బగారా రైస్, చపాతీలోకి పర్ఫెక్ట్ కాంబినేషన్.. ఘుమఘుమలాడే గుత్తి వంకాయ కాజు మసాలా!

Gutti Vankaya Kaju Masala: వంకాయ కూర పేరు వింటేనే నోరూరే వారికి.. ఈ వంటకం ఒక అద్భుతమైన విందు. సాంప్రదాయ ఆంధ్రా గుత్తి వంకాయ ఘాటుకు, రిచ్ జీడిపప్పు గ్రాండ్ టచ్ తోడైతే వచ్చే ఆ రుచే వేరు. వీకెండ్స్‌లో కుటుంబంతో గడిపే సమయాన్ని ప్రత్యేకంగా మార్చాలన్నా.. పండుగలు, ఫంక్షన్లలో అతిథులకు రెస్టారెంట్ లెవెల్ రాయల్ ఫీల్ ఇవ్వాలన్నా ఈ ‘గుత్తి వంకాయ కాజు మసాలా’ పర్ఫెక్ట్ ఛాయిస్. ఘుమఘుమలాడే మసాలాల కాంబినేషన్‌తో చపాతీలు, బగారా రైస్ లేదా వేడివేడి పులావ్‌లోకి అద్దిరిపోయే ఈ స్పెషల్ కర్రీని ఇంట్లోనే నోరూరించేలా ఎలా చేసుకోవాలో ఇప్పుడు చూద్దాం.

కావాల్సిన పదార్థాలు:

చిన్న లేత వంకాయలు – 8 నుండి 10
జీడిపప్పు – 20 (సగం రుబ్బడానికి, సగం వేయించడానికి)
ఉల్లిపాయలు – 2 (సన్నగా తరిగినవి)
టమాటోలు – 2 (ప్యూరీ లేదా గుజ్జు)
అల్లం వెల్లుల్లి పేస్ట్ – 1 టీస్పూన్
పచ్చిమిర్చి – 2
ధనియాలు – 1 టేబుల్ స్పూన్
జీలకర్ర – 1 టీస్పూన్
నువ్వులు – 1 టేబుల్ స్పూన్
గసగసాలు – 1 టీస్పూన్
ఎండు కొబ్బరి పొడి – 2 టేబుల్ స్పూన్లు
కారం – 1.5 టీస్పూన్లు
పసుపు – అర టీస్పూన్
గరం మసాలా – అర టీస్పూన్
రుచికి సరిపడా ఉప్పు
తాజా కొత్తిమీర – కొద్దిగా
కరివేపాకు – ఒక చిన్న రెబ్బ
వంట నూనె – 4 టేబుల్ స్పూన్లు.

Also Read: 32 కేజీల బరువు తగ్గిన ఇన్‌ఫ్లుయెన్సర్.. ఆ 5 ఆహారాలను దూరం పెట్టడం వల్లే అంటూ సీక్రెట్ రివీల్!

తయారీ విధానం:

ముందుగా బాణలిలో ధనియాలు, జీలకర్ర, నువ్వులు, గసగసాలు, ఎండు కొబ్బరి, కొన్ని జీడిపప్పులను దోరగా వేయించి చల్లారిన తర్వాత కొద్దిగా నీళ్లు పోసి మెత్తని పేస్ట్‌లా రుబ్బుకోవాలి. ఆ తర్వాత వంకాయలను తొడిమలు ఉంచి నాలుగు గాట్లుగా కోసి ఉప్పు నీళ్లలో వేసి ఉంచాలి. బాణలిలో కొద్దిగా నూనె వేసి మిగిలిన జీడిపప్పులను దోరగా వేయించి పక్కన పెట్టుకోవాలి. అదే నూనెలో గాట్లు పెట్టిన వంకాయలను వేసి సగం ఉడికే వరకు వేయించి పక్కకు తీసుకోవాలి.

ఇప్పుడు మిగిలిన నూనెలో కరివేపాకు, ఉల్లిపాయ ముక్కలు, పచ్చిమిర్చి వేసి దోరగా వేగనివ్వాలి. అందులో అల్లం వెల్లుల్లి పేస్ట్ వేసి పచ్చివాసన పోయాక టమాటో గుజ్జు, పసుపు, కారం, గరం మసాలా, రుచికి సరిపడా ఉప్పు చేర్చి నూనె పైకి తేలేవరకు మగ్గించాలి. ఆ తర్వాత ముందుగా నూరుకున్న జీడిపప్పు మసాలా పేస్ట్, తగినన్ని నీళ్లు పోసి గ్రేవీని బాగా ఉడికించాలి. గ్రేవీ కాస్త చిక్కబడ్డాక వేయించి పెట్టుకున్న వంకాయలు, వేయించిన జీడిపప్పులను అందులో వేసి మూతపెట్టి చిన్న మంటపై వంకాయలు పూర్తిగా మెత్తబడే వరకు మగ్గనివ్వాలి. చివరిగా సన్నగా తరిగిన కొత్తిమీర చల్లుకుని దించేస్తే వేడివేడి సువాసనగల గుత్తి వంకాయ కాజు మసాలా సిద్ధమవుతుంది.

Also Read: 45 రోజుల పాటు రోజుకో అరటిపండు తింటే బాడీలో ఏం జరుగుతుందో తెలుసా?