్ ద్వారా ప్రయాణికుడు ఏ స్టేషన్ నుంచి రైలెక్కాడో నిర్ధారించడానికి తెలుస్తుంది. అయితే, అది ప్రయాణ టికెట్‌గా పరిగణించబడదు.
Also Read: రాత్రివేళ లాంగ్ డ్రైవ్‌ చేస్తున్నారా? ఈ జాగ్రత్తలు తప్పక పాటించండి
చెల్లుబాటు అయ్యే ప్రయాణ టికెట్ లేకుండా రైలులో ప్రయాణించడం నిబంధనల ఉల్లంఘనగా పరిగణిస్తారు. అలాంటి ప్రయాణికులపై రైల్వే అధికారులు జరిమానా విధించే అవకాశం ఉంది. ఇప్పుడున్న రూల్స్ ప్రకారం.. కనీసం రూ.250 లేదా వర్తించే ఛార్జీకి రెండింతలు జరిమానా పడే అవకాశం ఉంది. పరిస్థితులను బట్టి జరిమానా మొత్తం మారవచ్చు. ఉద్దేశపూర్వకంగా రైల్వే నిబంధనలను ఉల్లంఘిస్తే చట్టపరమైన చర్యలు కూడా ఎదుర్కోవాల్సి రావచ్చు.
కాబట్టి ప్రయాణానికి ముందే సరైన టికెట్ తీసుకోవడం మంచిది. అత్యవసర పరిస్థితులు ఎదురైతే రైల్వే సిబ్బందిని సంప్రదించాలి. నిబంధనలు తెలుసుకుంటే జరిమానాలు, అనవసరమైన ఇబ్బందులు తప్పించుకోవచ్చు.
Share
నరేష్ కి స్పెషల్ సర్ప్రైజ్ ఇచ్చిన బిగ్ బాస్.. ఈ ట్విస్ట్ ఏంటి సామి!
సబ్స్క్రిప్షన్ ఖర్చులకు చెక్ పెట్టే 4 బెస్ట్ యాప్స్.. నెలకు ఎంత ఆదా చేయవచ్చో తెలుసా?
