షుగర్ ఉన్నవాళ్లు వాకింగ్ ఒక్కటే చేస్తే లాభం లేదు.. ఇది కూడా జత చేయాల్సిందే!

Blood Sugar Control Tips: చాలామంది బ్లడ్ షుగర్ కంట్రోల్ చేసుకోవడానికి ముందుగా ఎంచుకునే మార్గం వాకింగ్. కానీ రోజూ నడుస్తున్నప్పటికీ పరగడుపున షుగర్ లెవెల్స్ పెరుగుతూనే ఉన్నాయా? అయితే మీరు కేవలం కార్డియో వ్యాయామాలపైనే ఆధారపడటం ఒక కారణం కావచ్చు. రక్తంలో చక్కెర స్థాయిలను నియంత్రించడంలో మన శరీరంలోని కండరాల పాత్ర అత్యంత కీలకమైనది.

కండరాల బలం ఎందుకు అవసరం?

మనం తిన్న ఆహారం ద్వారా వచ్చే గ్లూకోజ్‌ను స్వీకరించే అతిపెద్ద నిల్వ కేంద్రం మన కండరాలే. వయస్సు పెరిగే కొద్దీ, లేదా ఎక్కువగా కూర్చుని పనిచేయడం వల్ల శరీరంలో కండరాల పరిమాణం తగ్గుతుంది. దీనివల్ల గ్లూకోజ్‌ను గ్రహించే సామర్థ్యం తగ్గి షుగర్ లెవెల్స్ పెరుగుతాయి. కేవలం నడవటమే కాకుండా కండరాలకు తగినంత పని చెప్పినప్పుడే ఇన్సులిన్ సులభంగా పనిచేస్తుంది.

జిమ్‌కు వెళ్లాల్సిన పనిలేదు..

కండరాలను దృఢంగా మార్చుకోవడానికి పెద్ద పెద్ద జిమ్‌లకు వెళ్లాల్సిన అవసరం లేదు. మన ఇంట్లోనే లభించే చిన్న చిన్న వస్తువులతో లేదా సొంత శరీర బరువుతోనే కొన్ని వ్యాయామాలు చేయవచ్చు. రోజూ ఒక 10 నిమిషాల సమయం కేటాయిస్తే సరిపోతుంది. ఇది మీ దినచర్యను ఏమాత్రం ప్రభావితం చేయకుండా సులభంగా అలవాటవుతుంది.

Also Read: భారీ రాళ్లను అంత ఎత్తుకు ఎలా తీసుకెళ్లారో తెలిస్తే దిమ్మతిరుగుద్ది.. పిరమిడ్ల నిర్మాణ సీక్రెట్ ఇదే!

ఇంట్లోనే చేసుకోగల వర్కౌట్స్..

కుర్చీలో కూర్చుని లేవడం ద్వారా తొడల కండరాలు బలంగా మారతాయి. గోడను బలంగా ముందుకు నెడుతున్నట్లుగా చేయడం వల్ల ఛాతీ, చేతులకు బలం చేకూరుతుంది. శరీర బరువును సమతుల్యంగా ఉంచుతూ ప్లాంక్ హోల్డ్ చేయడం వల్ల పొత్తికడుపు కండరాలు దృఢపడతాయి. అలాగే ఇంట్లో ఉన్న బరువైన వస్తువులను పట్టుకుని కాసేపు అటుఇటు నడవటం వల్ల పూర్తి శరీరానికి మంచి కసరత్తు లభిస్తుంది.

అలవాట్లతో పాటు వ్యాయామం..

ఈ 10 నిమిషాల దినచర్య షుగర్ వ్యాధికి పూర్తి పరిష్కారం అని చెప్పలేము. మంచి పోషకాహారం తీసుకోవడం, వైద్యుల సూచనలు పాటించడం ఎంత ముఖ్యమో, కండరాలను చురుగ్గా ఉంచడం కూడా అంతే ముఖ్యం. 40 ఏళ్లు దాటిన వారు ఇప్పుడు పెంచుకునే కండరాల బలమే భవిష్యత్తులో వారికి మెటబాలిక్ రక్షణగా నిలుస్తుంది.

నడకకు బలాన్ని జోడించాలి..

షుగర్ తగ్గడం లేదు కదా అని మార్నింగ్ వాక్‌ను ఎట్టి పరిస్థితుల్లోనూ ఆపవద్దు. నడక వల్ల లభించే ఆరోగ్య ప్రయోజనాలు దానికి ఉంటాయి. అయితే దాంతో పాటు ఈ చిన్న చిన్న స్ట్రెంగ్త్ వ్యాయామాలను జోడించడం వల్ల మరింత మెరుగైన ఫలితాలు ఉంటాయి. కాబట్టి.. రోజూ నడుస్తూనే, మీ కండరాలకు కూడా కాస్త పని చెప్పడం ప్రారంభించండి.

Also Read: నోటి పూత తగ్గట్లేదా? ఇది క్యాన్సర్ లక్షణమా? డాక్టర్లు ఏం చెబుతున్నారంటే..