Heavy Rain in Rayachoty: రాయచోటిలో భారీ వర్షం.. వరదలో కొట్టుకుపోయి నలుగురు

Heavy Rain in Rayachoty: అన్నమయ్య జిల్లా రాయచోటిలో కురిసిన భారీ వర్షం.. ప్రజలను భయాందోళనలకు గురి చేసింది. కొద్ది గంటల పాటు కురిసిన వానతో రోడ్లు, కాలనీలు మునిగిపోయాయి. వర్షపు నీరు ఊహించని రీతిలో ప్రవహించడంతో.. పలు చోట్ల విషాదం చోటుచేసుకుంది. వరద ముంపులో కొట్టుకుపోయి నలుగురు ప్రాణాలు కోల్పోయారు.

ఎస్ఎన్ కాలనీలో విషాదం

రాయచోటిలోని ఎస్ఎన్ కాలనీలో వర్షం వల్ల కాలువలు ఉధృతంగా ప్రవహించాయి. ఈ క్రమంలో ఓ బాలిక మురుగు కాలువలో పడిపోయి నీటిలో కొట్టుకుపోయింది. ఆమెను రక్షించ బోయి తల్లి, మరో యువకుడు కొట్టుకుపోయారు. అధికారులు, రెస్క్యూ సిబ్బంది తీవ్రంగా శ్రమించి ముగ్గురి మృతదేహాలను వెలికితీశారు.

ఆటో మునిగిన ఘటన

మరోవైపు రాయచోటిలోని మున్నిపల్ పార్క్ సమీపంలో.. రోడ్డుపై వర్షపు నీరు పెద్ద ఎత్తున చేరింది. నీటిలో ఏడుగురు ఉన్న ఆటో మునిగిపోయింది. ఆటోలో మొత్తం ఏడుగురు ప్రయాణికులు ఉండగా, ఆరుగురిని స్థానికులు కాపాడగలిగారు. అయితే ఎనిమిదేళ్ల చిన్నారి యామిని మాత్రం వరదలో కొట్టుకుపోయింది. ఆమె మృతదేహాన్ని రెస్క్యూ సిబ్బంది.. కొద్ది సేపటికి కనుగొన్నారు.

రాయచోటిలో అల్లకల్లోలం

వర్షం కారణంగా పట్టణమంతా జలమయం అయింది. ప్రధాన రహదారులపై నీరు నిలిచిపోవడంతో వాహనాల రాకపోకలు అంతరాయం కలిగాయి. విద్యుత్ సరఫరా నిలిచిపోయింది. స్థానికులు సైతం ఇళ్లలోంచి బయటకు రావడానికి భయపడే పరిస్థితి ఏర్పడింది. కాలనీల్లోని వందలాది ఇళ్లలోకి నీరు చేరింది.

రెస్క్యూ చర్యలు

అధికారులు అప్రమత్తమై వెంటనే రెస్క్యూ టీంలను రంగంలోకి దించారు. మున్సిపల్ అధికారులు, పోలీసులు, ఫైర్ సిబ్బంది కలిసి నీటిలో చిక్కుకున్న వారిని రక్షించేందుకు కృషి చేశారు. ఎన్‌డీఆర్‌ఎఫ్‌ బృందాలను కూడా పిలిపించారు. అత్యవసర పరిస్థితుల్లో ప్రజలు జాగ్రత్తలు తీసుకోవాలని, పిల్లలను నీటికి దగ్గరగా వెళ్లనీయొద్దని అధికారులు సూచించారు.

ప్రజల్లో భయం

రాయచోటిలో కురిసిన వర్షానికి ప్రజల్లో భయాందోళన నెలకొంది. ముఖ్యంగా చిన్నారులు వరదలో మృతి చెందడం స్థానికులను కన్నీటి పర్యంతం చేసింది.

మున్సిపల్ సదుపాయాలపై విమర్శలు

ఈ ప్రమాదాల తర్వాత మున్సిపల్ సదుపాయాలపై విమర్శలు వెల్లువెత్తుతున్నాయి. వర్షపు నీటిని బయటకు పంపించే డ్రైనేజ్ వ్యవస్థ సరిగా లేకపోవడం, రోడ్లపై నీరు నిలిచిపోవడం, కాలువలు శుభ్రం చేయకపోవడం వంటి సమస్యలు బయటపడ్డాయి. స్థానికులు మున్సిపల్ అధికారుల నిర్లక్ష్యాన్ని తీవ్రంగా తప్పుపడుతున్నారు.

Also Read: వీళ్ల ఆఫర్స్ చూసి టెంప్ట్ అయ్యారో.. ప్రీ లాంచ్ పేరుతో భారీ మోసం

భవిష్యత్తు చర్యలు

ప్రభుత్వం ఈ ఘటనను సీరియస్‌గా తీసుకుంది. మృతుల కుటుంబాలకు ఆర్థిక సాయం అందించేందుకు చర్యలు చేపడతామని జిల్లా అధికారులు ప్రకటించారు. అలాగే రాయచోటిలోని డ్రైనేజ్ సిస్టమ్‌ను పూర్తిగా సమీక్షించి, తక్షణ చర్యలు తీసుకోవాలని రాష్ట్ర ప్రభుత్వం ఆదేశాలు జారీ చేసింది.