Janhvi Kapoor: పెద్ది సినిమాకి సమస్యగా మారిన జాన్వి కపూర్.. ఏమైందంటే..!

Janhvi Kapoor: బాలీవుడ్ నటి జాన్వీ కపూర్ మరోసారి సోషల్ మీడియాలో ట్రోలింగ్‌కు గురయ్యారు. మహిళల లెగ్గింగ్స్ బ్రాండ్‌కు చేసిన ఒక కొత్త ప్రకటనలో ఆమె ఓవర్ యాక్టింగ్ చేసిందని నెటిజన్లు విమర్శిస్తున్నారు. ఈ యాడ్ విడుదలైన వెంటనే సోషల్ మీడియాలో జాన్వీపై నెగెటివ్ కామెంట్లు పెరిగాయి. ఇది ఆమెకు కొత్త విషయం కాదు. 2018లో విడుదలైన ధడక్ సినిమాతో బాలీవుడ్‌లో అడుగుపెట్టినప్పటి నుంచి జాన్వీ తరచూ ట్రోలింగ్‌ను ఎదుర్కొంటూనే ఉన్నారు.

ఇప్పటి వరకు జాన్వీ దాదాపు 14 సినిమాల్లో నటించారు. రొమాంటిక్, బయోపిక్, థ్రిల్లర్ లాంటి విభిన్న జానర్లలో కనిపించినా, ఆమె నటనపై ఇంకా పూర్తి స్థాయి నమ్మకం రాలేదని కొంతమంది ప్రేక్షకులు అంటున్నారు. ముఖ్యంగా మాస్ ఆడియన్స్‌ను ఆకట్టుకునే స్థాయిలో ఆమె ఇంకా నిలబడలేకపోయిందన్న అభిప్రాయం ఉంది.

గుంజన్ సక్సేనా: ది కార్గిల్ గర్ల్, మిల్లీ, ఉలాజ్, హోంబౌండ్ వంటి సినిమాల్లో ఆమె నటనకు కొంత ప్రశంస లభించింది. కానీ ఆ సినిమాలు పెద్ద స్థాయిలో ప్రభావం చూపలేకపోయాయి. దీంతో జాన్వీ కెరీర్‌పై మిశ్రమ స్పందన కొనసాగుతోంది.

2024లో జాన్వీ తెలుగు చిత్ర పరిశ్రమలోకి అడుగుపెట్టారు. జూనియర్ ఎన్టీఆర్‌తో కలిసి నటించిన దేవర పార్ట్ 1 సినిమాలో ఆమె గ్లామరస్ పాత్రలో కనిపించారు. అయితే ఆ సినిమాలో ఆమె పాత్రకు పెద్ద ప్రాధాన్యం లేదని ప్రేక్షకులు భావించారు. నటనకు ఎక్కువ స్కోప్ లేదన్న కామెంట్లు కూడా వచ్చాయి.

ఇప్పుడు జాన్వీ తన రెండో తెలుగు సినిమా పెద్ది కోసం సిద్ధమవుతున్నారు. రామ్ చరణ్ హీరోగా నటిస్తున్న ఈ సినిమా 2026 మార్చి 27న విడుదల కానుంది. ఇప్పటికే విడుదలైన “చికిరి” అనే ప్రమోషనల్ సాంగ్ తెలుగుతో పాటు హిందీలో కూడా మంచి హిట్ అయింది. అయితే ఈ పాటలో కూడా జాన్వీని ఎక్కువగా గ్లామర్ కోణంలోనే చూపించారని కొందరు విమర్శిస్తున్నారు.

దీంతో పెద్ది సినిమాలో జాన్వీ పాత్రకు నిజంగా బలమైన కథా బలం ఉంటుందా? అనే సందేహాలు మొదలయ్యాయి. దర్శకుడు బుచ్చి బాబు సానా ఆమెను నటనకు ప్రాధాన్యం ఉన్న పాత్రలో చూపిస్తారా లేదా అన్నది చూడాలి. బాలీవుడ్‌లో విమర్శలు ఎదుర్కొంటున్న జాన్వీకి తెలుగు సినిమా పరిశ్రమ కొత్త గుర్తింపును ఇస్తుందేమోనని అభిమానులు ఆశతో ఎదురుచూస్తున్నారు.

ALSO READ: Nari Nari Naduma Murari OTT: ఓటీటీలోకి వచ్చేస్తోన్న నారి నారి నడుమ మురారి.. ఎప్పటినుంచంటే..!