భారతీయ పురుషుల్లో ఎందుకు పొట్టకొవ్వు అధికంగా ఉంటుంది? దీనికి కారణాలు ఇవే

ప్రస్తుతం చాలా మంది భారతీయ పురుషుల్లో పొట్ట చుట్టూ కొవ్వు పెరగడం సాధారణ సమస్యగా మారింది. ముఖ్యంగా యువతలో ఈ సమస్య గతంతో పోలిస్తే ఎక్కువగా కనిపిస్తోంది. ఇతర దేశాల్లో ప్రజలు ఫిట్‌గా ఉండడం చూసి చాలా మంది భారతీయులు ఎందుకు ఇలా జరుగుతోందని ఆలోచిస్తుంటారు. నిపుణుల అభిప్రాయం ప్రకారం.. దీనికి కేవలం జన్యుపరమైన కారణాలు మాత్రమే కాకుండా, రోజువారీ జీవనశైలి కూడా కారణం. ఆహారం, వ్యాయామం, నిద్ర, ఒత్తిడి వంటి అంశాలు శరీర బరువుపై ప్రభావం చూపుతాయి.

అధిక కార్బోహైడ్రేట్లు, తక్కువ ప్రోటీన్ తీసుకోవడం

భారతీయుల ఆహారంలో అన్నం, రొట్టెలు వంటి కార్బోహైడ్రేట్లు ఎక్కువగా ఉంటాయి. అయితే గుడ్లు, పప్పులు, పనీర్, చేపలు లేదా మాంసం వంటి ప్రోటీన్ ఫుడ్స్ తక్కువగా తీసుకుంటారు. ప్రోటీన్ శరీర కండరాలను కాపాడటంతో పాటు ఎక్కువసేపు ఆకలి రాకుండా చేస్తుంది. తక్కువ ప్రోటీన్ తీసుకోవడం వల్ల ఎక్కువగా తినే అలవాటు పెరుగుతుంది. అలాగే టీతో పాటు బిస్కెట్లు, వేయించిన పదార్థాలు, తీపి పదార్థాలను తరచుగా తీసుకోవడం వల్ల అదనపు కేలరీలు శరీరంలో చేరుతాయి.

ఆలస్యంగా భోజనం చేయడం, ఎక్కువసేపు కూర్చోవడం కూడా కారణమే

ప్రస్తుతం చాలామంది కంప్యూటర్ల ముందు ఎక్కువసేపు కూర్చునే ఉద్యోగాలు చేస్తున్నారు. శారీరక కదలికలు తగ్గిపోవడంతో శరీరంలో కొవ్వు పేరుకుపోతుంది. అలాగే రాత్రి ఆలస్యంగా భోజనం చేయడమే కాకుండా ఆ సమయంలో ఎక్కువ తినడం కూడా ఆరోగ్యానికి మంచిది కాదు. ఆ సమయంలో తీసుకున్న కేలరీలను ఖర్చు చేసే అవకాశం లేకపోవడంతో అవి కొవ్వుగా మారి పొట్ట చుట్టూ పేరుకుపోతాయి.

తక్కువ నిద్ర, అధిక ఒత్తిడి బరువు పెరగడానికి దారితీస్తాయి

శరీరంలో ఆకలి, జీవక్రియలను నియంత్రించే హార్మోన్లపై నిద్ర ప్రభావం చూపుతుంది. చాలామంది రోజుకు ఐదు లేదా ఆరు గంటలు మాత్రమే నిద్రపోతున్నారు. దీని వల్ల అనారోగ్యకరమైన ఆహారం తినాలనే కోరిక పెరుగుతుంది. అలాగే అధిక ఒత్తిడి కారణంగా కొంతమంది ఎక్కువగా తినడం ప్రారంభిస్తారు. దీంతో బరువు పెరిగే ప్రమాదం ఉంటుంది.

Also Read: ఇంకా రూ.100, రూ.200 పెట్రోల్ పట్టిస్తున్నారా? పెట్రోల్ పంప్‌లలో ఇలా మోసాలు జరుగుతున్నాయి

ఫైబర్ లేని ఆహారం, తక్కువ నీరు కూడా సమస్య

పండ్లు, కూరగాయలు, తృణధాన్యాలు వంటి ఫైబర్ అధికంగా ఉండే ఆహారాలను చాలామంది తక్కువగా తీసుకుంటారు. అలాగే సరిపడా నీరు తాగకపోవడం వల్ల జీర్ణక్రియ దెబ్బతింటుంది. దీంతో తరచూ ఆకలి వేయడం, చిరుతిండి తినడం వంటి అలవాట్లు పెరుగుతాయి.

చిన్న చిన్న మార్పులు పొట్ట కొవ్వును తగ్గించడంలో సహాయపడతాయి

అకస్మాత్తుగా డైటింగ్ చేయడం కంటే క్రమంగా ఆరోగ్యకరమైన అలవాట్లు పెంచుకోవడం మంచిది. అందుకే భోజనంలో ప్రతీసారి ప్రోటీన్ ఉండేలా చూసుకోవాలి. షుగర్ డ్రింక్స్, ప్రాసెస్ చేసిన ఆహారాలను తగ్గించాలి. రోజుకు కనీసం 8,000 నుంచి 10,000 అడుగులు నడవడం మంచిది. వారానికి నాలుగు లేదా ఐదు రోజులు వ్యాయామం చేయాలి. రోజుకు ఏడు నుంచి ఎనిమిది గంటలు నిద్రపోవడం కూడా అవసరం.

పొట్ట కొవ్వు ఎక్కువగా ఉండడానికి చాలా కారణాలున్నాయి. సరైన ఆహారం, క్రమంగా వ్యాయామం, తగినంత నిద్ర, ఒత్తిడిని నియంత్రించడం ద్వారా మంచి ఆరోగ్యాన్ని పొందవచ్చు. నిరంతరంగా ఆరోగ్యకరమైన అలవాట్లు పాటించడం వల్ల దీర్ఘకాలంలో మంచి ఫలితాలు కనిపిస్తాయి.