పరుగులు తీసే నేటి జీవనశైలిలో బరువు పెరగడం సాధారణ సమస్య. ముఖ్యంగా పొట్ట చుట్టూ పేరుకుపోయే కొవ్వు తగ్గించడం చాలా మందికి కష్టంగా అనిపిస్తుంది. పనిభారంతో వ్యాయామం చేయడానికి సమయం కేటాయించలేని వారు కూడా ఎక్కువగా ఉంటున్నారు. అయితే సరైన ఆహారపు అలవాట్లు పాటించడం ద్వారా బరువును నియంత్రించుకోవచ్చు. ఆయుర్వేద నిపుణురాలు డాక్టర్ ఉపాసనా వోహ్రా ఇటీవల ఒక సులభమైన డైట్ ప్లాన్‌ను సూచించారు. ఈ ప్లాన్‌ను 10 రోజుల పాటు పాటిస్తే బరువు తగ్గడంతో పాటు బెల్లీ ఫ్యాట్ కూడా తగ్గే అవకాశం ఉందని ఆమె చెబుతున్నారు.
డాక్టర్ ఉపాసనా ప్రకారం.. భోజనం చేసే సమయం చాలా ముఖ్యమైనది. నిర్ణీత సమయాల్లో ఆహారం తీసుకోవడం వల్ల శరీరం మెరుగ్గా స్పందిస్తుంది.
ఈ డైట్‌లో ఆరోగ్యకరమైన ఆహారంతో పాటు ఎక్కువసేపు ఉపవాసం ఉండే విధానం కూడా ఉంటుంది. దీని వల్ల శరీరం నిల్వ ఉన్న శక్తిని వినియోగించుకోవడం ప్రారంభిస్తుంది. కొందరిలో ఉబ్బరం తగ్గడం, జీర్ణక్రియ మెరుగుపడటం వంటి ప్రయోజనాలు కనిపించవచ్చు.
ఉదయం నిద్రలేచిన వెంటనే ఒక గ్లాస్ గోరువెచ్చని నీటిని తాగాలి. ఒక్కసారిగా కాకుండా నెమ్మదిగా తాగడం మంచిది. ఇలా చేయడం వల్ల శరీరం హైడ్రేట్ అవుతుంది. జీర్ణక్రియ చురుకుగా మారి రోజును ఉత్సాహంగా ప్రారంభించేందుకు సహాయపడుతుంది.
లేచిన వెంటనే అల్పాహారం చేయకుండా ఉదయం 10 గంటల తర్వాత మొదటి భోజనం చేయాలని సూచిస్తున్నారు. ఈ సమయంలో సీజన్‌లో లభించే ఏదైనా ఒక పండును తీసుకోవాలి. పండ్ల రసాల కంటే నేరుగా పండ్లను తినడం మంచిది. ఎందుకంటే వాటిలో ఫైబర్, విటమిన్లు, ఇతర పోషకాలు ఎక్కువగా ఉంటాయి.
మధ్యాహ్నం 2:30 నుంచి 3 గంటల మధ్య భోజనం చేయాలి. ఇది రోజులో ప్రధాన భోజనంగా ఉండాలి. ఇంట్లో తయారుచేసిన పప్పు, కూరగాయలు, అన్నం, చపాతీలు తీసుకోవచ్చు. వీటితో పాటు కొంత సలాడ్ కూడా చేర్చుకోవాలి. ఇది శరీరానికి అవసరమైన పోషకాలను అందిస్తుంది.
సాయంత్రం 6 గంటలలోపు చివరి భోజనం చేయాలి. ఈ సమయంలో ఉప్మా, పోహా, ఇడ్లీ లేదా తక్కువ నూనెతో చేసిన శాండ్‌విచ్ వంటి తేలికపాటి ఆహారం తీసుకోవచ్చు. ఆ తర్వాత నీరు తప్ప మరే ఆహారాన్ని తీసుకోకూడదు. మరుసటి రోజు ఉదయం 10 గంటల తర్వాతే మళ్లీ మొదటి భోజనం చేయాలి.
ఎక్కువసేపు ఉపవాసం ఉండడం వల్ల క్యాలరీల వినియోగం తగ్గవచ్చు. అలాగే అవసరం లేని స్నాక్స్ తినే అలవాటు కూడా తగ్గుతుంది. అయితే ప్రతి ఒక్కరిలో ఫలితాలు ఒకేలా ఉండవు. వయస్సు, ఆరోగ్య పరిస్థితి, జీవనశైలి వంటి అంశాలు ప్రభావం చూపుతాయి.
ఈ డైట్ ప్లాన్‌లో సరైన సమయానికి ఆహారం తీసుకోవడం, ఆరోగ్యకరమైన భోజనం చేయడం, రాత్రి ఉపవాసం పాటించడం ప్రధాన అంశాలు. కొందరిలో బరువు తగ్గడం, బెల్లీ ఫ్యాట్ తగ్గడం వంటి ఫలితాలు కనిపించవచ్చు. అయితే దీర్ఘకాలికంగా శరీర బరువు ఆరోగ్యకరంగా కొనసాగించాలంటే సమతుల్య ఆహారం, తగిన నిద్ర, శారీరక శ్రమ కూడా అవసరం. ఏదైనా ప్రత్యేక డైట్ ప్రారంభించే ముందు వైద్యుల సలహా తీసుకోవడం మంచిది.
గమనిక: ఈ డైట్ ప్లాన్ బిపి, థైరాయిడ్, షుగర్, గుండె, కిడ్నీ లేదా ఇతర ఆరోగ్య సమస్యలు ఉన్నవారి కోసం తగినది కాదు. ఆరోగ్య సమస్యలున్నవారు తగిన వైద్య నిపుణుల సలహా తీసుకోవడం తప్పనిసరి.
Share
ఒకే ఫ్రేమ్లో మెగా పవర్...ఏపీ డిప్యూటీ సీఎంని కలిసిన గ్లోబల్ స్టార్!
వైరల్ వీడియో .. ప్రతిరోజూ మూత్రం తాగితే అంత గ్లో వస్తుందా? నిజమెంత?
