Dandruff: చలికాలంలో చుండ్రు ఎందుకు ఎక్కువగా పడుతుంది? మన తప్పులే కారణమా?

చుండ్రు చలికాలంలోనే అధికంగా వస్తుంది. దీనికి కారణం వాతావరణం చల్లగా ఉండడంతో ఎక్కువ మంది తలకు స్నానం చేసేందుకు ఇష్టపడరు. దీని వల్ల కూడా చుండ్రు మురికి చేరిపోతుంది. అలాగే చలికాలంలో గాలిలోని ఉష్ణోగ్రతలు తగ్గిపోవడంతో నెత్తి మీద తమ చేరి బ్యాక్టీరియాలకు, వైరస్‌లకు నిలయంగా మారిపోతుంది. అవన్నీ కూడా చుండ్రుకు కారణం అవుతాయి. అందుకే చలికాలంలో ఎక్కువగా తల దురద పెడుతూ ఉంటుంది. మీరు ముదురు రంగు దుస్తులు వేసుకుంటే ఆ దుస్తులపై తెల్ల తెల్లటి పొలుసుల్లా కనిపిస్తూ ఉంటాయి. అదే చుండ్రు.

చుండ్రు ఒక సాధారణ చర్మ సమస్య. మాడు మీద చనిపోయిన చర్మకణాలు పేరుకుపోయి మురికితో కలిసి చుండ్రుగా మారిపోతాయి. మాడుపై ఆయిల్ ఎక్కువగా ఉత్పత్తి కావడం, చర్మం పొడిబారడం, ఫంగల్ ఇన్ఫెక్షన్లు, హార్మోన్ల మార్పులు, ఒత్తిడి, సరైన ఆహారం తీసుకోకపోవడం, సోరియాసిస్ వంటివి చుండ్రుకు కారణం అవుతాయి. మీకున్న సమస్యను బట్టి చుండ్రుకు తగిన చికిత్స తీసుకోవాలి. సోరియాసిస్, తామర వంటి వాటికి వైద్యులను కలిసి తగిన చికిత్స తీసుకోవలసిన అవసరం ఉంది.

ఇక సాధారణంగా చుండ్రు పడితే ఇంట్లోనే చిన్న చిన్న చిట్కాలను పాటించడం ద్వారా చుండ్రుని వదిలించుకోవచ్చు.  చలికాలం అయినా కూడా తప్పకుండా మీ జుట్టును వారానికి రెండు సార్లు శుభ్రం చేసుకోవాలి. కొబ్బరి నూనెతో మీ తలపై కాసేపు మసాజ్ చేసుకోండి. కొబ్బరినూనె చాలా అద్భుతంగా పనిచేస్తుంది. ఇది సహజమైన మాయిశ్చరైజర్లా ఉంటుంది. నెత్తి మీద లోతుగా చొచ్చుకుపోయి ఓదార్పును అందిస్తుంది.

కొబ్బరి నూనె లాగే లావెండర్ ఆయిల్ కూడా ఎంతో మేలు చేస్తుంది. తలపై చుండ్రు వల్ల వచ్చే దురదను తగ్గిస్తుంది. ఇందులో యాంటీ ఇన్ఫ్లమేటరీ గుణాలు ఉంటాయి. ఇవి మీకు ప్రశాంతమైన ఫీలింగ్ లో ఇస్తాయి.

రోజ్‌మేరీ ఆయిల్
రోజ్ మేరీ ఆయిల్‌ను ఉపయోగించడం వల్ల మీకు చుండ్రు సమస్య చాలా వరకు తగ్గుతుంది. దీనిలో ఆస్ట్రింజెంట్ లక్షణాలు ఉంటాయి. కాబట్టి మీ మాడు శుభ్రపడుతుంది. ఇది నూనె ఉత్పత్తిని తగ్గించడంలో సహాయపడుతుంది. తలకు నూనె రాసుకుని వర్షంలో తడవడం వంటివి చేయకండి. ఇది బ్యాక్టీరియాలకు, ఫంగల్ ఇన్ఫెక్షన్లకు కారణమవుతుంది. దురద, చుండ్రు వంటివి పెరిగిపోతాయి. అలాగే యోగా, ధ్యానం వంటివి ప్రాక్టీస్ చేయండి. ఈ రెండూ కూడా ఒత్తిడిని తగ్గిస్తాయి.

చుండ్రు అనేది ఫంగస్ గా కూడా మారిపోతుంది. చుండ్రును అలా వదిలేస్తే పెద్ద సమస్యగా అది మారుతుంది. మాలాసిజియా గ్లోబోసా అని పిలిచే ఫంగస్ వల్ల చుండ్రు తీవ్రంగా అవుతుంది. మన చర్మం, వెంట్రుకల్లో ఉన్న నూనెను, తేమను ఈ ఫంగస్ పీల్చేస్తుంది. అలాగే ఓలెయిక్ ఆమ్లాన్ని ఈ ఫంగస్ ఉత్పత్తి చేస్తుంది. ఆ ఆమ్లం వల్లే విపరీతంగా దురద వేస్తుంది. దాన్ని గోకడం వల్ల తలపైన ఉండే చర్మం పొడబారిపోయి పొలుసుల్లా మారి రాలిపోవడం మొదలవుతుంది. వాయు కాలుష్యం చుండ్రు సమస్యను మరింతగా పెంచేస్తుంది. ఎప్పటికప్పుడు తలకు స్నానం చేయడం ద్వారా ఫంగస్ ను కొంతవరకు అడ్డుకోవచ్చు. మార్కెట్లో యాంటీ ఫంగల్ షాంపూలు అందుబాటులో ఉన్నాయి. వాటిని వారంలో రెండు సార్లు వాడడం వల్ల మంచి ఫలితం ఉంటుంది. వీటిని ఉపయోగించినా కూడా ఫలితం లేకపోతే డెర్మటాలజిస్టుల వద్ద చికిత్స తీసుకోవడం ఉత్తమం.