Dog population: దేశం మొత్తం మీద ఒకప్పుడు మనం గమనించని సమస్య.. ఇప్పుడు పెద్ద చర్చకు దారి తీస్తోంది. వీధి కుక్కలు మన జీవితంలో భాగమే అయినా, వీరి సంఖ్య ఏ స్థాయికి చేరిందో వింటే ఆశ్చర్యం కలుగుతుంది. నగరాల వీధుల్లో గుంపులుగా తిరుగుతూ, కొన్ని సార్లు ప్రాణాలను హరిస్తూ, మరికొన్ని సార్లు చిన్నపిల్లలను భయపెట్టే ఈ సమస్య.. ఇప్పుడు దేశంలో హాట్టాపిక్గా మారింది. కానీ మీకు ఒక ప్రశ్న.. ఏ రాష్ట్రంలో ఎక్కువ వీధి కుక్కలు ఉన్నాయో మీకు తెలుసా? ఇంకా మన తెలుగు రాష్ట్రాల్లో ఈ సంఖ్య ఎంత ఉందో వినగానే మీరు ఆశ్చర్యపోతారు.
ఇంతలోనే సుప్రీం కోర్టు కూడా రంగంలోకి దిగి, వీధి కుక్కలపై నియంత్రణకు ఆదేశాలు జారీ చేసింది. ఢిల్లీలో వీటిని పట్టి ప్రత్యేక షెల్టర్లకు తరలించాలని సూచించింది. అయితే జంతు హక్కుల సంఘాలు ఈ ఆలోచనపై తీవ్రంగా అభ్యంతరం వ్యక్తం చేస్తున్నాయి. ఎందుకంటే, ఢిల్లీలోనే 55 వేల కంటే ఎక్కువ వీధి కుక్కలు ఉన్నాయంటే, కేవలం 5 వేల కుక్కలకు మాత్రమే స్థలమున్న షెల్టర్లు ఈ సమస్యను ఎంతవరకు పరిష్కరిస్తాయో అనేది పెద్ద ప్రశ్న.
దేశంలో వీధి కుక్కల సంఖ్య ఎంత?
జంతు సంరక్షణ విభాగం నవంబర్ 2023 రిపోర్ట్ ప్రకారం, దేశం మొత్తం మీద సుమారు 1.53 కోట్లు వీధి కుక్కలు సంచరిస్తున్నాయి. అంటే దేశ జనాభాలో దాదాపు 1% కుక్కలే. ఇది కేవలం లెక్కల్లో చూసినా షాకింగ్ ఫిగర్. ఈ లిస్టులో టాప్లో ఉన్న రాష్ట్రం ఉత్తరప్రదేశ్. ఇక్కడ ఒక్క రాష్ట్రంలోనే 20,59,261 వీధి కుక్కలు ఉన్నాయి. రెండో స్థానంలో ఒడిశా ఉంది 17,34,399 కుక్కలతో. మూడో స్థానంలో మహారాష్ట్ర (12,76,399), నాలుగో స్థానంలో రాజస్థాన్ (12,75,596), ఐదో స్థానంలో కర్ణాటక (11,41,173) ఉన్నాయి.
పెద్ద నగరాల్లో పరిస్థితి ఎలా ఉంది?
మెట్రో నగరాల్లో 1,36,866 వీధి కుక్కలతో బెంగళూరు టాప్లో ఉంది. తరువాత ఢిల్లీ (55,462), ముంబై (50,799), చెన్నై (24,827), కోల్కతా (21,146), హైదరాబాద్ (10,553) ఉన్నాయి. ఈ లెక్కలు చూస్తే, ప్రతి పెద్ద నగరంలో వీధి కుక్కల సంఖ్య, జనాల భద్రతను ప్రభావితం చేసే స్థాయిలో ఉందని అర్థమవుతుంది.
