Back Pain: నడుము నొప్పా.. ఈ హోం రెమెడీస్ ట్రై చేయండి

Back Pain: ఆధునిక జీవనశైలిలో.. నడుము నొప్పి అనేది వయసుతో సంబంధం లేకుండా చాలా మందిని బాధించే సాధారణ సమస్యగా మారింది. ఎక్కువసేపు కూర్చోవడం, సరైన విధంగా కూర్చోకపోవడం.. వ్యాయామం లేకపోవడం దీనికి ప్రధాన కారణాలు. కానీ తీవ్రమైన వెన్నునొప్పి ఉంటే డాక్టర్‌ను సంప్రదించడం ముఖ్యం. నొప్పికి ఇంట్లోనే కొన్ని చిట్కాలతో కూడా ఉపశమనం పొందవచ్చు.

1. వేడి, చల్లని చికిత్స:
వెన్నునొప్పి మొదలైన మొదటి 48 నుంచి 72 గంటలలోపు వాపును తగ్గించడానికి ఐస్ ప్యాక్‌ను ఉపయోగించడం మంచిది. నొప్పి ఉన్న ప్రాంతంలో సుమారు 20 నిమిషాల పాటు ఐస్ ప్యాక్‌ను పెట్టాలి. 72 గంటల తర్వాత.. కండరాలను సడలించడానికి రక్త ప్రసరణను మెరుగుపరచడానికి వేడి చికిత్స ఉపయోగించవచ్చు.

2. చురుకుగా ఉండండి, విశ్రాంతి కాదు:
సాధారణంగా నొప్పి వచ్చినప్పుడు పూర్తిగా పడుకోవాలని అనుకుంటారు. కానీ.. ఎక్కువసేపు మంచం మీద విశ్రాంతి తీసుకోవడం వల్ల కండరాలు మరింత బిగుసుకుపోయి నొప్పి ఎక్కువ అవుతుంది. వీలైనంత వరకు సాధారణ పనులు చేసుకోవడానికి ప్రయత్నించండి. వాకింగ్, ఈత, లేదా యోగా వంటి వ్యాయామాలు వెన్ను కండరాలను బలోపేతం చేసి.. వెన్నెముకకు మద్దతు ఇస్తాయి.

3. సరైన నిద్ర భంగిమ:

వెన్నునొప్పికి ఉపశమనం పొందడానికి మీరు పడుకునే భంగిమ చాలా ముఖ్యం.

పక్కకు తిరిగి పడుకుంటే: మోకాళ్ల మధ్య దిండు పెట్టుకోవడం వల్ల వెన్నెముక సరళ రేఖలో ఉంటుంది.

వెల్లకిలా పడుకుంటే: మోకాళ్ల కింద ఒక దిండు లేదా చుట్టిన టవల్ పెట్టుకోవడం ద్వారా వెన్నుపై ఒత్తిడి తగ్గుతుంది.

మీ పరుపు మధ్యస్థంగా దృఢంగా ఉండేలా చూసుకోండి.

4. కూర్చునే విధానం:

మీరు నిలబడేటప్పుడు.. కూర్చునేటప్పుడు లేదా నడిచేటప్పుడు సరైన భంగిమను పాటించడం ముఖ్యం.

కూర్చున్నప్పుడు: మీ వీపు నిటారుగా ఉంచి.. భుజాలను సడలించండి. మీ పాదాలు నేలపై పూర్తిగా ఆనించి.. మోకాళ్లు తుంటి కంటే కొద్దిగా ఎత్తులో ఉండేలా చూసుకోండి. వీపు కింది భాగంలో సపోర్ట్ కోసం చిన్న దిండు లేదా లుంబార్ సపోర్ట్ ఉపయోగించండి.

వస్తువులను పైకి లేపేటప్పుడు: నడుము వంచకుండా మోకాళ్లను వంచి.. వస్తువును మీ శరీరానికి దగ్గరగా ఉంచుకుని పైకి లేపండి.

5. కండరాల బలోపేతం, సాగతీత:
మీరు క్రమం తప్పకుండా కొన్ని సాధారణ వ్యాయామాలు చేయడం ద్వారా కండరాలు బలోపేతమవుతాయి. కోర్ కండరాలను (ఉదర , వెన్ను కండరాలు) బలోపేతం చేయడం వల్ల వెన్నెముకకు స్థిరత్వం లభిస్తుంది.

వ్యాపకాలు : క్యాట్-కౌ స్ట్రెచ్ , మోకాలిని ఛాతీ వరకు సాగదీయడం, చైల్డ్స్ పోజ్ వంటివి వెన్ను కండరాల బిగువును తగ్గిస్తాయి.

6. బరువు తగ్గడం:
అధిక బరువు ఉన్నట్లయితే.. ఆ అదనపు బరువు వెన్నెముకపై, డిస్క్‌లపై ఒత్తిడిని పెంచుతుంది. ఆరోగ్య కరమైన ఆహారం, క్రమం తప్పని వ్యాయామంతో బరువును నియంత్రించుకోవడం వెన్నునొప్పి తగ్గడానికి సహాయ పడుతుంది.

ఇంట్లో చికిత్స చేసినా నొప్పి తీవ్రంగా ఉంటే.. కొన్ని వారాల తర్వాత కూడా తగ్గక పోతే.. లేదా కాళ్ళలో తిమ్మిరి, బల హీనత వంటి లక్షణాలు కనిపిస్తే.. వెంటనే డాక్టర్‌ని లేదా ఫిజియో థెరపిస్ట్‌ను సంప్రదించడం చాలా అవసరం.