Food Safety Tips: ఫ్రిజ్‌లో ఐస్ పేరుకుపోతోందా ? ఈ టిప్స్ తప్పకుండా పాటించండి !

Food Safety Tips: వర్షాకాలంలో వాతావరణంలో తేమ శాతం ఎక్కువగా ఉంటుంది. ఇది బ్యాక్టీరియా, ఫంగస్ వంటి సూక్ష్మక్రిములు పెరగడానికి అనుకూలమైన వాతావరణాన్ని సృష్టిస్తుంది. అందుకే.. ఈ సీజన్‌లో ఆహారాన్ని నిల్వ చేసే విషయంలో చాలా జాగ్రత్తగా ఉండాలి. ఫ్రిజ్ ఆహారాన్ని తాజాగా ఉంచుతుందని చాలామంది అనుకుంటారు. కానీ వర్షాకాలంలో ఫ్రిజ్‌ని సరిగ్గా ఉపయోగించుకోకపోతే.. బ్యాక్టీరియా పెరగడానికి కారణం అవుతుంది.

వర్షాకాలంలో ఫ్రిజ్ ఎందుకు డీఫ్రాస్ట్ చేయాలి ?
సాధారణంగా ఫ్రిజ్ లోపల ఉండే తేమ కారణంగా ఫ్రీజర్ కంపార్ట్‌మెంట్‌లో ఐస్ పేరుకుపోతుంది. వర్షాకాలంలో గాలిలో తేమ ఎక్కువగా ఉండటం వల్ల ఈ ప్రక్రియ మరింత వేగంగా జరుగుతుంది. ఫ్రిజ్ డోర్ తెరిచిన ప్రతిసారీ బయటి తేమ లోపలికి ప్రవేశించి ఐస్ గడ్డలు మరింత పెరిగేలా చేస్తుంది. ఇలా ఐస్ పేరుకుపోవడం వల్ల ఫ్రిజ్ సామర్థ్యం తగ్గిపోతుంది. ఫలితంగా మనం ఫ్రిజ్ లో పెట్టిన ఆహారం సరిగా చల్లబడదు. అలాగే.. పేరుకుపోయిన ఐస్ వల్ల ఫ్రిజ్‌లో ఉండే ఆహారం పాడైపోయే అవకాశం ఉంటుంది. అందుకే ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) వర్షాకాలంలో ప్రతి రెండు వారాలకు ఒకసారి ఫ్రిజ్‌ను డీఫ్రాస్ట్ చేసి శుభ్రం చేయాలని సూచిస్తుంది.

డీఫ్రాస్ట్ చేసే పద్ధతి:
విద్యుత్ సరఫరా నిలిపివేయడం: ఫ్రిజ్ డీఫ్రాస్ట్ చేయడానికి ముందు.. దాన్ని స్విచ్ ఆఫ్ చేసి ప్లగ్‌ను తీసివేయండి. ఇది సురక్షితమైన పద్ధతి.

ఆహారాన్ని తొలగించడం: ఫ్రిజ్‌లో ఉన్న అన్ని ఆహార పదార్థాలను బయటకు తీసి, ఇన్సులేటెడ్ బ్యాగులు లేదా ఐస్ ప్యాక్‌లు ఉన్న కూలర్‌లో తాత్కాలికంగా ఉంచండి. దీంతో ఆహారం పాడవకుండా ఉంటుంది.

ఐస్ కరిగించడం: ఫ్రీజర్ డోర్‌ను తెరిచి ఉంచండి. ఐస్ త్వరగా కరగాలంటే.. వేడి నీటితో నింపిన గిన్నెను ఫ్రీజర్‌లో ఉంచండి. దీని నుంచి వచ్చే ఆవిరి ఐస్‌ను వేగంగా కరిగించడానికి సహాయపడుతుంది. గట్టిగా ఉన్న ఐస్‌ను తొలగించడానికి ప్లాస్టిక్ లేదా చెక్క స్క్రేపర్‌ను ఉపయోగించండి. ఫ్రిజ్‌కు నష్టం కలిగించే మెటల్ వస్తువులను అస్సలు వాడకూడదు.

శుభ్రపరచడం: ఐస్ పూర్తిగా కరిగిపోయిన తర్వాత.. బేకింగ్ సోడాను గోరువెచ్చని నీటిలో కలిపి ద్రావణాన్ని తయారు చేయండి. ఈ ద్రావణంతో ఫ్రిజ్ లోపలి గోడలు, అల్మారాలు, డోర్ సీల్స్ అన్నీ శుభ్రంగా తుడవాలి. ఇది ఫ్రిజ్‌లోని దుర్వాసనను తొలగిస్తుంది. అలాగే ఫంగస్, బ్యాక్టీరియాను కూడా నిర్మూలిస్తుంది.

ఆరబెట్టడం: శుభ్రపరిచిన తర్వాత, పొడి గుడ్డతో ఫ్రిజ్‌ను పూర్తిగా ఆరబెట్టాలి. ఫ్రిజ్ లోపల తేమ లేకుండా చూసుకోవడం ముఖ్యం. ఎందుకంటే ఇది మళ్లీ బ్యాక్టీరియా వృద్ధికి దారి తీస్తుంది.

ఇతర చిట్కాలు:
పండ్లు, కూరగాయలు: పండ్లు, కూరగాయలను వాడినప్పుడు మాత్రమే కడగాలి. వాటిని తడిగా నిల్వ చేయడం వల్ల త్వరగా పాడైపోతాయి. వాటిని పొడిగా తుడిచి పేపర్ బ్యాగులో ఉంచితే ఎక్కువ కాలం తాజాగా ఉంటాయి.

సరిగ్గా నిల్వ చేయండి: వండిన, పచ్చి ఆహారాన్ని వేరువేరుగా నిల్వ చేయాలి. మాంసం, చేపలు వంటివి లీక్ ప్రూఫ్ కంటైనర్లలో ఉంచి క్రాస్-కంటామినేషన్ నివారించాలి.

గాలి ప్రసరణ: ఫ్రిజ్‌లో ఆహారాన్ని ఎక్కువగా నింపకూడదు. గాలి ప్రసరణ ఉంటే ఆహారం అన్ని చోట్లా పాడవకుండా ఉంటుంది.

వేడి ఆహారం: వేడిగా ఉన్న ఆహారాన్ని ఫ్రిజ్‌లో పెట్టడం వల్ల మొత్తం ఫ్రిజ్ ఉష్ణోగ్రత పెరుగుతుంది. అందుకే గది ఉష్ణోగ్రతకు వచ్చాకే వాటిని ఫ్రిజ్‌లో పెట్టాలి.