తెలుగు రాష్ట్రాల్లో పరిస్థితి
మన తెలుగు రాష్ట్రాలు కూడా ఈ సమస్య నుంచి మినహాయింపు కాదు. ముఖ్యంగా హైదరాబాద్లోనే 10 వేల కుక్కలు ఉండగా, ఇతర పట్టణాలు, గ్రామాల్లో కూడా గణనీయమైన సంఖ్యలో వీధి కుక్కలు ఉన్నాయి. గ్రామీణ ప్రాంతాల్లో ఈ సంఖ్య రికార్డులు దాటుతుందని స్థానిక మున్సిపల్ అధికారులు చెబుతున్నారు. పర్యావరణం, మాంసాహార వ్యర్థాలు, వీధుల్లో లభించే ఆహారం ఈ అన్ని కారణాల వల్ల కుక్కల పెరుగుదల ఆగడం లేదు.
Also Read: AP Heavy rain alert: అల్పపీడనం ఆగ్రహం.. మూడు రోజులు భీకర గాలులు, జోరు వర్షాలు.. ఎక్కడంటే?
పెరుగుతున్న కాట్ల కేసులు
2022 నుండి 2024 మధ్య, దేశవ్యాప్తంగా దాదాపు 89,58,143 కుక్కల కాట్ల కేసులు నమోదయ్యాయి. అంటే రోజుకి వేల సంఖ్యలో ప్రజలు కుక్కల దాడికి గురవుతున్నారు. ఈ పరిస్థితిని సుప్రీం కోర్టు అత్యంత ఆందోళనకరమైనదని అభివర్ణించింది.
సుప్రీం కోర్టు ఆదేశాలు..
కోర్టు ఆదేశాల ప్రకారం ఢిల్లీలోని అన్ని వీధి కుక్కలను పట్టి, ప్రత్యేక షెల్టర్లలో ఉంచాలని నిర్ణయం తీసుకున్నారు. కానీ 55 వేల కుక్కల్లో కేవలం 5 వేలకే స్థలం ఉన్న షెల్టర్లు ఎంతవరకు ఉపయోగపడతాయి? ఈ ప్రశ్నకు ఇప్పటివరకు సమాధానం లేదు. అంతేకాదు, జంతు హక్కుల సంస్థలు దీన్ని మానవత్వానికి విరుద్ధంగా చెబుతున్నాయి.
పరిష్కారం ఏంటి?
నిపుణుల మాటల్లో, కుక్కల సంఖ్యను నియంత్రించాలంటే వ్యాక్సినేషన్, స్టెరిలైజేషన్ ప్రోగ్రాములు, ఆహార వ్యర్థాల నియంత్రణ ఈ మూడింటినీ ఒకేసారి అమలు చేయాలి. అలాగే ప్రజలలో అవగాహన కల్పించడం, చిన్నపిల్లలకు జాగ్రత్తలు చెప్పడం చాలా ముఖ్యం. వీధి కుక్కలు ఒకవైపు మన వాతావరణంలో సహజ భాగం, కానీ వాటి సంఖ్య నియంత్రణలో లేకపోతే, ప్రజల భద్రతకు ముప్పు. అందుకే రాష్ట్రాలు, నగరాలు కలసి ఈ సమస్యను శాస్త్రీయ పద్ధతిలో పరిష్కరించాల్సిన సమయం వచ్చింది. లేదంటే, ఇవి కేవలం వార్తల్లో కాకుండా మన ఇళ్ల గుమ్మాల దగ్గరే పెద్ద సమస్యగా నిలుస్తాయి.
Share
Tim David - Brevis: ఇద్దరు విషయంలో అంబానీ తప్పుడు నిర్ణయం.. అతలాకుతలంలో ముంబై ఇండియన్స్
Jio special offer: స్వాతంత్ర్య దినోత్సవ jio ఆఫర్ ఇదే.. ఈ ఛాన్స్ ఒక్కరోజు మాత్రమే.. డోంట్ మిస్!
