Iran War: ఇరాన్ వినాశనం ఖాయం.. నాయకత్వం కుప్పకూలింది.. డొనాల్డ్ ట్రంప్ కీలక వ్యాఖ్యలు

Iran War: అమెరికా అధ్యక్షుడు డొనాల్డ్ ట్రంప్ ఇరాన్‌తో జరుగుతున్న ప్రస్తుత సైనిక ఘర్షణపై అత్యంత కీలకమైన ప్రకటన చేశారు. వైట్ హౌస్ వేదికగా మీడియా ప్రతినిధులతో మాట్లాడిన ఆయన, ఈ యుద్ధంలో అమెరికా సేనలు సాధించిన విజయాలను ఏకరువు పెట్టారు. ఇరాన్‌పై చేపట్టిన దాడుల్లో అమెరికాదే పూర్తి పైచేయి అని, ఆ దేశ సైనిక సామర్థ్యాన్ని దాదాపుగా తుడిచిపెట్టేశామని ట్రంప్ ధీమా వ్యక్తం చేశారు. గత కొన్ని వారాలుగా సాగుతున్న ఆపరేషన్లలో ఇరాన్ కోలుకోలేనంతగా దెబ్బతిన్నదని ఆయన విశ్లేషించారు.

ట్రంప్ వ్యాఖ్యల ప్రకారం.. అమెరికా బలగాలు ఇరాన్ నావికాదళం (Navy), వాయుసేన (Air Force), కమ్యూనికేషన్ వ్యవస్థలను లక్ష్యంగా చేసుకుని విరుచుకుపడ్డాయి. ఈ దాడుల ఫలితంగా ఇరాన్ నౌకలు దాదాపుగా ధ్వంసమయ్యాయని, వారి గగనతల రక్షణ వ్యవస్థలు పూర్తిగా నిర్వీర్యమయ్యాయని ఆయన వెల్లడించారు. ముఖ్యంగా కమ్యూనికేషన్ నెట్‌వర్క్‌లను విచ్ఛిన్నం చేయడం ద్వారా ఇరాన్ సైన్యం మధ్య సమన్వయం లేకుండా చేశామని, తద్వారా ఆ దేశం ప్రతిఘటించే శక్తిని కోల్పోయిందని ట్రంప్ వివరించారు.

ప్రస్తుతం ఇరాన్ గగనతలంలో అమెరికా యుద్ధ విమానాలు ఎటువంటి అడ్డంకులు లేకుండా స్వేచ్ఛగా విహరిస్తున్నాయని ట్రంప్ పేర్కొన్నారు. ఇరాన్ వైమానిక దళం నామమాత్రంగా కూడా పోటీ ఇచ్చే పరిస్థితిలో లేదని, అక్కడి ఆకాశం ఇప్పుడు పూర్తిగా అమెరికా దళాల నియంత్రణలో ఉందని ఆయన స్పష్టం చేశారు. “ఇరాన్ పాలకుల పట్టు సడలింది, వారి నాయకత్వం ఇప్పుడు అత్యంత బలహీనంగా ఉంది” అని వ్యాఖ్యానిస్తూ, యుద్ధ క్షేత్రంలో తాము సాధించిన వ్యూహాత్మక ఆధిక్యాన్ని ఆయన నొక్కి చెప్పారు.

మరోవైపు, ఇరాన్ నాయకత్వం సంధి కోసం తీవ్రంగా ప్రయత్నిస్తోందని ట్రంప్ ఆసక్తికర వ్యాఖ్యలు చేశారు. తాము యుద్ధాన్ని ముగించేందుకు సిద్ధంగా ఉన్నామని, చర్చల కోసం ఇరాన్ నుంచి ప్రతిపాదనలు అందుతున్నాయని ఆయన తెలిపారు. ఇరాన్ ఆర్థిక, ఇంధన వనరులపై కూడా పట్టు సాధించామని, అగ్రరాజ్యం నిర్దేశించిన నిబంధనలకు వారు లోబడి రాక తప్పని పరిస్థితి నెలకొందని ఆయన అభిప్రాయపడ్డారు. ఈ క్రమంలోనే కొన్ని ఇంధన కేంద్రాలపై దాడులను తాత్కాలికంగా వాయిదా వేసినట్లు కూడా ఆయన సూచించారు.

Also Read: ఇరాన్ ‘కోటి’ నోటు వెనుక అసలు కథ! ఒక నోటుతో కనీసం అర కిలో మటన్ కూడా రాదా?

చివరగా, ఇరాన్ అణ్వాయుధ సామర్థ్యాన్ని సాధించకుండా అడ్డుకోవడమే తమ ప్రధాన లక్ష్యమని ట్రంప్ పునరుద్ఘాటించారు. “అమెరికా సైన్యం ప్రపంచంలోనే అత్యంత శక్తివంతమైనది, ఆ శక్తిని ఉపయోగించి మధ్యప్రాచ్యంలో శాంతిని నెలకొల్పుతాం” అని ఆయన ప్రకటించారు. ప్రస్తుతం ఇరాన్‌లో నెలకొన్న అనిశ్చితి వల్ల త్వరలోనే అక్కడి పరిస్థితులు మారిపోతాయని, అమెరికా ప్రయోజనాలకు అనుగుణంగా ఒక కొత్త ఒప్పందం కుదురుతుందని ఆయన ఆశాభావం వ్యక్తం చేశారు.

యుద్ధంపై డొనాల్డ్ ట్రంప్ కీలక వ్యాఖ్యలు

ఇరాన్‌తో జరుగుతున్న యుద్ధంలో తమదే పైచేయి అని ప్రకటించిన అమెరికా అధ్యక్షుడు ట్రంప్

ఇరాన్ నావికాదళం, వాయుసేన, కమ్యూనికేషన్ వ్యవస్థలను అమెరికా దళాలు పూర్తిగా ధ్వంసం చేశాయని వెల్లడి

ప్రస్తుతం ఇరాన్ గగనతలంలో తమ విమానాలు స్వేచ్ఛగా… pic.twitter.com/IWrxB8gR57

— BIG TV Breaking News (@bigtvtelugu) March 25, 2026