Fire Accident: నాంపల్లి FSLలో భారీ అగ్నిప్రమాదం.. క్లూస్ టీమ్ రిపోర్టుల పరిస్థితి ఏంటి?

Fire Accident: హైదరాబాద్ నాంపల్లి ప్రాంతంలో ఈరోజు మరో భారీ అగ్నిప్రమాదం చోటుచేసుకుంది. ఇక్కడి తెలంగాణ రాష్ట్ర ఫోరెన్సిక్ సైన్స్ ల్యాబొరేటరీ (FSL) కార్యాలయంలో అకస్మాత్తుగా మంటలు చెలరేగడంతో స్థానికంగా తీవ్ర కలకలం రేగింది. కీలకమైన దర్యాప్తు పత్రాలు, నమూనాలు ఉండే ఈ కార్యాలయంలో ప్రమాదం జరగడం ఆందోళన కలిగిస్తోంది.

కార్యాలయంలోని ఓ విభాగంలో మొదలైన మంటలు క్షణాల్లోనే మెుత్తం వ్యాపించాయి. కార్యాలయం నుండి దట్టమైన పొగలు రావడాన్ని గమనించిన సిబ్బంది వెంటనే అగ్నిమాపక శాఖకు సమాచారం అందించారు. ఈ ప్రమాదానికి గల ఖచ్చితమైన కారణాలు ఇంకా తెలియాల్సి ఉన్నప్పటికీ.. ప్రాథమికంగా షార్ట్ సర్క్యూట్ వల్ల మంటలు చెలరేగి ఉండవచ్చని భావిస్తున్నారు.

సమాచారం అందిన వెంటనే అగ్నిమాపక సిబ్బంది ఫైర్ ఇంజన్లతో ఘటనా స్థలానికి చేరుకున్నారు. మంటలు మరింత విస్తరించకుండా ఉండేందుకు వారు తీవ్రంగా శ్రమిస్తున్నారు. ప్రస్తుతం ఫైర్ సిబ్బంది మంటలను అదుపులోకి తెచ్చే ప్రయత్నాల్లో ఉన్నారు. లోపల ఎవరైనా చిక్కుకున్నారా అనే కోణంలో కూడా తనిఖీలు చేస్తున్నారు.

ఫోరెన్సిక్ ల్యాబ్‌లో రాష్ట్రవ్యాప్తంగా ఉన్న వివిధ కేసులకు సంబంధించిన కీలక ఆధారాలు, కెమికల్స్ , రిపోర్టులు ఉంటాయి. ఈ ప్రమాదం వల్ల ఏవైనా కీలకమైన రికార్డులు కాలిబూడిదయ్యాయా అనే కోణంలో అధికారులు ఆందోళన వ్యక్తం చేస్తున్నారు. పోలీసులు కేసు నమోదు చేసుకుని దర్యాప్తు ప్రారంభించారు.

Also Read: కేకే కుమారుడికి బెదిరింపు కాల్స్.. రూ. 3 కోట్లు డిమాండ్.. అసలేం జరిగింది?