Gas Geyser: ఇంట్లో గ్యాస్ గీజర్లు వాడుతున్నారా ? ఇవి తప్పక తెలుసుకోండి

Gas Geyser: కాలం ఏదైనా వేడి నీటి కోసం చాలా మంది ఇళ్లలో గ్యాస్ గీజర్లను వాడుతుంటారు. ఇవి తక్కువ ఖర్చుతో.. తక్కువ సమయంలో వేడి నీటిని అందిస్తాయి. అయితే.. వీటిని సరైన జాగ్రత్తలతో వాడకపోతే ప్రాణాలకే ప్రమాదం. ముఖ్యంగా ఇటీవల అనేక ప్రాంతాల్లో గ్యాస్ గీజర్ల వల్ల విష వాయువు పీల్చి మరణించిన ఘటనలు చూస్తున్నాం. మీరు కూడా ఇంట్లో గ్యాస్ గీజర్ వాడుతున్నట్లయితే.. మీ కుటుంబం సురక్షితంగా ఉండటానికి తప్పకుండా తెలుసుకోవాల్సిన..పాటించాల్సిన ముఖ్యమైన విషయాలను గురించిన పూర్తి వివరాలను ఇప్పుడు తెలుసుకుందాం.

గ్యాస్ గీజర్ ప్రమాదానికి ప్రధాన కారణం: కార్బన్ మోనాక్సైడ్:
గ్యాస్ గీజర్ల వల్ల జరిగే ప్రమాదాలకు ప్రధాన కారణం కార్బన్ మోనాక్సైడ్ విషప్రభావం.

CO అంటే ఏమిటి ?
ఇది రంగు, రుచి, వాసన లేని విషపూరిత వాయువు. గ్యాస్ పూర్తిగా మండనప్పుడు ఇది విడుదలవుతుంది.

ప్రమాదం ఎక్కడ?: వెంటిలేషన్ (గాలి, వెలుతురు) లేని చిన్న బాత్రూమ్‌లలో గీజర్ పనిచేసినప్పుడు.. అది గాలిలోని ఆక్సిజన్‌ను ఉపయోగించుకుంటుంది. ఇలాంటి సమయంలో ఆక్సిజన్ తగ్గి.. CO పెరిగినప్పుడు, ఆ వాయువును పీల్చడం ద్వారా మనిషి స్పృహ కోల్పోవడం.. లేదా కొన్ని నిమిషాల్లోనే మరణించడం వంటివి జరుగుతాయి.

లక్షణాలు: తలనొప్పి, కళ్లు తిరగడం, వికారం, వాంతులు, గందరగోళం, అలసటగా అనిపించడం వంటివి కనిపిస్తాయి. ఇలాంటి లక్షణాలు కనిపిస్తే వెంటనే.. అప్రమత్తం కావాలి.

మీ ఇంట్లో గ్యాస్ గీజర్ ఉంటే పాటించాల్సిన ముఖ్యమైన జాగ్రత్తలు:

1. వెంటిలేషన్ (గాలి సౌకర్యం) తప్పనిసరి:
గీజర్ అమరిక: గ్యాస్ గీజర్‌ను బాత్రూమ్‌లో కాకుండా.. బాత్రూమ్ బయట, గాలి బాగా తగిలే ప్రదేశంలో ఏర్పాటు చేయించడం ఉత్తమం.

చిమ్నీ/పొగ పైపు: గీజర్ నుంచి వచ్చే పొగ, విషవాయువులు నేరుగా ఇంట్లోకి రాకుండా.. బయటకు పోయే విధంగా సరైన చిమ్నీ లేదా వెంటిలేషన్ పైపు ఉండేలా చూసుకోవాలి. ఇది నిపుణులతో మాత్రమే అమర్చాలి.

ఎగ్జాస్ట్ ఫ్యాన్: బాత్రూమ్‌లో గీజర్ ఉంటే.. ఎగ్జాస్ట్ ఫ్యాన్‌ను తప్పకుండా ఏర్పాటు చేసుకోండి. గీజర్ ఆన్‌లో ఉన్నప్పుడు ఎగ్జాస్ట్ ఫ్యాన్ కూడా ఆన్‌లో ఉండేలా చూసుకోవాలి.

కిటికీ/వెంటిలేటర్: స్నానం చేసేటప్పుడు బాత్రూమ్ కిటికీ లేదా వెంటిలేటర్‌ను తప్పకుండా తెరిచి ఉంచాలి.

2. వాడే విధానంలో మార్పులు:
స్నానానికి ముందు ఆఫ్ చేయండి: గ్యాస్ గీజర్‌ను స్నానం చేయడానికి కొద్దిసేపు ముందు మాత్రమే ఆన్ చేయండి. నీళ్లు వేడెక్కిన వెంటనే గీజర్‌ను స్విచ్ ఆఫ్ చేసి, ఆ తర్వాతే స్నానం చేయండి.

గ్యాప్ ఇవ్వండి: ఒకసారి గీజర్ వాడిన తర్వాత.. మళ్లీ వాడటానికి కొంత సమయం గ్యాప్ ఉండేలా చూసుకోవాలి.

పిల్లలకు దూరం: పిల్లలు లేదా వృద్ధులు గీజర్‌ను ఒంటరిగా వాడకుండా చూడాలి.

3. రెగ్యులర్ చెక్, సర్వీసింగ్:
లీకేజీ చెక్: గ్యాస్ సిలిండర్ లేదా గీజర్‌కు సంబంధించిన పైపులలో గ్యాస్ లీకేజీ ఏమైనా ఉందా అని తరచుగా చెక్ చేయించుకోవాలి.

ఉపయోగం: గీజర్ పనితీరు సరిగా ఉండేలా.. CO ఉత్పత్తిని నియంత్రించడానికి సంవత్సరానికి ఒకసారి నిపుణులతో తప్పనిసరిగా సర్వీస్ చేయించాలి.

4. అత్యవసర చర్యలు:
మీకు లేదా బాత్రూమ్‌లో ఉన్నవారికి తలనొప్పి, మైకం వంటి లక్షణాలు కనిపిస్తే.. వెంటనే గీజర్‌ను ఆపేసి, తలుపులు తెరిచి, బాధితుడిని వెంటనే బాగా గాలి తగిలే ప్రదేశానికి తీసుకెళ్లండి.

పరిస్థితి తీవ్రంగా ఉంటే ఆలస్యం చేయకుండా వెంటనే ఆసుపత్రికి తీసుకెళ్లండి.

గుర్తుంచుకోండి: గ్యాస్ గీజర్లు ఆర్థికంగా మేలైనవే అయినా.. సరైన జాగ్రత్తలు తీసుకోకపోతే ప్రమాదం పొంచి ఉంటుంది. మీ కుటుంబ భద్రతకు వెంటిలేషన్ అత్యంత ముఖ్యం.