వరాహ నదిలో విషాదం.. స్నానానికి దిగి ముగ్గురు యువకులు గల్లంతు!

Varaha River: అనకాపల్లి జిల్లాలో తీవ్ర విషాదం చోటుచేసుకుంది. ఎస్.రాయవరం మండలం పెనుగొల్లు వద్ద వరాహ నదిలో సరదాగా స్నానానికి దిగిన ముగ్గురు యువకులు గల్లంతయ్యారు. గ్రామానికి చెందిన కేతేటి రిషి (18), కోడి జగదీష్ (20), ముప్పిడి నాగవంశీ (22) తో పాటు మరో ముగ్గురు స్నేహితులతో కలిసి గ్రోయిన్ వద్దకు వెళ్లారు. నదిలో స్నానానికి దిగిన ఆరుగురూ కొట్టుకుపోతుండగా.. స్థానికులు అప్రమత్తమై సహాయక చర్యలు చేపట్టాగా.. వెంటనే స్పందించి ముగ్గురిని ప్రాణాలతో కాపాడారు. అయితే, మిగతా ముగ్గురు నీటి ఉధృతికి కొట్టుకుపోయి ఆచూకీ లేకుండా పోయారు.

గాలింపు చర్యలు ముమ్మరం

యువకులు నదిలో గల్లంతైన విషయం తెలియగానే స్థానికులు నదిలోకి దిగి ఎంత వెతికినా ఎలాంటి ఫలితం లేకపోయింది. సమాచారం అందుకున్న సీఐ రామకృష్ణ, ఎస్సై రమేష్ వెంటనే ఘటనా స్థలానికి చేరుకుని వివరాలు సేకరించారు. ప్రస్తుతం రెస్క్యూ ఆపరేషన్‌ను మరింత వేగవంతం చేశారు. మెరుగైన గాలింపు చర్యల కోసం పోలవరం నుంచి ప్రత్యేకంగా గజ ఈతగాళ్లను రప్పిస్తున్నారు.

గ్రామంలో విషాదఛాయలు

ఒకే గ్రామానికి చెందిన ముగ్గురు యువకులు ఇలా ఒక్కసారిగా నదిలో గల్లంతు కావడంతో పెనుగొల్లులో తీవ్ర విషాదఛాయలు అలముకున్నాయి. ఇళ్ల నుంచి నదికి వెళ్లిన పిల్లలు తిరిగిరాని లోకాలకు వెళ్లారేమోనని కుటుంబ సభ్యులు కన్నీరుమున్నీరవుతున్నారు. గ్రామస్తులంతా నది ఒడ్డునే ఉండి ఆచూకీ కోసం ఎదురుచూస్తున్నారు.

Also Read: మమ్మల్ని ఆపడం ఎవరి తరమూ కాదు.. భారత్ సమ్మిట్‌లో రేవంత్ ధీమా