Skin care: ఖరీదైన క్రీములు అవసరమే లేదు ? స్కిన్ కేర్ రొటీన్‌కు ఇవే బెస్ట్

Skincare: స్కిన్ కేర్ విషయంలో మన చుట్టూ ఎన్నో అపోహలు ఉన్నాయి. సోషల్ మీడియాలో చూసే ప్రతి చిట్కా అందరికీ పనికిరాదు. కొందరు ఖరీదైన ఉత్పత్తులు వాడితేనే అందం పెరుగుతుందని భావిస్తే.. మరికొందరు సహజ సిద్ధమైనవన్నీ సురక్షితమని నమ్ముతుంటారు. వాస్తవానికి.. చర్మం యొక్క తత్వం తెలియకుండా చేసే ప్రయోగాలు మేలు కంటే కీడే ఎక్కువ చేస్తాయి. ఏది నిజం. ఏది అపోహ అనే స్పష్టత ఉంటేనే.. మనం ఆరోగ్యవంతమైన చర్మాన్ని పొందగలం. ఇందుకు సంబంధించిన పూర్తి వివరాలను ఇప్పుడు తెలుసుకుందాం.

స్కిన్ కేర్: అపోహలు, వాస్తవాలు
చర్మంపై అవగాహన లేకపోవడం వల్ల మనం చేసే చిన్న చిన్న తప్పులు పెద్ద సమస్యలకు దారి తీస్తాయి. అపోహలను పక్కన పెట్టి, నిజంగా మార్పు తెచ్చే ఆ 7 చిట్కాలు ఇవే..

1. జిడ్డు చర్మం ఉన్నవారికి మాయిశ్చరైజర్ అవసరం లేదు.
నిజం: ఇది చాలా పెద్ద తప్పు. జిడ్డు చర్మానికి కూడా తేమ అవసరం. మీరు మాయిశ్చరైజర్ రాయకపోతే.. చర్మం పొడిబారిపోయిందని భావించి మెదడు మరింత ఎక్కువ సెబమ్ (జిడ్డు)ను ఉత్పత్తి చేస్తుంది. కాబట్టి.. జిడ్డు చర్మం ఉన్నవారు ‘ఆయిల్-ఫ్రీ’ లేదా ‘జెల్ బేస్డ్’ మాయిశ్చరైజర్ తప్పక వాడాలి.

2. అపోహ: ఎండ లేనప్పుడు సన్‌స్క్రీన్ అక్కర్లేదు.
నిజం: ఆకాశం మేఘావృతమై ఉన్నా లేదా మీరు ఇంట్లోనే ఉన్నా సూర్యుడి నుంచి వచ్చే UV కిరణాలు చర్మాన్ని దెబ్బతీస్తాయి. ఇవి కిటికీల గుండా కూడా ప్రవేశిస్తాయి. చర్మంపై ముడతలు, మచ్చలు రాకుండా ఉండాలంటే.. ప్రతి రోజూ కనీసం SPF 30 ఉన్న సన్‌స్క్రీన్ వాడటం తప్పనిసరి.

3. అపోహ: చర్మం బాగా మెరవాలంటే తరచుగా స్క్రబ్బింగ్ చేయాలి.
నిజం: అతిగా స్క్రబ్బింగ్ చేయడం వల్ల చర్మంపై ఉండే సహజసిద్ధమైన రక్షణ పొర దెబ్బతింటుంది. దీని వల్ల చర్మం ఎర్రబడటం లేదా చిన్న చిన్న రంధ్రాలు ఏర్పడటం జరుగుతుంది. వారానికి ఒకటి లేదా రెండు సార్లు మాత్రమే మృదువైన ఎక్స్‌ఫోలియేషన్ సరిపోతుంది.

4. అపోహ: ఖరీదైన ఉత్పత్తులు మాత్రమే మెరుగైన ఫలితాలను ఇస్తాయి.
నిజం: ఒక ఉత్పత్తి యొక్క ధర దాని నాణ్యతను నిర్ణయించదు. ఆ ఉత్పత్తుల్లో వాడే ‘యాక్టివ్ ఇంగ్రిడియంట్స్’ (ఉదాహరణకు విటమిన్ C, రెటినోల్, హైలురోనిక్ యాసిడ్) ముఖ్యం. తక్కువ ధరలో దొరికే ఫార్మసీ ప్రొడక్ట్స్ కూడా అద్భుతంగా పనిచేస్తాయి.

5. అపోహ: మొటిమలు వస్తే టూత్‌పేస్ట్ రాస్తే తగ్గిపోతాయి.
నిజం: టూత్‌పేస్ట్‌లో ఉండే సోడియం లారిల్ సల్ఫేట్ వంటి రసాయనాలు మొటిమను ఎండబెట్టవచ్చు కానీ.. అవి చర్మాన్ని కాల్చివేసి శాశ్వత మచ్చలను మిగిలిస్తాయి. మొటిమల కోసం సెల్యులిక్ యాసిడ్ ఉన్న క్రీములను వాడటం సురక్షితం.

6. అపోహ: సహజమైనవి అన్నీ సురక్షితమైనవి.
నిజం: నిమ్మరసం నేరుగా ముఖానికి రాస్తే.. అందులోని సిట్రిక్ యాసిడ్ చర్మాన్ని సెన్సిటివ్ గా మారుస్తుంది. అలాగే.. వంటగదిలోని కొన్ని పదార్థాలు అందరికీ పడకపోవచ్చు. నేచురల్ ప్రొడక్ట్స్ అయినా సరే ‘ప్యాచ్ టెస్ట్’ చేసిన తర్వాతే వాడాలి.

Also Read: నిద్ర నాణ్యతను పెంచే ప్రాచీన ఆయుర్వేద అలవాట్లు.. వీటితో బెస్ట్ రిజల్ట్

7. అపోహ: వేడి నీళ్లతో ముఖం కడిగితే రంధ్రాలు తెరుచుకుంటాయి.
నిజం: రంధ్రాలు తలుపుల లాగా తెరుచుకోవడం, మూసుకోవడం జరగదు. వేడి నీళ్లు చర్మంలోని సహజ నూనెలను తొలగించి.. చర్మాన్ని పొడి బారుస్తాయి. ముఖం కడగడానికి ఎప్పుడూ గోరు వెచ్చని లేదా చల్లని నీటిని మాత్రమే ఉపయోగించాలి.

స్కిన్ కేర్ అనేది కేవలం పైపైన రాసే క్రీముల మీద మాత్రమే ఆధారపడి ఉండదు. సరైన నిద్ర, తగినంత నీరు, పౌష్టికాహారం కూడా తోడైనప్పుడే నిజమైన అందం మీ ముఖంలో కనిపిస్తుంది. ప్రకటనలు చూసి మోసపోకుండా.. మీ చర్మం తత్వాన్ని బట్టి సరైన నిర్ణయాలు తీసుకోండి.