Rayadurgam Goods Train Incident: బోగీలను వదిలి వెళ్లిపోయిన ఇంజిన్.. రాయదుర్గం‌లో షాకింగ్ ఘటన

Rayadurgam Goods Train Incident:  గూడ్స్ రైలు ఇంజిన్ దాని బోగీలను పట్టాలపైనే వదిలేసి, తాను మాత్రం ముందుకు వెళ్లిపోయిన సంఘటన అనంతపురం జిల్లాలో రాయదుర్గం రైల్వే స్టేషన్ సమీపంలో చోటుచేసుకుంది. దాదాపు రెండు కిలోమీటర్ల దూరం వెళ్లేంత వరకు ఆ రైలు లోకో పైలట్‌కు తన వెనుక బోగీలు రావడం లేదన్న విషయం తెలియకపోవడం గమనార్హం. స్థానికులు అప్రమత్తం చేయడంతో అధికారులు స్పందించి పరిస్థితిని చక్కదిద్దారు.

మొలకాల్మూరు నుండి జిందాల్  స్టీల్ ప్లాంట్‌కు ముడి సరుకుతో వెళ్తున్న ఒక గూడ్స్ రైలు బుధవారం అనంతపురం జిల్లా మీదుగా ప్రయాణిస్తోంది. ఈ రైలులో మొత్తం 45 బోగీలు ఉన్నాయి. రైలు రాయదుర్గం రైల్వే స్టేషన్ సమీపానికి చేరుకుంటున్న సమయంలో, ఊహించని సాంకేతిక లోపం తలెత్తింది. ఇంజిన్ వెనుక ఉన్న నాలుగో బోగీ వద్ద ఉన్న ‘లింక్’  ఒక్కసారిగా తెగిపోయింది. దీంతో ఇంజిన్, దాని వెనుకే ఉన్న మూడు బోగీలు వేరుపడగా, మిగిలిన బోగీలు అక్కడే పట్టాలపై ఆగిపోయాయి.

లింక్ తెగిపోయిన శబ్దం గానీ, రైలు బరువు తగ్గిన విషయం గానీ లోకో పైలట్ గమనించలేకపోయారు. దీంతో ఇంజిన్‌తో కూడిన ముందు భాగం వేగంగా ముందుకు సాగిపోయింది. దాదాపు రెండు కిలోమీటర్ల దూరం వెళ్లిన తర్వాత కూడా పైలట్ ఈ విషయాన్ని గుర్తించలేదు. మరోవైపు, ఇంజిన్ లేకుండా పట్టాలపై నిలబడి ఉన్న గూడ్స్ రైలు బోగీలను చూసిన స్థానికులు, రైతులు ఆశ్చర్యపోయారు. ఏదో ప్రమాదం జరిగి ఉంటుందని భావించి వెంటనే రైల్వే అధికారులకు, స్టేషన్ మాస్టర్‌కు సమాచారం అందించారు.

 అనంతరం లోకో పైలట్ ఇంజిన్‌ను వెనక్కి నడుపుకుంటూ వచ్చి, విడిపోయిన బోగీలు ఉన్న ప్రదేశానికి చేరుకున్నారు. రైల్వే సాంకేతిక సిబ్బంది ఘటనా స్థలానికి చేరుకుని, తెగిపోయిన లింక్‌ను సరిచేసి, ఇంజిన్‌ను తిరిగి బోగీలకు విజయవంతంగా అనుసంధానించారు. మరమ్మతులు పూర్తయిన తర్వాత గూడ్స్ రైలు తన ప్రయాణాన్ని యథావిధిగా కొనసాగించింది.

ఈ ఘటనలో ఎవరికీ ఎటువంటి ప్రమాదం జరగకపోవడంతో అధికారులు ఊపిరి పీల్చుకున్నారు. గూడ్స్ రైలు పట్టాలు తప్పకపోవడం, వెనుక నుంచి వేరే రైలు రాకపోవడం వంటి కారణాల వల్ల పెను ప్రమాదం తప్పిందని స్థానికులు చర్చించుకున్నారు. ఈ ఘటన వల్ల ఆ మార్గంలో ప్రయాణించే ఇతర రైళ్ల రాకపోకలకు ఎలాంటి అంతరాయం కలగలేదని, ట్రాఫిక్ క్లియర్ అయిందని రైల్వే అధికారిక వర్గాలు స్పష్టం చేశాయి. అయితే, గూడ్స్ రైలు లింక్ ఎలా తెగిపోయింది? నిర్వహణ లోపం ఏమైనా ఉందా? అనే కోణంలో అధికారులు ఆరా తీస్తున్నారు.

Read Also: మీ బైక్ కు సర్వీస్ అవసరమా? లేదా? సింపుల్ గా ఇలా తెలుసుకోండి!

Share

• 
• 
• 
• 
• 
•