Bougainvillea Tree: భోగన్విల్లా చెట్టు అందమైన పూలతో నిండిపోతే చూడటానికి ఎంత అందంగా ఉంటుందో అందరికీ తెలుసు. కానీ చాలా మంది తమ ఇంట్లో ఉన్న భోగన్విల్లా చెట్టుకి రోజూ నీళ్లు పోసినా పూలు రావడం లేదని ఆశ్చర్యపడుతుంటారు. నీళ్లు పోయకపోతే ఆ చెట్టు వాడిపోతుందేమోనని భయపడి ప్రతిరోజూ నీరు పోస్తుంటారు. కానీ నిజం ఏమిటంటే నీరు ఎక్కువగా పోస్తే ఈ మొక్క పూలు కాదు, ఆకులు మాత్రమే వస్తాయి. దానికి వెనుక ఉన్న కారణం ప్రకృతి సహజమైన రహస్యం. అదేంటో ఇప్పుడు తెలుసుకుందాం.
కాగితం పువ్వుల చెట్టు (భోగన్విల్లా)
భోగన్విల్లా అంటే కాగితం పువ్వుల చెట్టు అని కూడా అంటారు. ఈ మొక్క అసలు దక్షిణ అమెరికా దేశాల నుండి వచ్చినది. అక్కడి వాతావరణం ఎక్కువగా ఎండగా ఉంటుంది. తక్కువ నీటితో కూడా బతికే సామర్థ్యం ఈ మొక్కకి సహజంగానే వచ్చింది. ఈ మొక్క వేర్లు నేలలో లోతుగా పెరిగి కొద్దిగా తేమ ఉన్నా దానితో బతుకుతుంది. అందుకే దీన్ని ఎండాకాలపు మొక్క అని కూడా పిలుస్తారు.
నీళ్లు ఎక్కువగా పోస్తే ఈ మొక్కకు ఎటువంటి దాహం ఉండదు. దాంతో అది ఆహ్లాదంగా పెరుగుతుంది కానీ పువ్వులు పూయదు. ఎందుకంటే మొక్క దృష్టిలో పువ్వు పూయడం అంటే తన వంశాన్ని కొనసాగించడానికి చేసే ప్రయత్నం. కానీ జీవన ప్రమాదం లేకుండా సుఖంగా ఉన్నప్పుడు దానికి పూల అవసరం ఉండదు.
నీరు లేకపోతే పువ్వులు పూయించడం
మొక్క దాహంతో ఉన్నప్పుడు మాత్రం పరిస్థితి మారుతుంది. కొన్ని రోజుల పాటు నీరు పోయకపోతే భోగన్విల్లా మొక్క దాహంతో తట్టుకోలేక ఒత్తిడికి గురవుతుంది. ఆ సమయంలో అది తాను చనిపోయే ప్రమాదం ఉందని భావిస్తుంది. అప్పుడే అది త్వరగా పువ్వులు పూయించడం ప్రారంభిస్తుంది. ఎందుకంటే పువ్వుల ద్వారా విత్తనాలు ఏర్పడతాయి, వాటి ద్వారా తన జాతి కొనసాగుతుంది. ఈ సహజ ప్రతిచర్యనే శాస్త్రవేత్తలు స్ట్రెస్ బ్లూమింగ్ అంటారు. అంటే మొక్క ఎప్పుడు ఒత్తిడికి గురవుతుందో అప్పుడు పువ్వులు పూయడం మొదలుపెడుతుంది.
రంగుల ఆకులు
భోగన్విల్లా పువ్వులు అని మనం అనుకునేవి నిజానికి పువ్వులు కావు. అవి రంగుల ఆకులు మాత్రమే. వాటి మధ్యలో ఉండే చిన్న తెల్లటి భాగమే అసలు పువ్వు. కానీ ఆ రంగుల ఆకులు పువ్వుల్లా కనిపించి అందాన్ని పెంచుతాయి. అందుకే ఈ మొక్కను ప్రజలు పూవుల చెట్టు అని పిలుస్తారు.
వారానికి ఒకసారి లేదా రెండు సార్లు మాత్రమే నీరు
ఈ మొక్కను సరిగ్గా పూయించాలంటే రోజూ నీరు పోసే బదులు వారం లో ఒకసారి లేదా రెండు సార్లు మాత్రమే నీరు పోవాలి. నేల పూర్తిగా ఆరిపోయిన తర్వాత నీరు పోయాలి. అప్పుడు మొక్క సహజంగా ఒత్తిడికి గురై పువ్వులు పూయిస్తుంది. నీరు ఎక్కువగా పోస్తే నేల ఎప్పుడూ తడిగా ఉండటం వల్ల వేర్లకు గాలి దొరకదు, దాంతో మొక్క ఆకులు మాత్రమే పెడుతుంది.
నీరు తగ్గిస్తేనే అందాన్నిస్తుంది
అందుకే భోగన్విల్లా చెట్టు అందంగా పూయించాలంటే దానికి కొంత దాహం ఉండేలా చూడాలి. నీరు తగ్గిస్తేనే అది తన అందాన్ని చూపిస్తుంది. ప్రకృతి రహస్యం అదే జీవితం ఎప్పుడైనా కష్టంలో పడితేనే అందం పూస్తుంది. భోగన్విల్లా చెట్టు మనకు నేర్పే గొప్ప పాఠం కూడా ఇదే.
Share
Pankaj dheer: మహాభారత కర్ణుడు పంకజ్ ధీర్ మృతి..68 ఏళ్ల వయసులో
Ghaziabad Crime: 11 ఏళ్ల కూతురి ముందు.. గన్ తీసుకుని భార్యని కాల్చిన భర్త, ఘజియాబాద్లో దారుణం
