Bhimavaram Politics: ఎట్టకేలకు ఏపీ రాజకీయాలు కొత్త మలుపు తిరిగాయి. మున్సిపల్ ఎన్నికల నేపథ్యంలో కూటమి పార్టీల మధ్య లుకలుకలు మొదలయ్యాయి. భీమవరం మున్సిపాలిటీలో సొంతంగా పోటీ చేసేందుకు రెడీ అయ్యింది బీజేపీ. ఈ మేరకు కేంద్రమంత్రి శ్రీనివాసవర్మ బహిరంగ ప్రకటన చేయడం కూటమలో తీవ్ర కలకలం రేపింది.
ఏపీలో మినీ మున్సిపాలిటీ ఎన్నికలు కూటమిలో చిచ్చు పెట్టాయి. ఫలితంగా భీమవరం మున్సిపాలిటీ ఎన్నికల్లో ఫ్రెండ్లీ పోటీకి సిద్ధమైంది బీజేపీ. ఈ నేపథ్యంలో కేంద్ర సహాయమంత్రి శ్రీనివాసవర్మ బహిరంగ ప్రకటన చేశారు. దీంతో అలయన్స్ పార్టీలు అలర్ట్ అయ్యాయి. ఇంతకీ కేంద్రమంత్రి ఏమన్నారు? భీమవరం మున్సిపల్ ఎన్నికల్లో సీట్ల కేటాయింపులో కూటమి నాయకుల వైఖరిని తప్పుబట్టారు కేంద్ర మంత్రి.
అంతేకాదు తీవ్ర అసంతృప్తి వ్యక్తం చేశారు. సమాచారం లేకుండా టీడీపీ-జనసేన సొంతంగా అభ్యర్థులను ప్రకటించడాన్ని ఆయన తప్పుబట్టారు. ముమ్మాటికీ బీజేపీని అవమానించడమేనని కుండబద్దలు కొట్టేశారు. భీమవరం మున్సిపాలిటీలోని 52 వార్డుల్లో క్యాడర్ బలమున్న చోట కాకుండా కేవలం 5 వార్డులు కేటాయించడం ఏంటని ప్రశ్నించారు. రాజ్యసభ సభ్యుడు పాకా సత్యనారాయణ కొడుక్కి సీటు ఇవ్వకపోవడాన్ని తప్పుబట్టారు సదరు కేంద్రమంత్రి.