Tribal: ఆఫ్రికన్ బాడీ ఆర్ట్ ఎందుకు అంత ప్రత్యేకం..?

Tribal: బాడీ ఆర్ట్ అనగానే మన బాడీని మరింత అందంగా చూపించుకోవడానికే మన శరీరంపై వేసుకునే ఆర్ట్ లేదా డిజైన్ అని మనందరికీ తెలిసిందే. వివిధ దేశాల్లో ఆయా సంస్కృతుల ఆధారంగా ఈ బాడీ ఆర్ట్ లు చాలా పాపులర్ అయ్యాయి. అయితే, ఆఫ్రికా ఖండంలోని కొన్ని దేశాల సంస్కృతుల్లో బాగా ఫేమస్ ఐన ఈ ఆఫ్రికన్ బాడీ ఆర్ట్ గురించి చాలా మందికి పెద్దగా అవగాహన ఉండదు. అసలు ఈ బాడీ ఆర్ట్ ఏంటి? ఈ సంస్కృతిని ఇప్పటికీ ఏందుకు కొనసాగిస్తున్నారో ఇప్పుడు తెలుసుకుందాం..

సాంస్కృతిక వారసత్వం
ఆఫ్రికన్ బాడీ ఆర్ట్ అనేది ఆఫ్రికాలోని వివిధ సంస్కృతులు, సంప్రదాయాలు, చరిత్రలను ప్రతిబింబించే శక్తివంతమైన కళ. ఇందులో టాటూలు, స్కారిఫికేషన్, బాడీ పెయింటింగ్, ఆభరణాలు ధరించడం వంటివి ఉన్నాయి. ఇది కేవలం శరీర అలంకరణ కోసం మాత్రమే కాకుండా, సామాజిక, ఆధ్యాత్మిక, రాజకీయ సందేశాలను వ్యక్తీకరించే మాధ్యమంగా పనిచేస్తుందని చరిత్రకారులు చెబుతారు.

సాంస్కృతిక ప్రాముఖ్యత
ఆఫ్రికన్ బాడీ ఆర్ట్ ఒక వ్యక్తి సామాజిక స్థితిని, జాతి, తెగకు సంబంధించిన వివరాలను గుర్తించడానికి ఉపయోగపడుతుంది. ఉదాహరణకు, నైజీరియాలోని యొరుబా సంస్కృతిలో ముఖంపై టాటూ లేదా స్కారిఫికేషన్ ఒక వ్యక్తి కుటుంబం, తెగకు సంబంధించిన సమాచారాన్ని సూచిస్తుంది. అదేవిధంగా, ఇథియోపియాలోని సుర్మా తెగలో శరీరంపై వేసే రంగురంగుల నమూనాలు వారి అందం, సామాజిక స్థాయిని తెలియజేస్తాయి.

వివిధ రూపాలు
స్కారిఫికేషన్ ఆఫ్రికన్ బాడీ ఆర్ట్‌లో ఒక ప్రముఖ రూపం. ఇందులో చర్మంపై కత్తులు లేదా ఇతర పదునైన సాధనాలతో గాయాలు చేసి శాశ్వత గుర్తులను సృష్టిస్తారు. ఈ గుర్తులు అందం, ధైర్యం, ఆధ్యాత్మిక రక్షణకు చిహ్నాలుగా పరిగణించబడతాయని చరిత్రకారులు చెబుతారు. బాడీ పెయింటింగ్‌లో సహజ రంగులు, బురద లేదా మొక్కల నుండి తయారైన రంగులను ఉపయోగిస్తారు. ఇవి ఎక్కువగా ఉత్సవాలు, వివాహాలు, సాంస్కృతిక కార్యక్రమాల్లో కనిపిస్తాయి.

హెన్నా
ఆఫ్రికన్ బాడీ ఆర్ట్‌లో హెన్నా కూడా ముఖ్యమైన రూపం. ముఖ్యంగా ఉత్తర ఆఫ్రికాలోని మొరాకో, ఈజిప్ట్ వంటి దేశాల సంస్కృతులలో వివాహాలు, పండుగల సందర్భంగా చేతులు, కాళ్లపై హెన్నా డిజైన్లు వేస్తారు. ఈ డిజైన్లు అదృష్టం, సంతోషం, రక్షణను సూచిస్తాయని అక్కడి ప్రజలు నమ్ముతారు. ఈ హెన్నా ఆర్ట్ ఇండియాలో మెహందీగా ప్రసిద్ధమైన విషయం మనందరికీ తెలిసిందే.

ఆధునిక ప్రభావం
ఆధునిక కాలంలో ఆఫ్రికన్ బాడీ ఆర్ట్ పాశ్చాత్య సంస్కృతిపై గణనీయమైన ప్రభావం చూపింది. భారతదేశంలో కూడా టాటూ సంస్కృతి చాలా సాధారణమైంది. ఈ టాటూ డిజైన్లు, బాడీ పెయింటింగ్ ట్రెండ్‌లలో ఆఫ్రికన్ నమూనాలు ప్రపంచవ్యాప్తంగా ప్రసిద్ధి చెందాయి. అయితే, ఈ కళారూపాల సాంస్కృతిక సందర్భాన్ని గౌరవించి, వాటిని సరైన విధానంలో ఉపయోగించడం చాలా ముఖ్యం. ఎప్పుడైనా ఆఫ్రికాకు వెళ్తే ఈ బాడీ ఆర్ట్ గురించి తెలుసుకునే ఛాన్స్ ఉంటుది.

Share

• 
• 
• 
• 
• 
•