startup flexible working hours| సోమవారం ఉదయం నిద్రలేవగానే అలసటగా అనిపిస్తే ఆఫీస్‌కు వెళ్లకుండా ఇంట్లోనే ఉండొచ్చని ఊహించుకోండి. సెలవుల లెక్క చూసుకోవాల్సిన అవసరం లేదు. మేనేజర్ అనుమతి కోసం ఎదురుచూడాల్సిన పనిలేదు. పని పూర్తి చేస్తే చాలు! వినడానికి ఆశ్చర్యంగా ఉన్నా, బెంగళూరుకు చెందిన ఓ స్టార్టప్ ఉద్యోగులకు ఇలాంటి స్వేచ్ఛను అందిస్తోంది.
అసలు ఈ కంపెనీ విధానం ఏమిటి? ఇలాంటి వర్క్ కల్చర్ భవిష్యత్తులో సాధ్యమేనా?
బెంగళూరుకు చెందిన FRND ఒక ఆడియో సోషల్ డిస్కవరీ ప్లాట్‌ఫామ్. 2019లో ఐఐటీ కాన్పూర్ పూర్వ విద్యార్థులు భాను ప్రతాప్ సింగ్ తన్వార్, హర్షవర్ధన్ ఛంగానీ ఈ కంపెనీ ప్రారంభించారు. ప్రస్తుతం తన్వార్ ఇంటరాక్ట్ గ్రూప్‌కు సీఈఓ, సహ వ్యవస్థాపకుడిగా ఉన్నారు. ఛంగానీ కూడా FRNDలో సహ వ్యవస్థాపకుడు, చీఫ్ ప్రొడక్ట్ ఆఫీసర్‌గా కొనసాగుతున్నారు. ఉద్యోగులు ఎప్పుడు పని చేస్తున్నారు అనేదానికంటే, ఎంత బాగా పని చేస్తున్నారు అనేదానికే కంపెనీ ప్రాధాన్యం ఇస్తుంది. ‘నో రూల్స్ రూల్స్’ అనే నెట్‌ఫ్లిక్స్ పుస్తకం నుంచి ఈ పని విధానం స్ఫూర్తి పొందింది. ఉద్యోగులు తమ బాధ్యతలను స్వయంగా నిర్వహించుకోవాలని కంపెనీ కోరుకుంటోంది.
FRNDలో ఉద్యోగులకు నిర్ణీత పని గంటలు, సెలవుల పరిమితులు లేవు. అయితే ఈ స్వేచ్ఛకు బాధ్యత కూడా ఉంటుంది. ఉద్యోగుల పనితీరును కంపెనీ బిజినెస్ టార్గెట్స్, యూజర్ల భాగస్వామ్యం ఆధారంగా అంచనా వేస్తుంది. కొంతమంది ఈ స్వేచ్ఛను దుర్వినియోగం చేసే అవకాశం ఉందని తన్వార్ అంగీకరిస్తున్నారు. అలాంటి సందర్భాల్లో ప్రతి ఒక్కరికీ కఠినమైన నిబంధనలు విధించకుండా, వ్యక్తిగత పనితీరును పరిశీలిస్తారు. పదేపదే బాధ్యతలు నిర్వర్తించని ఉద్యోగులను కంపెనీ తొలగించాల్సి వస్తుందని తెలిపారు. ఇన్‌క్రూటర్ సహ వ్యవస్థాపకుడు, సీఈఓ అనిల్ అగర్వాల్ కూడా స్వేచ్ఛతో పాటు బాధ్యత అవసరమని చెబుతున్నారు. స్పష్టమైన లక్ష్యాలు, గడువులు, క్రమమైన సమాచార మార్పిడి ఉండాలని సూచిస్తున్నారు.
ప్రతి ఒక్కరూ ఒకే సమయంలో సమర్థవంతంగా పనిచేయలేరు. కొందరు ఉదయాన్నే చురుగ్గా ఉంటే, మరికొందరు సాయంత్రం బాగా పనిచేస్తారు. పని సమయాలను ఎంచుకునే అవకాశం ఉద్యోగుల్లో ఉత్సాహాన్ని పెంచుతుందని నిపుణులు భావిస్తున్నారు. ‘బ్రిటీష్ జర్నల్ ఆఫ్ రిలేషన్స్‌’లో ప్రచురితమైన అధ్యయనం ఆసక్తికరమైన విషయాన్ని వెల్లడించింది. పని ప్రారంభించే, ముగించే సమయాలను ఎంచుకున్న ఉద్యోగుల్లో ఉత్పాదకత 50 శాతం వరకు పెరిగింది.
2025లో ‘జర్నల్ ఆఫ్ ఆర్గనైజేష్నల్ బిహేవియర్’ లో ప్రచురితమైన మరో విశ్లేషణ 113 అధ్యయనాలను పరిశీలించింది. ఇందులో 88,618 మంది పాల్గొన్నారు. సౌకర్యవంతమైన పని విధానాలు ఉద్యోగ సంతృప్తి, పని వ్యక్తిగత జీవితం మధ్య సమతుల్యతను మెరుగుపరుస్తాయని వెల్లడైంది.
Also Read: జిమ్ చేసేందుకు ఎక్కువ సమయం లేదా? ఫిట్‌గా ఉండేందుకు 20 నిమిషాలు వర్కౌట్ ప్లాన్ మీ కోసమే
పని గంటలు నిర్ణయించకపోతే కొందరు ఎక్కువసేపు పనిచేసే ప్రమాదం ఉంది. సహోద్యోగులతో సమన్వయం చేసుకోవడం కూడా కష్టమవుతుంది. అందుకే స్పష్టమైన బాధ్యతలు, గడువులు అవసరం.
హెల్త్ కేర్, మ్యానుఫ్యాక్చరింగ్, కస్టమర్ సపోర్ట్ వంటి రంగాల్లో నిర్ణీత షిఫ్టులు అవసరం. అందువల్ల అన్ని కంపెనీలు ఈ విధానాన్ని అనుసరించలేవు. భవిష్యత్తులో ఉద్యోగుల హాజరు కంటే ఫలితాలకు ఎక్కువ ప్రాధాన్యత పెరగవచ్చు. అయితే ఉద్యోగుల స్వేచ్ఛ, కంపెనీ అవసరాల మధ్య సమతుల్యత సాధించడమే అసలైన సవాలు.
Share
దీపావళికి ఇల్లంతా మెరిసిపోవాలా? ఇదిగో తక్కువ శ్రమతో ఈ హోమ్ క్లీనింగ్ టిప్స్
మరోసారి పాకిస్తాన్, టీమిండియా మ్యాచ్..ఎప్పుడంటే? రివేంజ్‌కు సిద్ధమవుతున్న వైభవ్
