రోజుకు 6 గంటల కంటే తక్కువ నిద్రపోతున్నారా? బరువు పెరగడానికి ఇదే కారణం.. ఎలాగంటే

Sleep deprivation and weight gain| చాలామంది బరువు తగ్గాలంటే ఆహారం, వ్యాయామం మాత్రమే ముఖ్యమని భావిస్తారు. కానీ మంచి నిద్ర కూడా అంతే అవసరం. నిపుణుల ప్రకారం.. ప్రతి రోజూ 6 గంటల కంటే తక్కువ నిద్రపోతే బరువు పెరిగే ప్రమాదం పెరుగుతుంది. సరిపడా నిద్ర లేకపోతే శరీరంలోని హార్మోన్లు, జీవక్రియలు ప్రభావితమవుతాయి. దీనివల్ల బరువు నియంత్రించడానికి కష్టమవుతుంది.

శరీర బరువును నిద్ర ఎలా ప్రభావితం చేస్తుంది?

రిటైర్డ్ రిమ్స్ వైద్యుడు డాక్టర్ విద్యాపతి ప్రకారం.. మంచి నిద్ర శరీరంలోని అనేక ముఖ్యమైన పనులను సక్రమంగా నిర్వహించడంలో సహాయపడుతుంది. ఇది హార్మోన్ల సమతుల్యతను కాపాడుతుంది. శరీర కణాల మరమ్మత్తుకు కూడా ఉపయోగపడుతుంది. ప్రతిరోజూ 6 గంటల కంటే తక్కువ నిద్రపోతే శరీరంలో మార్పులు మొదలవుతాయి. ఈ మార్పులు క్రమంగా బరువు పెరగడానికి దారితీయవచ్చు.

తక్కువ నిద్రతో ఆకలి ఇంకా పెరుగుతుంది

నిద్ర తక్కువగా ఉండటం వల్ల ఆకలిని నియంత్రించే హార్మోన్లు ప్రభావితమవుతాయి. ఆకలిని పెంచే ఘ్రెలిన్ హార్మోన్ లెవెల్స్ తీవ్రంగా పెరిగే అవకాశం ఉంది. అదే సమయంలో కడుపు నిండిందని మెదడుకు చెప్పే లెప్టిన్ హార్మోన్ తగ్గుతుంది. ఫలితంగా అవసరానికి మించి తినే అవకాశం పెరుగుతుంది.

జంక్ ఫుడ్ తినాలనే కోరిక పెరుగుతుంది

నిద్ర సరిగా లేకపోతే స్వీట్స్, వేయించిన ఆహారం, అధిక కేలరీలున్న ఫుడ్స్ తినాలనే కోరిక ఎక్కువ అవుతుంది. ఇవి శరీరానికి అదనపు కేలరీలను అందిస్తాయి. తరచూ ఇలాంటి ఆహారం తీసుకోవడం వల్ల బరువు క్రమంగా పెరుగుతుంది.

Also Read: అదృష్టాన్ని కాదు కష్టాన్ని నమ్ముతారు.. ఈ తేదీల్లో పుట్టినవారు విధితో పోరాడి విజయం సాధిస్తారు

జీవక్రియ మందగిస్తుంది

శరీరం కేలరీలను ఎంత వేగంగా ఖర్చు చేస్తుందో జీవక్రియ నిర్ణయిస్తుంది. సరిపడా నిద్ర లేకపోతే ఈ ప్రక్రియ నెమ్మదిస్తుంది. దీంతో కేలరీలు తక్కువగా ఖర్చవుతాయి. మిగిలిన శక్తి కొవ్వుగా నిల్వ అవుతుంది. ఇది బరువు పెరగడానికి కారణమవుతుంది.

రక్తంలో షుగర్ లెవెల్స్‌పై ప్రభావం

మంచి నిద్ర రక్తంలో చక్కెర నియంత్రణకు కూడా అవసరం. నిద్ర తక్కువగా ఉంటే ఇన్సులిన్ సరిగా పనిచేయకపోవచ్చు. దీని వల్ల రక్తంలో షుగర్ లెవెల్స్ పెరిగే అవకాశం ఉంటుంది. దీర్ఘకాలంలో టైప్ 2 డయాబెటీస్ వచ్చే ప్రమాదం కూడా పెరుగుతుంది.

అలసట వల్ల శారీరక శ్రమ తగ్గుతుంది

తక్కువ నిద్రపోయిన రోజుల్లో చాలామందికి అలసటగా అనిపిస్తుంది. దీంతో నడక, వ్యాయామం లేదా ఇతర శారీరక కార్యకలాపాలపై ఆసక్తి తగ్గుతుంది. శరీరం తక్కువ కేలరీలు ఖర్చు చేస్తుంది. ఇది కూడా బరువు పెరగడానికి ఒక కారణం అవుతుంది.

రోజుకు ఎంతసేపు నిద్రపోవాలి?

నిపుణులు ప్రతిరోజూ 7 నుంచి 9 గంటల మంచి నాణ్యమైన నిద్ర తీసుకోవాలని సూచిస్తున్నారు. సరిపడా నిద్ర హార్మోన్ల సమతుల్యతను కాపాడుతుంది. జీవక్రియను మెరుగుపరుస్తుంది. ఎనర్జీ పెంచి బరువును నియంత్రించడంలో సహాయపడుతుంది.

Also Read: స్నేహితులు దూరంగా ఉన్నారా? ఫ్రెండ్ షిప్ డే సెలెబ్రేట్ చేసుకునేందుకు క్రియేటివ్ ఐడియాలు ఇవిగో

మంచి నిద్ర కోసం పాటించాల్సిన అలవాట్లు

ప్రతిరోజూ ఒకే సమయానికి నిద్రపోవడం, లేవడం అలవాటు చేసుకోండి. పడుకునే గంట ముందు మొబైల్, ల్యాప్‌టాప్ వినియోగాన్ని తగ్గించండి. సాయంత్రం తర్వాత టీ, కాఫీ, ఎనర్జీ డ్రింక్స్ తీసుకోవద్దు. రాత్రి తేలికపాటి భోజనం చేయండి. పడకగదిని నిశ్శబ్దంగా, చీకటిగా, సౌకర్యవంతంగా ఉంచండి.

రోజుకు 6 గంటల కంటే తక్కువ నిద్రపోవడం వల్ల బరువు పెరిగే ప్రమాదం పెరగవచ్చు. ఇది ఆకలి, జీవక్రియ, రక్తంలో చక్కెర నియంత్రణ, శారీరక చురుకుదనాన్ని ప్రభావితం చేస్తుంది. కాబట్టి బరువును నియంత్రించాలంటే ఆరోగ్యకరమైన ఆహారం, క్రమం తప్పని వ్యాయామంతో పాటు ప్రతిరోజూ 7 నుంచి 9 గంటల నాణ్యమైన నిద్ర కూడా తప్పనిసరిగా తీసుకోవాలి.