LIC Child Plans: పిల్లల భవిష్యత్తు గురించి తల్లిదండ్రులు ఎంతగానో ఆలోచిస్తుంటారు. బిడ్డల ఉన్నత విద్య, కెరీర్ లక్ష్యాల కోసం భారీ మెుత్తంలో డబ్బు అవసరమని ముందు నుంచే తెగ టెన్షన్ పడిపోతుంటారు. కాబట్టి ఇప్పటి నుంచి పిల్లల పేరిట కొద్దిగా కొద్దిగా పొదుపు చేసేందుకు తెగ ప్రయత్నిస్తుంటారు. అలాంటి వారి కోసం ఎల్ఐసీ (LIC)లో మంచి స్కీమ్స్ అందుబాటులో ఉన్నాయని నిపుణులు పేర్కొంటున్నారు. అందులోనూ మూడు స్కీమ్స్ పిల్లల భవిష్యత్తుకు మెరుగైన భరోసాను ఇచ్చేలా ఉన్నాయని సూచిస్తున్నారు. ఇంతకీ ఆ స్కీమ్స్ ఏంటి? దాని అర్హతలు, ఇతర వివరాలు ఏంటో ఇప్పుడు పరిశీలిద్దాం.
పిల్లల ఉన్నత విద్య, భవిష్యత్తు అవసరాల కోసం పెద్ద మొత్తాన్ని ఆదా చేసుకోవడానికి ఎల్ఐసీ ‘అమృత్‌బాల్’ ప్లాన్ అందుబాటులో ఉంది. 30 రోజుల పిసికందు నుంచి 13 ఏళ్ల వయస్సు ఉన్న పిల్లల పేరు మీద ఈ పాలసీ తీసుకోవచ్చు. ప్రీమియం చెల్లింపు వ్యవధిని 10 సంవత్సరాల నుంచి 25 సంవత్సరాల వరకు ఎంచుకునే సౌలభ్యం ఇందులో ఉంది. ఎంచుకున్న కాలపరిమితి పూర్తయిన తర్వాత పిల్లల చదువు లేదా ఇతర పెద్ద అవసరాల కోసం మెచ్యూరిటీ బెనిఫిట్ లభిస్తుంది.
పిల్లల చదువులో విభిన్న దశలలో ఆర్థిక అవసరాలు ఎదురవుతాయని భావించే తల్లిదండ్రుల కోసం ఈ ‘చిల్డ్రన్స్ మనీ బ్యాక్ ప్లాన్’ ఎంతగానో ఉపయోగపడుతుంది. పుట్టిన చిన్నారి నుంచి 12 ఏళ్ల వయస్సు వరకు ఈ ప్లాన్ తీసుకోవచ్చు. మెచ్యూరిటీకి ముందే పిల్లల ఉన్నత చదువుల సమయంలో నిర్ణీత వయస్సుల వద్ద సర్‌వైవల్ బెనిఫిట్స్ రూపంలో డబ్బు పొందొచ్చు. పాలసీ గడువు ముగిసినప్పుడు.. మిగిలిన డబ్బుతో పాటు అదనపు బోనస్‌లు సైతం చెల్లిస్తారు. కాలేజీ అడ్మిషన్ ఫీజులు, ట్యూషన్ ఫీజులు వంటి ఖర్చులకు ఈ ప్లాన్ ఆసరాగా నిలుస్తుందని చెప్పవచ్చు.
‘ఎల్ఐసీ జీవన్ తరుణ్’ ఒక ఫ్లెక్సిబుల్ సేవింగ్స్ ప్లాన్. మెచ్యూరిటీకి ముందు ఎంత శాతం సొమ్మును క్రమానుగతంగా తీసుకోవాలో తల్లిదండ్రులే ఎంచుకునే సదుపాయం ఇందులో ఉంది. 90 రోజుల పసిపాప నుంచి 12 ఏళ్ల వయస్సు గల పిల్లల వరకు దీనికి అర్హులు. పాలసీ గడువు ముగియగానే మిగిలిన మొత్తాన్ని ఒకేసారి అందిస్తారు. ఇది పిల్లల భవిష్యత్తు లక్ష్యాలకు బాగా ఉపయోగపడుతుందని ఎల్ఐసీ వర్గాలు చెబుతున్నాయి.
Also Read: ‘ఎకరాకు రూ.30 వేల పరిహారం ఇవ్వాల్సిందే’.. ఏపీ ప్రభుత్వానికి షర్మిల అల్టిమేటం!
పైన పేర్కొన్న పాలసీలు అన్నింటికి పన్ను మినహాయింపు వర్తించనుంది. సెక్షన్ 80C కింద పన్ను మినహాయింపులు పొందే వెసులుబాటు కల్పించారు. అలాగే ఆదాయపు పన్ను చట్టంలోని షరతులకు లోబడి మెచ్యూరిటీ రూపంలో వచ్చే సొమ్ముపై కూడా పన్ను ప్రయోజనాలు లభిస్తాయని నిపుణులు చెబుతున్నారు. అయితే పైన పేర్కొన్న ఎల్ఐసీ పాలసీల్లో పెట్టుబడి పెట్టే ముందు స్కీమ్ పరిమితులు, బెనిఫిట్స్, మినహాయింపులు, అర్హత ప్రమాణాలను ఒకటికి రెండుసార్లు సరిచూసుకుంటే బెటర్. సరైన ప్లాన్‌ను ఎంచుకునేందుకు ఎల్ఐసీ ప్రతినిధి, ఆర్థిక సలహాదారుని సలహా తీసుకోవడం మర్చిపోవద్దు.
Share
డిప్రెషన్ లోకి వెళ్ళిపోయాను..నా వల్ల కాలేదు.. కన్నీళ్లు పెట్టుకున్న రీతూ!
మణిపూర్ పోకుండా ఇక్కడికెందుకొచ్చావ్? అమిత్ షాపై మంత్రి పొన్నం ఫైర్!
