దగ్గు, జలుబు మందులపై ఆంక్షలు విధించిన కేంద్రం.. పిల్లలకు కఫ్ సిరప్ ఇచ్చే ముందు ఇది తెలుసుకోవాలి

Cough Syrup Kids| చిన్న పిల్లలకు ఉపయోగించే కొన్ని దగ్గు, జలుబు మందుల విషయంలో కేంద్ర ప్రభుత్వం నిబంధనలను మరింత కఠినతరం చేసింది. క్లోర్ఫెనిరమైన్ మేలియేట్, ఫెనైలెఫ్రిన్ హైడ్రోక్లోరైడ్ కలిగిన కొన్ని మందులపై కేంద్రం తాజాగా ఆంక్షలు విధించింది. ఈ రెండు పదార్థాలు కలిగిన ఫిక్స్‌డ్ డోస్ కాంబినేషన్ మందులు పిల్లలకు ఇచ్చే ముందు కొన్ని జాగ్రత్తలు పాటించాలి. మందుల తయారీదారులు ప్యాకెట్లపై ఈ వయసు పిల్లలకు ఉపయోగించకూడదనే హెచ్చరికను స్పష్టంగా ముద్రించాలి.

కొత్త నిబంధన ఏ మందులకు వర్తిస్తుంది?

తాజా ఆంక్షలు క్లోర్ఫెనిరమైన్ మేలియేట్, ఫెనైలెఫ్రిన్ హైడ్రోక్లోరైడ్ కలయిక ఉన్న మందులకు వర్తిస్తాయి. క్లోర్ఫెనిరమైన్ ఒక యాంటీహిస్టమైన్‌గా పనిచేసి అలర్జీ లక్షణాలను తగ్గించడంలో సహాయపడుతుంది. ఫెనైలెఫ్రిన్ డీకంజెస్టెంట్‌గా పనిచేసి ముక్కు దిబ్బడను తగ్గించడానికి ఉపయోగిస్తారు. ఈ పదార్థాలను ముక్కు కారడం, తుమ్ములు, ముక్కు దిబ్బడ వంటి లక్షణాల కోసం కొన్ని మందుల్లో ఉపయోగిస్తారు. అయితే చిన్న పిల్లల్లో వీటి వల్ల ప్రమాదాలు ఉండవచ్చని నిపుణులు గుర్తించారు. అందుబాటులో సురక్షితమైన ప్రత్యామ్నాయాలు ఉన్నాయని కూడా అధికారులు పేర్కొన్నారు.

కఫ్ సిరప్‌లన్నింటిపై నిషేధం లేదు

తల్లిదండ్రులు ఒక ముఖ్యమైన విషయాన్ని గుర్తుంచుకోవాలి. ఈ తాజా నిర్ణయం నాలుగేళ్లలోపు పిల్లలకు అన్ని దగ్గు మందులను (కఫ్ సిరప్‌లు) నిషేధించలేదు. కేవలం క్లోర్ఫెనిరమైన్, ఫెనైలెఫ్రిన్ కలయిక ఉన్న నిర్దిష్ట మందులపై ఆంక్షలు విధించారు. అందువల్ల మందు బ్రాండ్ పేరును మాత్రమే చూసి నిర్ణయం తీసుకోకూడదు. మందులో ఉన్న యాక్టివ్ ఇంగ్రిడియెంట్స్‌ను తప్పనిసరిగా పరిశీలించాలి.

