పిల్లలను ఏ వయసు నుంచి వేరుగా పడుకోబెట్టాలి? సరైన సమయంలోనే ఈ అలవాట్లు నేర్పాలి

తల్లిదండ్రులందరూ తమ పిల్లలను బాధ్యతాయుతంగా, స్వతంత్రంగా ఎదగాలని కోరుకుంటారు. మంచి అలవాట్లు చిన్నప్పటి నుంచే నేర్పాలని భావిస్తారు. అయితే ప్రతి నైపుణ్యాన్ని నేర్చుకోవడానికి సరైన సమయం, సరైన వయసు ఉంటుంది. పిల్లల ఎదుగుదల దశలవారీగా జరుగుతుంది కాబట్టి, వారిపై అధిక అంచనాలు పెట్టకూడదు.

పిల్లలు ఒంటరిగా నిద్రపోవడానికి సరైన వయసు అవసరం

చాలా మంది తల్లిదండ్రులు చిన్న వయసులోనే పిల్లలను విడిగా పడుకోబెట్టాలని అనుకుంటారు. కానీ పిల్లలు మానసికంగా సిద్ధమైన తర్వాతే ఈ అలవాటు నేర్పడం మంచిది. సాధారణంగా ఏడు సంవత్సరాల వయసు తర్వాత చాలామంది పిల్లలు ఒంటరిగా నిద్రపోవడానికి సౌకర్యంగా భావిస్తారు. ఈ మార్పును బలవంతంగా కాకుండా నెమ్మదిగా అలవాటు చేయాలి.

వయసుతో పాటు క్రమంగా ఏకాగ్రత పెరుగుతుంది

5 లేదా 6 సంవత్సరాల లోపు పిల్లలు ఎక్కువసేపు ఒకే పనిపై దృష్టి పెట్టలేరు. ఈ వయసులో ఆటల ద్వారా నేర్చుకోవడం వారికి సహజం. చదివేటప్పుడు మధ్యలో లేచి తిరగడం కూడా సాధారణమే. చిన్న చిన్న పాఠాలు, మధ్యలో బ్రేక్స్ (విరామాలు) ఇస్తే వారు బాగా నేర్చుకుంటారు.

వస్తువులను సర్దుకోవడం చిన్నప్పటి నుంచే నేర్పాలి

మూడు నుంచి నాలుగు సంవత్సరాల మధ్య పిల్లలు సులభమైన సూచనలను అర్థం చేసుకోవడం ప్రారంభిస్తారు. ఈ దశలో బొమ్మలను తిరిగి వాటి స్థానంలో పెట్టడం వంటి చిన్న బాధ్యతలు నేర్పవచ్చు. మొదట్లో తప్పులు చేసినా విమర్శించకుండా ప్రోత్సహిస్తే మంచి అలవాట్లు ఏర్పడతాయి.

పిల్లలు స్వతంత్రంగా హోంవర్క్‌ చేయాలి

7 నుంచి 8 సంవత్సరాల వయసు పిల్లలు బాధ్యతను బాగా అర్థం చేసుకుంటారు. ఈ సమయంలో తల్లిదండ్రులు ప్రతి పనిలో జోక్యం తగ్గించాలి. సమస్యలను పిల్లలే ఆలోచించి పరిష్కరించే అవకాశం ఇవ్వాలి. అవసరమైనప్పుడు మాత్రమే మార్గనిర్దేశం చేయడం మంచిది.

పంచుకోవడం కూడా వయసుతో నేర్చుకునే నైపుణ్యమే

నాలుగు నుంచి ఐదు సంవత్సరాల వయసులో పిల్లలు ఇతరుల భావాలను అర్థం చేసుకోవడం ప్రారంభిస్తారు. అప్పుడే వారికి తమ భావాలు కుటుంబంతో పంచుకోవడం నేర్పాలి. చిన్న పిల్లలు తమ వస్తువులను ఇవ్వడానికి ఇష్టపడకపోవడం సహజం. ఇది తప్పు అని వారికి కోపం లేకుండా ఓర్పు, ప్రేమతో వివరించాలి. వారు పంచుకున్నప్పుడు ప్రశంసించడం ద్వారా ఈ అలవాటు బలపడుతుంది.

Also Read: పెద్ద రిస్క్ అని తెలిసినా భయపడరు.. ఈ తేదీల్లో పుట్టినవారి చేతి నిండా ధనమే

పిల్లల ఎదుగుదలను అర్థం చేసుకోవడం చాలా అవసరం

ప్రతి పిల్లాడు నేర్చుకోవడానికి సమయం తీసుకుంటాడు. ఒకరు వేగంగా నేర్చుకుంటే, మరొకరు నేర్చుకోవడానికి సమయం పడుతుంది. ఇతర పిల్లలతో పోల్చడం కంటే వారి భావోద్వేగ అవసరాలను అర్థం చేసుకోవాలి. ప్రేమ, సహనం, ప్రోత్సాహం ఉన్న వాతావరణంలో పిల్లలు మరింత ఆత్మవిశ్వాసంతో ఎదుగుతారు. సరైన సమయంలో నేర్పిన చిన్న అలవాట్లు జీవితాంతం మంచి ఫలితాలు ఇస్తాయి.