కిచెన్‌లో బొద్దింకలా? ఈ ఒక్క పొడి చల్లితే చాలు.. అన్నీ మాయం!

Tips for cockroaches: వంటగదిలో బొద్దింకలు ఉంటే అది కేవలం అసహ్యంగా ఉండటమే కాదు.. ఆరోగ్యానికి కూడా చాలా ప్రమాదకరం. ఇవి ఆహారాన్ని కలుషితం చేసి టైఫాయిడ్, కలరా వంటి వ్యాధులకు కారణమవుతాయి. ఎన్ని ఖరీదైన స్ప్రేలు వాడినా ఇవి మళ్ళీ మళ్ళీ వస్తూనే ఉంటాయా? అయితే కెమికల్స్ జోలికి వెళ్లకుండా మన వంటింట్లో దొరికే వస్తువులతోనే వీటికి శాశ్వతంగా చెక్ పెట్టొచ్చు. బొద్దింకలను సహజ పద్ధతుల్లో ఎలా తరిమికొట్టాలి ? మళ్లీ రాకుండా ఎలాంటి జాగ్రత్తలు తీసుకోవాలో వివరంగా ఇప్పుడు తెలుసుకుందాం.

సాధారణంగా వంటగదిలో తేమ, ఆహార పదార్థాలు ఎక్కువగా ఉంటాయి కాబట్టి బొద్దింకలు అక్కడ ఎక్కువగా చేరుతాయి. సింక్ కింద, అలమరల మూలల్లో.. ఇవి గుడ్లు పెట్టి సంఖ్యను పెంచుకుంటాయి. వీటిని నివారించడానికి ఈ కింది సింపుల్ హోం రెమెడీస్ అద్భుతంగా పనిచేస్తాయి.

1. బేకింగ్ సోడా, చక్కెర:
ఇది బొద్దింకలను చంపడానికి ఒక శక్తివంతమైన మందులా పనిచేస్తుంది. సమాన పరిమాణంలో బేకింగ్ సోడా, పంచదారను కలిపి, బొద్దింకలు తిరిగే మూలల్లో చల్లండి. పంచదార వాసనకు బొద్దింకలు ఆకర్షించబడతాయి. కానీ బేకింగ్ సోడాను తినడం వల్ల వాటి జీర్ణవ్యవస్థ దెబ్బతిని అవి చనిపోతాయి.

2. బిర్యానీ ఆకులు:
మనం వంటల్లో వాడే బిర్యానీ ఆకుల వాసన బొద్దింకలకు అస్సలు పడదు. కొన్ని ఎండిన బిర్యానీ ఆకులను నలిపి, పొడి చేసి వంటగది మూలల్లో.. కిటికీల దగ్గర ఉంచండి. ఆ ఘాటైన వాసనకు బొద్దింకలు ఆ దరిదాపుల్లోకి కూడా రావు. ఇది సురక్షితమైన, సులభమైన పద్ధతి.

3. బోరిక్ యాసిడ్:
బొద్దింకల నివారణలో బోరిక్ యాసిడ్ బెస్ట్ అని చెప్పవచ్చు. కొంచెం బోరిక్ యాసిడ్‌ను గోధుమ పిండి లేదా పంచదారతో కలిపి చిన్న చిన్న ఉండలుగా చేసి బొద్దింకలు ఉన్న చోట ఉంచండి. అయితే.. ఇంట్లో చిన్న పిల్లలు లేదా పెంపుడు జంతువులు ఉంటే వీటిని వాడేటప్పుడు చాలా జాగ్రత్తగా ఉండాలి.

4. వేప నూనె లేదా వేప పొడి:
వేపలో ఉండే చేదు గుణం బొద్దింకలను తరిమి కొడుతుంది. వేప నూనెను నీటిలో కలిపి స్ప్రే లాగా వాడవచ్చు లేదా వేప పొడిని చల్లవచ్చు. ఇది కేవలం బొద్దింకలనే కాకుండా ఇతర కీటకాలను కూడా నివారిస్తుంది.

5. పుదీనా నూనె:
పుదీనా ఆయిల్ లేదా ఎసెన్షియల్ ఆయిల్స్ బొద్దింకల మీద విషప్రభావం చూపుతాయి. నీటిలో కొన్ని చుక్కల పుదీనా నూనె కలిపి వంటగదిలో స్ప్రే చేయండి. ఇది వంటగదికి మంచి సువాసన ఇవ్వడమే కాకుండా.. బొద్దింకలను పారద్రోలుతుంది.

మళ్ళీ రాకుండా తీసుకోవాల్సిన జాగ్రత్తలు:
శుభ్రత: రాత్రి పూట వంటగదిని శుభ్రం చేయకుండా వదిలేయకండి. ఎంగిలి పాత్రలను సింక్‌లో ఉంచకండి.

తేమ లేకుండా చూడటం: సింక్ కింద పైపుల నుంచి నీరు కారకుండా చూసుకోండి. బొద్దింకలు నీరు ఉన్న చోట ఎక్కువగా పెరుగుతాయి.

చెత్త బుట్ట: చెత్త బుట్టకు ఎప్పుడూ మూత ఉండాలి. ప్రతి రోజూ చెత్తను బయట పారవేయండి.

పగుళ్లు పూడ్చడం: గోడలకు లేదా అలమరలకు ఉన్న చిన్న చిన్న రంధ్రాలను సిమెంట్ లేదా వైట్ పుట్టీతో పూడ్చివేయండి.

బొద్దింకల నివారణకు ఓపిక చాలా అవసరం. పైన చెప్పిన చిట్కాలను క్రమం తప్పకుండా పాటిస్తూ.. వంటగదిని పొడిగా, శుభ్రంగా ఉంచుకుంటే బొద్దింకల సమస్య నుంచి శాశ్వతంగా విముక్తి పొందవచ్చు.