Apple Benefits: పడుకునే ముందు ఆపిల్ తినొచ్చా? నిపుణులు ఏం చెబుతున్నారంటే ?

Apple Benefits: ఆపిల్ ఆరోగ్యానికి ఎంతో మేలు చేసే పండు. “రోజుకో ఆపిల్ తింటే డాక్టర్ అవసరం లేదు” అనే సామెత దీని పోషక విలువలను తెలియజేస్తుంది. విటమిన్లు, ఖనిజాలు, యాంటీఆక్సిడెంట్లు, ముఖ్యంగా ఫైబర్ (పీచు పదార్థం) పుష్కలంగా ఉన్న ఈ పండును ఏ సమయంలో తినాలి, ముఖ్యంగా పడుకునే ముందు ఆపిల్ తినడం మంచిదేనా అనే సందేహం చాలా మందికి ఉంటుంది. ఈ విషయంలో ఆరోగ్య నిపుణులు ఏమి సూచిస్తున్నారో ఇప్పుడు తెలుసుకుందాం.

పడుకునే ముందు ఆపిల్ తినడం వల్ల ప్రయోజనాలు:

కొన్ని పరిశోధనల ప్రకారం.. ఆపిల్ పండును రాత్రిపూట తినడం వల్ల కొన్ని ప్రయోజనాలు ఉన్నాయి.

నిద్రకు సహాయం: ఆపిల్‌లో సహజంగా ఉండే కొన్ని యాంటీఆక్సిడెంట్లు, చక్కెరలు సెరోటోనిన్ ఉత్పత్తికి తోడ్పడతాయి. సెరోటోనిన్ అనేది నిద్రను నియంత్రించే మెలటోనిన్ హార్మోన్‌గా మారుతుంది. ఇది మంచి నిద్ర పట్టడానికి పరోక్షంగా సహాయ పడుతుంది.

జీర్ణక్రియకు మద్దతు: ఆపిల్‌లో ఫైబర్ పుష్కలంగా ఉంటుంది. ఇది రాత్రిపూట జీర్ణవ్యవస్థను ఆరోగ్యంగా ఉంచడానికి.. ఉదయం సులభంగా మల విసర్జన జరగడానికి సహాయ పడుతుంది.

పడుకునే ముందు ఆపిల్ తినడం వల్ల కలిగే ఇబ్బందులు:

ఆరోగ్య నిపుణులు పడుకునే ముందు వెంటనే.. ఆపిల్ తినడాన్ని తరచుగా సిఫార్సు చేయకపోవడానికి కొన్ని కారణాలు ఉన్నాయి.

1. జీర్ణ సమస్యలు, అసిడిటీ:

ఆపిల్ పండు ఫైబర్, సహజ చక్కెరలతో కూడి ఉంటుంది. రాత్రిపూట మన జీర్ణక్రియ నెమ్మదిస్తుంది. పడుకునే ముందు ఫైబర్ అధికంగా ఉన్న ఆహారం తీసుకుంటే జీర్ణ సమస్యలు వచ్చే ప్రమాదం ఉంటుంది.

గ్యాస్, ఉబ్బరం : జీర్ణక్రియ నెమ్మదిగా జరగడం వల్ల కడుపు ఉబ్బరం లేదా గ్యాస్ ఏర్పడవచ్చు.

యాసిడ్ రిఫ్లక్స్: ఆపిల్స్ కొద్దిగా ఆమ్ల గుణాన్ని కలిగి ఉంటాయి. పడుకున్నప్పుడు ఈ ఆమ్లం వెనక్కి ప్రవహించి గుండెల్లో మంట లేదా అసిడిటీని పెంచుతుంది.

2. చక్కెర, శక్తి :

ఆపిల్‌లో సహజ చక్కెరలు ఉంటాయి. రాత్రిపూట మనం కేలరీలు ఖర్చు చేయనందున, ఈ చక్కెరలు కొవ్వుగా మారే అవకాశం ఉంటుంది. అలాగే.. వెంటనే నిద్రపోవడానికి ప్రయత్నిస్తున్నప్పుడు ఈ చక్కెరలు అదనపు శక్తిని ఇచ్చి నిద్రకు భంగం కలిగించవచ్చు.

Also Read: చలికాలంలో జుట్టు రాలుతోందా ? అయితే ఈ టిప్ప్ ఫాలో అవ్వండి

సరైన సమయం:

ఆరోగ్య నిపుణుల అభిప్రాయం ప్రకారం.. ఆపిల్ తినడానికి ఉత్తమ సమయం పగటిపూట లేదా మధ్యాహ్నం స్నాక్ సమయంలో.

ఉత్తమమైన సమయం: రాత్రి పడుకోవడానికి కనీసం 2-3 గంటల ముందు ఆపిల్ తినడం సురక్షితం. ఉదాహరణకు.. మీరు రాత్రి 10 గంటలకు పడుకుంటే.. 7 నుండి 8 గంటల మధ్య ఆపిల్‌ను తినవచ్చు. ఈ సమయం జీర్ణ వ్యవస్థకు ఆహారాన్ని పూర్తిగా జీర్ణం చేసుకోవడానికి తగినంత సమయం ఇస్తుంది.

వ్యక్తిగతం: కొందరికి పడుకునే ముందు ఆపిల్ తిన్నా ఎలాంటి ఇబ్బంది ఉండకపోవచ్చు. కానీ మీకు అసిడిటీ లేదా సున్నితమైన జీర్ణ వ్యవస్థ ఉంటే.. రాత్రిపూట ఆపిల్‌ను (లేదా ఫైబర్ అధికంగా ఉన్న పండ్లను) తినడం మానుకోవడం మంచిది.

ఆపిల్ అనేది పోషకాల గని. సరైన సమయంలో.. సరైన పరిమాణంలో తింటే దాని పూర్తి ఆరోగ్య ప్రయోజనాలను పొందవచ్చు.