Arunachal Pradesh: అరుణాచల్ ప్రదేశ్‌లో ఘోర ప్రమాదం.. 22 మంది కూలీలు మృతి

Arunachal Pradesh: అరుణాచల్ ప్రదేశ్‌లో జరిగిన ఘోర రోడ్డు ప్రమాదంలో సుమారు 22 మంది కూలీలు దుర్మరణం చెందారు. కూలీలతో వెళ్తున్న ట్రక్కు అదుపుతప్పి ప్రమాదకరమైన పర్వత రహదారిపై నుంచి జారి లోతైన లోయలో పడిపోవడంతో ఈ దారుణం చోటుచేసుకుంది. ఈ ఘటన దేశవ్యాప్తంగా విషాదం నింపింది. మృతి చెందిన కూలీలు చాలా మంది అస్సాం ప్రాంతానికి చెందినవారని సమాచారం.

సమాచారం ప్రకారం, ఈ ట్రక్కు కూలీలను ఒక ప్రాంతం నుంచి మరొక ప్రాంతానికి తరలిస్తుండగా ఈ దుర్ఘటన జరిగింది. పర్వత ప్రాంత రహదారులు అత్యంత ప్రమాదకరంగా ఉండటం, వాహనానికి సంబంధించిన సాంకేతిక లోపం లేదా డ్రైవర్ నియంత్రణ కోల్పోవడం వంటి కారణాల వల్ల ఈ ప్రమాదం జరిగి ఉండవచ్చని అధికారులు ప్రాథమికంగా భావిస్తున్నారు. ట్రక్కు లోయలో పడిపోవడంతో అందులో ప్రయాణిస్తున్న కూలీలకు తీవ్ర గాయాలై, 22 మంది అక్కడికక్కడే మరణించారు. ఈ ప్రమాదంలో ఒక కూలీ మాత్రమే ప్రాణాలతో బయటపడినట్లు అధికారులు ధృవీకరించారు. క్షతగాత్రుడిని సమీప ఆసుపత్రికి తరలించి చికిత్స అందిస్తున్నారు. రెస్క్యూ ఆపరేషన్ కొనసాగుతోందని, మృతదేహాలను వెలికితీసే ప్రక్రియ జరుగుతోందని స్థానిక యంత్రాంగం తెలిపింది.

ఈ దుర్ఘటనపై కాంగ్రెస్ నాయకులు రాహుల్ గాంధీ తీవ్ర దిగ్భ్రాంతి వ్యక్తం చేశారు. అరుణాచల్ ప్రదేశ్‌లో లోయలో ట్రక్కు బోల్తా పడి అనేక మంది అస్సామీ కార్మికులు మరణించారనే వార్త తీవ్ర బాధాకరం అని ఆయన పేర్కొన్నారు. ఈ మేరకు ఆయన ఒక ప్రకటన విడుదల చేశారు. మృతుల కుటుంబాలకు ఆయన తన ప్రగాఢ సానుభూతిని తెలియజేశారు. గల్లంతైన వారు వీలైనంత త్వరగా గుర్తించాలి. గాయపడినవారు త్వరగా కోలుకోవాలని కోరుకుంటున్నానని రాహుల్ గాంధీ ట్వీట్ చేశారు. ఈ ప్రమాదంలో మరణించిన కూలీలలో అధిక శాతం మంది పేద కుటుంబాలకు చెందినవారేనని, వారి కుటుంబాలకు ప్రభుత్వం తక్షణమే సహాయం అందించాలని పలు రాజకీయ పక్షాలు డిమాండ్ చేశాయి.

ప్రమాద స్థలంలో సహాయక చర్యలను వేగవంతం చేసేందుకు స్థానిక పోలీసులు, రాష్ట్ర విపత్తు నిర్వహణ బృందాలు (SDRF) రంగంలోకి దిగాయి. మృతుల గుర్తింపు ప్రక్రియ పూర్తయిన తర్వాత మృతదేహాలను వారి స్వగ్రామాలకు తరలించే ఏర్పాట్లు చేయనున్నట్లు అధికారులు ప్రకటించారు. ఈ ఘటనపై సమగ్ర విచారణకు ఆదేశించినట్లు సమాచారం. పర్వత ప్రాంతాల్లో ప్రయాణించే వాహనాల భద్రతా ప్రమాణాలపై మరింత నిశితంగా దృష్టి సారించాలని నిపుణులు అభిప్రాయపడుతున్నారు.

ALSO READ: Best Movie in Netflix : ప్రేమించిన అమ్మాయి ప్రైజ్ ను బజార్లో పెట్టే కిరాతకుడు… ఆమె చెప్పే గుణపాఠానికి బుర్ర బద్దలే