Success Story| ఒక వ్యాపారం విఫలమైతే చాలా మంది తమ కలలను వదిలేస్తారు. కానీ కొందరు మాత్రం పట్టువదలని విక్రమార్కుల్లా ప్రయత్నిస్తుంటారు. ఓటమిని పాఠాలు నేర్చుకొని కొత్త అవకాశాలు సృష్టించుకుంటారు. అలాంటి వారిలో ఒకరు అభిషేక్ సాహు.మొదటి వ్యాపారంలో ఎదురైన ఓటమిని ఆయన కొత్త అవకాశంగా మార్చుకున్నారు. యూట్యూబ్‌లో వీడియోలు చూసి ఆయన ప్రారంభించిన చిన్న వ్యాపారంతో ఈ రోజు భారీ విజయం సాధించారు.
సుమారు 15 సంవత్సరాల క్రితం అభిషేక్ సాహు వ్యాపార కలలతో భోపాల్‌కు వెళ్లారు. అక్కడ ఆయన ఒక ఇంటర్నెట్ కేఫ్ ప్రారంభించారు. అయితే ఆ వ్యాపారం ఆశించిన స్థాయిలో సాగలేదు. కేవలం ఏడాది వ్యవధిలోనే ఇంటర్నెట్ కేఫ్ మూసివేయాల్సి వచ్చింది. ఆ సమయంలో ఆయన నిరాశ చెందకుండా మరోసారి వ్యాపారం చేయాలని నిర్ణయించుకున్నారు.
అభిషేక్‌కు ఫుడ్ బిజినెస్‌లో ఎలాంటి అనుభవం లేదు. అయినప్పటికీ ఆయన ఆ రంగంలోకి అడుగుపెట్టారు. రూ.30 వేల అప్పు తీసుకుని ఒక చిన్న శాండ్‌విచ్ కార్ట్ ప్రారంభించారు. శాండ్‌విచ్‌లు ఎలా తయారు చేయాలో తెలుసుకోవడానికి ఆయన యూట్యూబ్ వీడియోలు చూశారు. వివిధ రకాల రెసిపీలను నేర్చుకుని వాటిని స్వయంగా ప్రాక్టీస్ చేశారు. ఆ తర్వాత కస్టమర్లకు రుచికరమైన శాండ్‌విచ్‌లు అందించడం ప్రారంభించారు.
చిన్న కార్ట్‌గా ప్రారంభమైన ఈ వ్యాపారం తరువాత హరి హర్ శాండ్‌విచ్‌గా పేరు సంపాదించింది. సోషల్ మీడియా ప్లాట్‌ఫామ్ X పోస్ట్ ప్రకారం.. సాధారణ రోజుల్లో 600కుపైగా శాండ్‌విచ్‌లు విక్రయిస్తున్నారు. వీకెండ్స్‌లో ఈ సంఖ్య 1,000 దాటుతున్నట్లు సమాచారం. ఈ వ్యాపారం నెలకు సుమారు రూ.25 లక్షల టర్నోవర్ సాధిస్తున్నట్లు కూడా చెబుతున్నారు.
సోషల్ మీడియా కూడా అభిషేక్ వ్యాపారానికి మంచి గుర్తింపు తీసుకొచ్చింది. ఆయన శాండ్‌విచ్ కార్ట్‌కు సంబంధించిన ఒక ఇన్‌స్టాగ్రామ్ రీల్ వైరల్ అయింది. ఆ వీడియో చూసిన తర్వాత భోపాల్‌లోని వివిధ ప్రాంతాల నుంచి కస్టమర్లు రావడం ప్రారంభించారు. ప్రస్తుతం ఈ శాండ్‌విచ్ కార్ట్ వద్ద పెద్ద సంఖ్యలో ప్రజలు కనిపిస్తున్నారు. కొంతమంది శాండ్‌విచ్ రుచి చూడటానికి 30 నుంచి 50 నిమిషాలు వేచి ఉంటున్నారు.
అభిషేక్ సోదరుడు దీపక్ సాహు కూడా ఈ వ్యాపార నిర్వహణలో ముఖ్యమైన పాత్ర పోషిస్తున్నారు. ఇద్దరూ కలిసి కస్టమర్లు, శాండ్‌విచ్ తయారీ, రోజువారీ పనులను చూసుకుంటున్నారు. ప్రతిరోజూ తీసుకొచ్చే పదార్థాలు రాత్రికి పూర్తిగా అమ్ముడైపోతాయని దీపక్ తెలిపారు.
Also Read: వైరల్ అవుతున్న 1980 ఏఐ ఫోటో ట్రెండ్.. మీ సెల్ఫీ అప్‌లోడ్ చేస్తే ప్రమాదకరం
అభిషేక్ సాహు కథ ఓటమితో ప్రయాణం ముగియదని నిరూపిస్తోంది. కొత్త విషయాలు నేర్చుకోవడం, ధైర్యంగా ప్రయత్నించడం విజయానికి మార్గం చూపుతుంది. రూ.30 వేల అప్పు, యూట్యూబ్‌లో నేర్చుకున్న నైపుణ్యంతో ఆయన కొత్త జీవితాన్ని నిర్మించుకున్నారు. చిన్న ప్రయత్నం కూడా సరైన కృషితో పెద్ద విజయంగా మారుతుందని ఆయన కథ చెబుతోంది.
Share
కేదార్నాథ్ మార్గంలో భారీ వర్షాలు.. విరిగిపడిన కొండచరియలు-రాళ్లు, యాత్రకు అంతరాయం
ఆండ్రాయిడ్ ఫోన్లో వాయిస్ మెయిల్ ఫీచర్..యాక్టివేట్ చేసుకోండిలా
