Sangareddy Crime: కోతులను తప్పించబోయి చెరువులో పడ్డ ఆటో.. ఒకరు మృతి, పలువురికి తీవ్ర గాయాలు

సంగారెడ్డి జిల్లాలోని ఆందోల్ మండలంలో శనివారం ఘోర ప్రమాదం చోటుచేసుకుంది. కోతుల గుంపును తప్పించబోయి ఒక ఆటో అదుపుతప్పి అన్నాసాగర్ చెరువులో పడిపోయింది. ఈ ప్రమాదంలో ఒకరు ప్రాణాలు కోల్పోగా, డ్రైవర్ తీవ్ర గాయాలతో బయటపడ్డారు. ఈ ఘటనకు సంబంధించిన  పూర్తి వివరాలు ఇలా ఉన్నాయి.

స్థానికుల సమాచారం ప్రకారం.. జమ్మికుంట గ్రామం నుండి ఒక ఆటో ప్రయాణికులతో కలిసి జోగిపేట వైపు వెళ్తోంది. ఆటో ఆందోల్ మండలంలోని అన్నాసాగర్ చెరువు కట్టపైకి రాగానే.. ఒక్కసారిగా కోతుల గుంపు రోడ్డుకు అడ్డంగా వచ్చింది. వేగంగా వస్తున్న ఆటో డ్రైవర్, ఆ కోతులను తప్పించే క్రమంలో స్టీరింగ్‌ను అకస్మాత్తుగా పక్కకు తిప్పాడు. దీంతో నియంత్రణ కోల్పోయిన ఆటో నేరుగా చెరువులోకి దూసుకెళ్లింది.

ఒకరి మృతి – డ్రైవర్‌కు గాయాలు.. 

ఈ ప్రమాద సమయంలో ఆటోలో ఉన్న జమ్మికుంట గ్రామానికి చెందిన విజయ రావు (55) అనే వ్యక్తి తీవ్ర గాయాలపాలై అక్కడికక్కడే మృతి చెందారు. ఆటో డ్రైవర్ స్వల్ప గాయాలతో ప్రాణాపాయం నుండి బయటపడ్డారు. ప్రమాదాన్ని గమనించిన స్థానికులు వెంటనే అక్కడికి చేరుకుని రక్షణ చర్యలు చేపట్టారు. సమాచారం అందుకున్న పోలీసులు ఘటన స్థలానికి చేరుకుని కేసు నమోదు చేసుకున్నారు. విజయ రావు మృతదేహాన్ని పోస్టుమార్టం నిమిత్తం ఆసుపత్రికి తరలించారు.

ఈ ఘటనతో జమ్మికుంట గ్రామంలో విషాద ఛాయలు అలముకున్నాయి. చెరువు కట్టలపై ప్రయాణించేటప్పుడు అడవి జంతువులు, కోతుల పట్ల వాహనదారులు అప్రమత్తంగా ఉండాలని పోలీసులు సూచిస్తున్నారు.

ALSO READ: CP Sajjanar: సోషల్ మీడియాలో కొత్త పరిచయాలు వద్దు! సీపీ సజ్జనార్ కీలక వ్యాఖ్యలు