దగ్గు మందులపై ప్రభుత్వం సీరియస్

ఇటీవలి కాలంలో దగ్గు సిరప్‌ల భద్రతపై అనేక ఆందోళనలు వెలువడ్డాయి. 2025లో మధ్యప్రదేశ్‌లో కలుషితమైన దగ్గు సిరప్ తీసుకున్న పిల్లలు మరణించిన ఘటనలు నమోదయ్యాయి. ఈ ఘటనలు.. మందుల తయారీ, నాణ్యత పరీక్షలు, నిల్వ విధానాలపై ప్రశ్నలు లేవనెత్తాయి. ప్రపంచ ఆరోగ్య సంస్థ కూడా కొన్ని కలుషితమైన లిక్విడ్ మందులపై మెడికల్ ప్రొడక్ట్ అలర్ట్ జారీ చేసింది. వాటిలో డైఎథిలీన్ గ్లైకాల్ అనే విషపూరిత రసాయనం ఉన్నట్లు గుర్తించారు. ఈ పదార్థం తీవ్రమైన కిడ్నీ నష్టానికి దారితీయవచ్చు.

2025, 2026లో మరిన్ని నిబంధనలు వచ్చాయి

2025 అక్టోబర్‌లో రెండేళ్లలోపు పిల్లలకు దగ్గు, జలుబు మందులు ఇవ్వకూడదని ఆరోగ్య అధికారులు సూచించారు. ఐదేళ్లలోపు పిల్లలకు కూడా ఇటువంటి మందుల విషయంలో జాగ్రత్త వహించాలని సూచించారు. 2026 జనవరిలో ఎథిలీన్ గ్లైకాల్ గుర్తించడంతో తమిళనాడు ఆల్మండ్ కిట్ దగ్గు సిరప్‌పై నిషేధం విధించింది. 2026 జూన్‌లో సిరప్ మందులకు ఉన్న కొన్ని ఓవర్ ది కౌంటర్ సడలింపులను కేంద్రం తొలగించింది. దీంతో సిరప్ మందుల విక్రయంపై నియంత్రణలు మరింత పెరిగాయి. తాజాగా ఇప్పుడు ప్రభుత్వ సూచనల ప్రకారం.. నాలుగేళ్లలోపు పిల్లలకు కఫ్ సిరప్ ఇవ్వకూడదు.

దగ్గు సమస్య ఉంటే పిల్లలకు మందులు ఇవ్వడం తప్పనిసరి కాదు

పిల్లలకు వచ్చే ప్రతి దగ్గుకు కఫ్ సిరప్ ఇవ్వాల్సిన అవసరం లేదు. చాలాసార్లు వైరల్ శ్వాసకోశ ఇన్ఫెక్షన్ల కారణంగా దగ్గు సమస్య వస్తుంది. ఇలాంటి దగ్గు.. ప్రత్యేక మందులు లేకుండానే క్రమంగా తగ్గే అవకాశం ఉంటుంది. దగ్గు మందులు (కఫ్ సిరప్) తీసుకుంటే సాధారణంగా ఈ సమస్య తాత్కాలికంగా తగ్గిపోతుంది. అవి దగ్గుకు కారణమైన ఇన్ఫెక్షన్‌ని నేరుగా నయం చేయవు.

Also Read: మలబద్ధకం సమస్యకు అసలు మూలం ఇదే.. ఈ ఫుడ్స్ తింటే సమస్య ఫినిష్

తల్లిదండ్రులు ఈ విషయాలను తప్పక గుర్తుంచుకోవాలి

నాలుగేళ్లలోపు పిల్లలకు క్లోర్ఫెనిరమైన్, ఫెనైలెఫ్రిన్ కలయిక ఉన్న మందులు ఇవ్వకూడదు. డాక్టర్ సలహా లేకుండా పిల్లలకు దగ్గు లేదా జలుబు మందులు ఇవ్వడం మంచిది కాదు. ఇతర పిల్లలకు ఇచ్చిన మందులను చూసి మీ పిల్లలకు అదే మందు ఇవ్వకండి. పిల్లల వయసు, బరువు, లక్షణాలు, ఆరోగ్య పరిస్థితులను బట్టి చికిత్స మారవచ్చు. శ్వాస తీసుకోవడంలో ఇబ్బంది, తీవ్రమైన జ్వరం, నీరసం, డీహైడ్రేషన్ లేదా లక్షణాలు పెరగడం కనిపిస్తే వెంటనే వైద్యుడిని సంప్రదించాలి.