Tollywood: ఒకప్పుడు హోమ్లీ పాత్రలతో తెలుగు ప్రేక్షకుల గుండెల్లో చెరగని ముద్ర వేసుకున్న నటి లయ. పెళ్లి తర్వాత సినిమాలకు లాంగ్ గ్యాప్ ఇచ్చిన ఈ సీనియర్ బ్యూటీ… మళ్లీ ఇండస్ట్రీలో బిజీ కావాలని గట్టి ప్రయత్నాలే చేస్తోంది. అయితే, తాజాగా ఆమె నటించిన రెండు క్రేజీ సినిమాలు జూలై 17న ఒకే రోజు బాక్సాఫీస్ వద్ద తలపడటానికి సిద్ధమయ్యాయి. జగపతిబాబు సరసన నటించిన ‘వదల’ మరియు శ్రీకాంత్ సరసన నటించిన ‘మిస్టర్ మిడిల్ క్లాస్’ చిత్రాలు ఒకే రోజు విడుదలవుతుండటం ఇండస్ట్రీలో హాట్ టాపిక్గా మారింది. మరి ఈ రెండు సినిమాల్లో కనీసం ఒక్కటైనా హిట్ అయి ఆమెకు పూర్వవైభవం తెస్తుందా? అని ఫాన్స్ ఆసక్తిగా ఎదురుచూస్తున్నారు ..ఆ వివరాలు చూద్దాం..
ఒకే హీరోయిన్ నటించిన రెండు సినిమాలు ఒకే రోజు థియేటర్లలోకి రావడం చాలా అరుదుగా జరుగుతుంది. ఇలాంటి పరిస్థితి లయకు ఒకవైపు సవాల్గా మారినా, మరోవైపు మంచి పబ్లిసిటీని తెచ్చిపెడుతోంది. ఇక జూలై 17న థియేటర్లకు వెళ్లే ప్రేక్షకుడికి రెండు విభిన్న పాత్రల్లో లయ కనిపించబోతోంది. ఈ క్లాష్ వల్ల థియేటర్ల పంపకాల్లో కొంత ఇబ్బంది ఎదురైనా… జనం నోళ్లలో లయ పేరు గట్టిగా నానుతోంది. రెండు చిత్రాలలో ఏ ఒక్కటి పాజిటివ్ టాక్ తెచ్చుకున్నా ఆమె సెకండ్ ఇన్నింగ్స్కు తిరుగుండదు.
గతంలో లయకు ‘మనోహరం’ లాంటి క్లాసిక్ హిట్ ఇచ్చిన జగపతిబాబుతో కలిసి ఆమె చేసిన హారర్ థ్రిల్లర్ మూవీ ‘వదల’. తమ్మారెడ్డి భరద్వాజ నిర్మించిన ఈ సినిమా ట్రైలర్ ఇప్పటికే మంచి రెస్పాన్స్ తెచ్చుకుంది. ఇక లయ కెరీర్లో ఇప్పటివరకు ఇలాంటి పూర్తి స్థాయి హారర్ జోనర్ సినిమా చేయలేదు. జగపతిబాబుతో ఉన్న సెంటిమెంట్ వర్కౌట్ అయి, ఈ హారర్ కాన్సెప్ట్ కనుక క్లిక్ అయితే… లయకు నటిగా చాలా కాలం తర్వాత ఒక భారీ సక్సెస్ దక్కినట్టే అవుతుంది.
also read:బన్నీ కొత్త ప్రాజెక్ట్.. తెలుగు డైరెక్టర్స్ ని పక్కన పెట్టేసినట్టేనా?
మరోవైపు, శ్రీకాంత్ సరసన గతంలో సూపర్ హిట్ సినిమాల్లో నటించిన లయ… ‘మిస్టర్ మిడిల్ క్లాస్’ సినిమాతో మళ్లీ ఆయనతో జతకట్టింది. కామెడీ మరియు ఫ్యామిలీ సినిమాలకు కేరాఫ్ అడ్రస్ అయిన జి. నాగేశ్వరరెడ్డి ఈ చిత్రానికి దర్శకుడు. లయకు సహజంగానే ఫ్యామిలీ ఆడియన్స్లో మంచి ఫాలోయింగ్ ఉంది. ఇక ఈ మధ్య కాలంలో థియేటర్లకు ఫ్యామిలీ ఎంటర్టైనర్ సినిమాలు తక్కువగా వస్తున్నాయి కాబట్టి… క్లీన్ కామెడీతో వచ్చే ఈ సినిమా లయకు సేఫ్ జోన్ అని చెప్పొచ్చు.
రీ-ఎంట్రీలో వచ్చిన ‘తమ్ముడు’ వంటి చిత్రాలు ఆశించిన విజయం సాధించకపోయినా లయ క్రేజ్ ఏమాత్రం తగ్గలేదు. ఇప్పుడు జూలై 17న ఒకేసారి ఫ్యామిలీ ఎంటర్టైనర్, హారర్ థ్రిల్లర్ వంటి రెండు విభిన్న జోనర్లతో ఆమె ప్రేక్షకుల ముందుకు వస్తోంది. ఇక ఈ రెండింటిలో ఏ ఒక్క సినిమా క్లిక్ అయినా లయకు టాలీవుడ్లో మళ్లీ బిజీ అయ్యే అవకాశాలు పుష్కలంగా ఉన్నాయి. మరి ఈ ఇద్దరు సీనియర్ హీరోల సరసన నటించిన లయ… ఈ అరుదైన డబుల్ రిలీజ్ పోటీని తట్టుకుని బాక్సాఫీస్ వద్ద తన పూర్వవైభవాన్ని ఎలా అందుకుంటుందో చూడాలి.
Share
బన్నీ కొత్త ప్రాజెక్ట్.. తెలుగు డైరెక్టర్స్ ని పక్కన పెట్టేసినట్టేనా?
