Tippala Devan Reddy : ఏపీలో వైసీపీకి షాకులుమీద షాకులు తగులుతున్నాయి. గాజువాక ఎమ్మెల్యే కుమారుడు వైసీపీకి రాజీనామా చేశారు. వచ్చే ఎన్నికల్లో దేవన్ రెడ్డి గాజువాక నుంచి పోటీ చేయాలని భావిస్తున్నారు. ఎమ్మెల్యే తిప్పల నాగిరెడ్డి తన కుమారుడికే టిక్కెట్ ఇవ్వాలని వైసీపీ అధిష్టానాన్ని కోరారు.
వయసు, అనారోగ్య సమస్యల రీత్యా తాను పోటీ చేయలేనని తెలిపారు. తన కుమారుడు దేవన్ రెడ్డికి టికెట్‌ ఇవ్వాలని కోరారు. టికెట్‌పై హామీ రాకపోవడంతో దేవన్ రెడ్డి వైసీపీ రాజీనామా చేశారని తెలుస్తోంది.
2019లో ఎన్నికల్లో జనసేన అధినేత పవన్ కల్యాణ్ ను గాజువాకలో తిప్పల నాగిరెడ్డి ఓడించారు. నాడు తండ్రి విజయంలో దేవన్ రెడ్డి కీలక పాత్ర పోషించారు. నియోజకవర్గంలో విస్తృతంగా ప్రచారం చేసి తండ్రిని గెలిపించారు. వచ్చే ఎన్నికల్లో తండ్రి పోటీకి దూరంగా ఉండాలని భావిస్తున్నారు.
ఈ నేపథ్యంలో గాజువాక టిక్కెట్ తనదేనన్న ధీమాలో ఇన్నాళ్లూ దేవన్ రెడ్డి ఉన్నారు. కానీ తనకు టిక్కెట్ దక్కదన్న సంకేతాలు పార్టీ నుంచి రావడంతో పార్టీని వీడారు.