బ్రష్ చేయకుండా పడుకుంటే గుండె పోటు వస్తుందా? షాకింగ్ నిజాలు బయటపెట్టిన డాక్టర్లు!

Night Brushing: చాలామంది ఉదయం లేవగానే బ్రష్ చేయడం అలవాటుగా మార్చుకుంటారు కానీ, రాత్రి పడుకునే ముందు బ్రష్ చేయడాన్ని పెద్దగా పట్టించుకోరు. అలసట వల్లో లేదా బద్ధకం వల్లో రాత్రి వేళల్లో బ్రష్ చేయడం మానేస్తుంటారు. ఉదయం ఒకసారి తోముకుంటే సరిపోతుందిలే అనుకుంటే పొరపాటేనని డెంటల్ నిపుణులు గట్టిగా హెచ్చరిస్తున్నారు. రాత్రిపూట బ్రష్ చేయకపోవడం వల్ల కేవలం పళ్లు పాడైపోవడమే కాదు.. అది గుండె జబ్బులకు కూడా దారితీస్తుందని నిపుణులు చెబుతున్నారు.

నోట్లోనే పెరిగే ప్రమాదకర బ్యాక్టీరియా:

మనం రోజంతా తినే ఆహారానికి సంబంధించిన చిన్న చిన్న కణాలు పళ్ల మధ్య, చిగుళ్లల్లో ఇరుక్కుపోతుంటాయి. రాత్రిపూట బ్రష్ చేయకుండా అలాగే పడుకుంటే, నోటిలోని లాలాజలం ఊరడం తగ్గుతుంది. దీనివల్ల నోరు ఎండిపోయి బ్యాక్టీరియా పెరగడానికి అనుకూలమైన వాతావరణం ఏర్పడుతుంది. మనం తిన్న ఆహార కణాలపై ఈ బ్యాక్టీరియా దాడి చేసి, నోట్లోనే వేగంగా వృద్ధి చెందుతుంది. ఇది పళ్లపై ఒక జిగట పొరలా (ప్లేక్) మారి, కాలక్రమేణా గట్టిగా తయారవుతుంది. దీనివల్ల చిగుళ్ల వాపులు, రక్తస్రావం, తీవ్రమైన ఇన్ఫెక్షన్లు వస్తాయి.

Also Read: రూపాయి ఖర్చు లేకుండా.. ఇంట్లోని గాజు వస్తువులను డైమండ్‌లా మెరిపించే సూపర్ ఐడియా!

చిగుళ్ల సమస్యల నుండి గుండె జబ్బుల వరకు:

నోటి ఆరోగ్యానికి, గుండె ఆరోగ్యానికి చాలా దగ్గర సంబంధం ఉందని పరిశోధనలు చెప్తున్నాయి. నేషనల్ ఇన్‌స్టిట్యూట్ ఆఫ్ హెల్త్ నివేదికల ప్రకారం.. చిగుళ్లలో వచ్చే దీర్ఘకాలిక ఇన్ఫెక్షన్లు రక్తనాళాలపై ప్రభావం చూపుతాయి. చిగుళ్ల వాపుకు కారణమయ్యే బ్యాక్టీరియా, అక్కడి గాయాల ద్వారా రక్తప్రవాహంలోకి ప్రవేశిస్తుంది. ఇది రక్తనాళాల్లో కొవ్వు పేరుకుపోయేలా చేసి, గుండెకు రక్తాన్ని చేరవేసే మార్గాలను ఇరుకుగా మారుస్తుంది. దీనివల్ల భవిష్యత్తులో హార్ట్ ఎటాక్ వంటి తీవ్రమైన గుండె సమస్యలు వచ్చే ప్రమాదం చాలా ఎక్కువగా ఉంటుంది.

రెండు సార్లు బ్రషింగ్ తప్పనిసరి:

మన శరీరంలో ఎక్కడైనా ఇన్ఫెక్షన్ వస్తే దాని ప్రభావం మొత్తం ఆరోగ్యంపై పడుతుంది. నోటిలోని ఇన్ఫెక్షన్ కూడా అంతే. అందుకే వైద్యులు ఉదయం, రాత్రి రెండు పూటలా తప్పనిసరిగా బ్రష్ చేయాలని సిఫార్సు చేస్తారు. క్రమం తప్పకుండా రోజుకు రెండుసార్లు బ్రష్ చేస్తూ, డెంటిస్ట్‌ను సంప్రదించేవారిలో చిగుళ్ల వ్యాధులు వచ్చే అవకాశాలు చాలా తక్కువగా ఉంటాయి. చిగుళ్లు ఆరోగ్యంగా ఉంటే శరీరంలో ఇన్ఫెక్షన్ల తీవ్రత తగ్గి, పరోక్షంగా గుండె కూడా పదిలంగా ఉంటుంది.

మన ఆరోగ్యం మన చేతుల్లో:

రాత్రిపూట బ్రష్ చేయడం అనేది కేవలం తెల్లని పళ్లు, నోటి దుర్వాసనను దూరం చేసుకోవడం కోసమే కాదు. అది మన గుండెను కాపాడుకోవడానికి చేసే ఒక చిన్న ప్రయత్నం. పడుకునే ముందు కేవలం రెండు నిమిషాలు కేటాయించి బ్రష్ చేయడం వల్ల నోటిలోని బ్యాక్టీరియాను పూర్తిగా అదుపు చేయవచ్చు. ఈ చిన్న అలవాటే మనల్ని భవిష్యత్తులో వచ్చే పెద్ద పెద్ద ఆరోగ్య సమస్యల నుండి, ముఖ్యంగా గుండె జబ్బుల నుండి రక్షిస్తుంది. కాబట్టి.. ఈ రోజు నుండే రాత్రి బ్రష్ చేయడాన్ని మన దినచర్యలో భాగం చేసుకుందాం.

Also Read: భావోద్వేగాలను అదుపు చేసుకోలేకపోయేవారు తరచూ వాడే మాటలివే!

Share

• 
• 
• 
• 
• 
•