Summer Skin Care Tips: ఎండల కారణంగా ముఖం నల్లగా మారిందా ?

Summer Skin Care Tips: వేసవి కాలంలో చర్మ సంరక్షణ చాలా ముఖ్యం. ఈ సీజన్ లో తీవ్రమైన ఎండలు, చెమట కారణంగా.. చర్మం రంగు నల్లబడటం ప్రారంభమవుతుంది. అంతే కాకుండా ముఖం నిర్జీవంగా కనిపిస్తుంది. ఇలాంటి సమయంలో మీరు మార్కెట్లో లభించే ఖరీదైన ఉత్పత్తులు వాడటం వల్ల సైడ్ ఎఫెక్ట్స్ కూడా వస్తాయి. వీటిలో ఉండే రసాయనాల కారణంగా.. ఇది కొన్నిసార్లు చర్మ సంబంధిత సమస్యలు కూడా పెరుగుతాయి.

సమ్మర్‌లో మీ చర్మం దాని రంగును కోల్పోవడం ప్రారంభించినట్లయితే.. ఆందోళన చెందాల్సిన అవసరమే లేదు. కొన్ని సింపుల్ చిట్కాలు పాటించడం ద్వారా మీరు మీ చర్మం యొక్క సహజ మెరుపును తిరిగి పొందవచ్చు. మరి సూర్యుడి వల్ల ప్రభావితమైన ముఖానికి మేలు చేసే 5 హోం రెమెడీస్ గురించి ఇప్పుడు తెలుసుకుందాం.

1.టమాటో రసం:
టమాటోలో సహజ బ్లీచింగ్ లక్షణాలు ఉంటాయి. ఇది ట్యానింగ్ తగ్గించడంలో సహాయపడుతుంది. అంతే కాకుండా ఇందులో ఉండే యాంటీ ఆక్సిడెంట్లు చర్మాన్ని రిపేర్ చేయడానికి పనిచేస్తాయి . దీనిని ముఖానికి అప్లై చేయడం కూడా చాలా సులభం. దీని కోసం.. ముందుగా టమాటో రసాన్ని తీసి.. కాటన్ సహాయంతో ముఖానికి అప్లై చేయండి. 15-20 నిమిషాలు ఆరనివ్వండి. తర్వాత చల్లటి నీటితో శుభ్రం చేసుకోండి. ఇది మీ చర్మాన్ని తాజాగా కనిపించేలా చేస్తుంది. అంతే కాకుండా మీ రంగు కూడా మెరుగుపరుస్తుంది.

2.దోసకాయ రసం:
వేసవిలో దోసకాయలు ఎక్కువగా లభిస్తాయి. వీటిని తినడం వల్ల శరీరంలోని ప్రతి భాగానికి మేలు జరుగుతుంది. దోసకాయ చర్మాన్ని చల్లబరుస్తుంది. అంతే కాకుండా ఇది ముఖంపై వచ్చే చికాకును తగ్గించడమే కాకుండా టానింగ్‌ను తొలగించడంలో కూడా సహాయపడుతుంది. దీన్ని అప్లై చేయడానికి.. ముందుగా దోసకాయ రసాన్ని తయారు చేసుకుని ముఖానికి అప్లై చేసి చేతులతో మసాజ్ చేయండి. 20 నిమిషాలు అలాగే ఉంచి.. తర్వాత శుభ్రం చేయండి. ఈ రెమెడీ చర్మాన్ని హైడ్రేట్ చేస్తుంది. అంతే కాకుండా సూర్యుడి వల్ల కలిగే నష్టాన్ని తగ్గిస్తుంది.

3.శనగపిండి, పెరుగు పేస్ట్:
శనగపిండి, పెరుగు రెండూ చర్మానికి అద్భుతమైన క్లెన్సర్‌లుగా పనిచేస్తాయి. శనగపిండి చర్మపు మృత కణాలను తొలగించడంలో సహాయపడుతుంది. అంతే కాకుండా పెరుగు చర్మాన్ని తేమగా ఉంచుతుంది. ఒక చెంచా శనగపిండిని రెండు చెంచాల పెరుగుతో కలిపి పేస్ట్ లా తయారు చేయండి. దీన్ని ముఖానికి అప్లై చేసి 15-20 నిమిషాలు అలాగే ఉంచి.. చేతులతో మసాజ్ చేస్తూ కడిగేయండి. ఇది వేసవిలో మీ చర్మాన్ని శుభ్రంగా , ప్రకాశవంతంగా చేస్తుంది.

4. కలబంద జెల్:
అలోవెరా జెల్ చర్మానికి వరం లాంటిది. ఇందులో ఉండే లక్షణాలు సూర్యుడి వల్ల కలిగే చర్మ నష్టాన్ని సరిచేయడంలో సహాయపడతాయి. దీనిని అప్లై చేయడానికి.. కాస్త తాజా కలబంద జెల్ తీసుకొని ముఖం మీద అప్లై చేసి 15-20 నిమిషాలు అలాగే ఉంచండి. తర్వాత ముఖాన్ని శుభ్రం చేయండి. ఇది చర్మాన్ని చల్లబరుస్తుంది. అంతే కాకుండా దాని మెరుపును పెంచుతుంది.

Also Read: జుట్టు చివర్లు చిట్లుతున్నాయా ? వీటితో ప్రాబ్లమ్ సాల్వ్

5. కొబ్బరి నీళ్లు:
కొబ్బరి నీళ్లు సహజ టోనర్‌గా పనిచేస్తాయి. ఇది చర్మాన్ని హైడ్రేట్ గా ఉంచడమే కాకుండా.. ముఖం యొక్క రంగును మెరుగుపరచడంలో కూడా సహాయపడుతుంది. ప్రతిరోజూ కొబ్బరి నీళ్లతో మీ ముఖాన్ని కడుక్కోవడం లేదా కాటన్ తో ముఖంపై అప్లై చేయడం వల్ల మీ చర్మం మృదువుగా, ప్రకాశవంతంగా మారుతుంది. అంతే కాకుండా సమ్మర్ లో గ్లోయింగ్ స్కిన్ కోసం కూడా ఇది చాలా బాగా ఉపయోగపడుతుంది.