మెగాస్టార్ చిరంజీవి ఫస్ట్ మైథలాజికల్ మూవీకి పాతికేళ్లు.. అప్పుడే ఆ రూల్ బ్రేక్…

Sri Manjunatha Movie: తెలుగు సినిమా చరిత్రలో భక్తిరస చిత్రాలకు, పౌరాణిక చిత్రాలకు ప్రత్యేక స్థానం ఉంది. ముఖ్యంగా దర్శకేంద్రుడు కె. రాఘవేంద్రరావు, రచయిత జె.కె. భారవిల కలయికలో వచ్చిన ‘అన్నమయ్య’ సృష్టించిన సంచలనం అంతా ఇంతా కాదు. అదే క్రేజీ కాంబినేషన్‌లో, చిన్ని ఫిల్మ్స్ బ్యానర్‌పై నారా జయశ్రీదేవి నిర్మాణంలో 2001 జూన్ 22న విడుదలైన మరో అద్భుత దృశ్యకావ్యం “శ్రీ మంజునాథ”. కన్నడ, తెలుగు భాషల్లో ఏకకాలంలో భారీ బడ్జెట్‌తో తెరకెక్కిన ఈ చిత్రం, బాక్సాఫీస్ వద్ద ఘనవిజయం సాధించింది.

నటీనటుల అద్భుత అభినయం

ఈ చిత్రంలో మెగాస్టార్ చిరంజీవి పరమశివుడిగా నటించగా, లోకమాత పార్వతీ దేవిగా నటి మీనా కనిపించారు. నాస్తికుడి నుండి పరమ శివభక్తుడిగా మారే ‘భక్త మంజునాథుడి’గా యాక్షన్ కింగ్ అర్జున్ తన కెరీర్‌లోనే అత్యుత్తమ నటనను కనబరిచారు. ఆయన భార్య కాత్యాయిని పాత్రలో దివంగత నటి సౌందర్య జీవించారు. అలాగే కన్నడ రెబల్ స్టార్ అంబరీష్, సుమలత లు రాజు, రాణి పాత్రలలో మెప్పించారు.

మ్యూజికల్ వండర్

సంగీత దర్శకుడు హంసలేఖ ఈ చిత్రానికి అందించిన స్వరాలు సినిమాను మరో స్థాయికి తీసుకెళ్లాయి. ముఖ్యంగా వేదవ్యాస రంగభట్టర్ రచనలో, శంకర్ మహదేవన్ ఆలపించిన “ఓం మహాప్రాణ దీపం శివం శివం…” అనే శ్లోక రూప గీతం అప్పట్లో ఒక ఊపు ఊపింది. నేటికీ శివరాత్రి వచ్చిందంటే ప్రతి శివాలయంలోనూ ఈ పాట మారుమోగుతూనే ఉంటుంది. “ఒక్కడే ఒక్కడే మంజునాథుడొక్కడే”, “ఆనంద పరమానంద” వంటి పాటలు కూడా ప్రేక్షకులను భక్తి పారవశ్యంలో ముంచెత్తాయి.

షూటింగ్ నాటి ఒక ఆసక్తికర విశేషం

ఈ చిత్ర షూటింగ్ సమయంలో ఒక అరుదైన, ఆసక్తికరమైన విశేషం జరిగింది. మెగాస్టార్ చిరంజీవికి తన కెరీర్‌లో ఎప్పటికైనా ఒక పూర్తి స్థాయి పౌరాణిక చిత్రంలో దేవుడి పాత్ర పోషించి మెప్పించాలనే బలమైన కోరిక ఉండేది. సాధారణంగా ఇటువంటి దైవ పాత్రలు నందమూరి తారక రామారావు (NTR) గారికే ఎక్కువగా నప్పుతాయనే భావన అప్పట్లో ఉండేది. అయితే కె. రాఘవేంద్రరావు శివుడి పాత్ర కోసం చిరంజీవిని సంప్రదించినప్పుడు ఆయన ఎంతో సంతోషంగా ఒప్పుకున్నారు. ఈ పాత్ర కోసం చిరంజీవి షూటింగ్ జరిగినన్ని రోజులూ ఎంతో నిష్ఠతో, ఉపవాసాలు ఉంటూ, కేవలం పండ్లను మాత్రమే ఆహారంగా తీసుకునేవారట. కమర్షియల్ ఇమేజ్ ఉన్న ఒక స్టార్ హీరో, దేవుడి పాత్ర కోసం అంతగా లీనమై నటించడం అప్పట్లో ఇండస్ట్రీలో పెద్ద విశేషంగా చెప్పుకున్నారు.