ఆరోగ్యానికి సూచిక శరీర బరువు కాదు.. ఊబకాయం కొలిచేందుకు కొత్త ఫార్ములా

Obesity Health| చాలా సంవత్సరాలుగా ఊబకాయం అంచనా వేయడానికి బాడీ మాస్ ఇండెక్స్ (బిఎంఐ)ను ఉపయోగిస్తున్నారు. అయితే ప్రస్తుతం ఆరోగ్య నిపుణులు బిఎంఐ ఒక్కటే సరిపోదని చెబుతున్నారు. ఎందుకంటే సాధారణ బిఎంఐ ఉన్నవారిలో కూడా పొట్ట చుట్టూ అధిక కొవ్వు ఉండే అవకాశం ఉంది. ఈ కొవ్వు భవిష్యత్తులో అనేక తీవ్రమైన ఆరోగ్య సమస్యలకు కారణమవుతుంది.

కానీ ఇప్పుడు కొత్తగా వ్యక్తి బరువు, ఎత్తు ఆధారంగా అతని ఆరోగ్యంగా ఉన్నాడా లేదా తెలుసుకోవచ్చు. అతను సాధారణ బరువులో ఉన్నాడా, అధిక బరువుతో ఉన్నాడా లేదా ఊబకాయంతో ఉన్నాడా అనే విషయాన్ని వైద్యులు నిర్ణయిస్తారు.

బిఎంఐ ఎందుకు సరిపోదు?

బిఎంఐ లెక్కించడానికి వ్యక్తి బరువును అతని ఎత్తు చదరంతో భాగిస్తారు. ఈ పద్ధతి సులభంగా ఉండటంతో ప్రపంచవ్యాప్తంగా విస్తృతంగా ఉపయోగిస్తున్నారు.
అయితే బిఎంఐ శరీరంలో ఉన్న కండరాలు, కొవ్వు మధ్య తేడాను గుర్తించలేదు. ఉదాహరణకు క్రీడాకారుల్లో కండరాల పరిమాణం ఎక్కువగా ఉంటుంది. అందువల్ల వారి బిఎంఐ ఎక్కువగా కనిపించవచ్చు. కానీ వారి శరీరంలో అధిక కొవ్వు ఉండకపోవచ్చు.
అదే సమయంలో సాధారణ బిఎంఐ ఉన్న వ్యక్తిలో పొట్ట చుట్టూ ఎక్కువ కొవ్వు ఉండవచ్చు. అలాంటి వ్యక్తికి కూడా గుండెజబ్బులు, మధుమేహం వంటి వ్యాధుల ప్రమాదం ఎక్కువగా ఉంటుంది.

నడుము..ఎత్తు నిష్పత్తి ఎందుకు ముఖ్యం?

ఈ సమస్యను దృష్టిలో ఉంచుకుని కేంద్ర ఆరోగ్య మంత్రిత్వ శాఖ పాఠశాలల్లో పిల్లల ఆరోగ్య పరీక్షల సమయంలో నడుము – ఎత్తు నిష్పత్తిని కూడా పరిశీలించాలని సూచించింది.
ఈ పద్ధతి ముఖ్యంగా పొట్ట చుట్టూ పేరుకుపోయిన కొవ్వును గుర్తించడంలో మరింత ఉపయోగపడుతుంది. అందువల్ల భవిష్యత్తులో వచ్చే ఆరోగ్య ప్రమాదాలను ముందుగానే అంచనా వేయవచ్చు.

పొట్ట చుట్టూ కొవ్వు ఎందుకు ప్రమాదకరం?

ఆరోగ్య నిపుణుల ప్రకారం.. పొట్ట చుట్టూ పేరుకుపోయిన కొవ్వు శరీరంలోని కాలేయం, ప్యాంక్రియాస్, పేగుల వంటి ముఖ్యమైన అవయవాల చుట్టూ చేరుతుంది.
దీని వల్ల శరీరంలో వాపు పెరిగే అవకాశం ఉంటుంది. అలాగే ఇన్సులిన్ సరిగా పనిచేయకుండా ఇన్సులిన్ రెసిస్టెన్స్ ఏర్పడుతుంది.
దీని కారణంగా అధిక రక్తపోటు, అధిక కొలెస్ట్రాల్, టైప్ 2 డయాబెటీస్, గుండెజబ్బులు, స్ట్రోక్ వచ్చే ప్రమాదం పెరుగుతుంది.

నడుము – ఎత్తు నిష్పత్తిని ఎలా లెక్కించాలి?

ఈ నిష్పత్తిని తెలుసుకోవడం చాలా సులభం. ముందుగా నడుము కొలత, ఎత్తును ఒకే యూనిట్‌లో కొలవాలి. సాధారణంగా సెంటీమీటర్లలో కొలవడం మంచిది. తర్వాత నడుము కొలతను ఎత్తుతో భాగిస్తే నడుము-ఎత్తు నిష్పత్తి వస్తుంది.
నిపుణుల సూచన ప్రకారం.. నడుము కొలత మొత్తం ఎత్తులో సగం కంటే తక్కువగా ఉండాలి. ఉదాహరణకు ఒక వ్యక్తి ఎత్తు 170 సెంటీమీటర్లు అయితే, అతని నడుము కొలత 85 సెంటీమీటర్ల కంటే తక్కువగా ఉండడం మంచిది.

తగ్గని బిఎంఐ ప్రాధాన్యం

నిపుణులు బిఎంఐని పూర్తిగా పక్కన పెట్టాలని చెప్పడం లేదు. పెద్ద సంఖ్యలో ప్రజల్లో స్థూలకాయాన్ని గుర్తించడానికి బిఎంఐ ఇప్పటికీ ఉపయోగకరమైన పద్ధతే. అయితే బిఎంఐతో పాటు నడుము – ఎత్తు నిష్పత్తిని కూడా పరిశీలిస్తే ఆరోగ్య పరిస్థితిని మరింత కచ్చితంగా అంచనా వేయవచ్చు.

Also Read: మతిమరుపు సమస్యతో బాధపడుతున్నారా? ఈ ఫుడ్స్ తింటే సూపర్ ఫాస్ట్ జ్ఞాపకశక్తి

ఇతర ఆరోగ్య సూచికలు కూడా ముఖ్యమే

వ్యక్తి ఆరోగ్యాన్ని కేవలం బరువు లేదా నడుము కొలతతో మాత్రమే నిర్ణయించలేమని వైద్యులు చెబుతున్నారు. రక్తపోటు, రక్తంలో షుగర్ లెవెల్స్, కొలెస్ట్రాల్, ఆహారపు అలవాట్లు, రోజువారీ వ్యాయామం, కుటుంబంలో ఉన్న వ్యాధుల చరిత్ర, జీవనశైలి వంటి అంశాలను కూడా తప్పనిసరిగా పరిశీలించాలి.

ఈ అన్ని అంశాలను కలిపి పరిశీలించినప్పుడే వ్యక్తి ఆరోగ్యంపై స్పష్టమైన అవగాహన లభిస్తుంది.

గమనిక: ఈ సమాచారం ఆరోగ్య అవగాహన కోసం మాత్రమే. ఇది వైద్య సలహాకు ప్రత్యామ్నాయం కాదు. ఆరోగ్య సమస్యల కోసం తప్పనిసరిగా వైద్య నిపుణులను సంప్రదించండి.