రాజస్థాన్‌లో ఘోర ప్రమాదం.. విద్యుత్ తీగలు తగిలి 8 మంది కార్మికులు బలి

Rajasthan Accident: రాజస్థాన్‌లోని ఝున్‌ఝును జిల్లా ఛపోలి గ్రామం వద్ద విషాదకర ఘోర రోడ్డు ప్రమాదం చోటుచేసుకుంది. రోడ్డు నిర్మాణ పనుల్లో భాగంగా కూలీలు కంకర మిక్సింగ్ మిషన్‌తో పనులు చేస్తుండగా.. ఒక్కసారిగా విద్యుదాఘాతం సంభవించింది. ఈ దుర్ఘటనలో ఎనిమిది మంది ప్రాణాలు కోల్పోగా, తీవ్రంగా గాయపడిన మరో ముగ్గురు ఆసుపత్రిలో చికిత్స పొందుతున్నారు.

ప్రమాదం జరిగిందిలా..

సోమవారం ఉదయం ఛపోలి గ్రామంలో రోడ్డు నిర్మాణం కోసం తీసుకొచ్చిన భారీ కంకర మిక్సింగ్ యంత్రం సహాయంతో కార్మికులు తమ పనుల్లో నిమగ్నమై ఉన్నారు. అయితే, ఊహించని విధంగా పైభాగంలో వెళ్తున్న హై-టెన్షన్ విద్యుత్ వైర్లకు ఆ యంత్రం తగలడంతో క్షణాల్లో తీవ్రస్థాయిలో విద్యుత్ ప్రసరించింది.

అక్కడికక్కడే ఐదుగురి మృతి

విద్యుత్ షాక్‌తో ప్రమాద స్థలంలోనే ఐదుగురు కూలీలు అక్కడికక్కడే ప్రాణాలు వదిలారు. తీవ్రగాయాలైన మిగతా ఆరుగురిని వెంటనే స్థానికులు, తోటి కార్మికులు సమీపంలోని ఆసుపత్రికి తరలించారు. అక్కడ చికిత్స పొందుతూ మరొక ముగ్గురు ప్రాణాలు కోల్పోవడంతో మొత్తం మృతుల సంఖ్య 8కి చేరింది.

దర్యాప్తుకు ఆదేశించిన అధికారులు

ప్రమాద వార్త తెలిసిన వెంటనే పోలీసులు, ఉన్నతాధికారులు సంఘటనా స్థలానికి చేరుకుని సహాయక చర్యలు చేపట్టారు. నిర్లక్ష్యం ఎవరిదనే కోణంలో దర్యాప్తు ప్రారంభించారు. నిబంధనల ఉల్లంఘన లేదా అధికారుల అలసత్వంపై పూర్తి వివరాలు సేకరిస్తున్నారు. ఉపాధి కోసం వచ్చిన కూలీలు ఇలా ప్రమాదానికి గురికావడంతో ఛపోలి గ్రామంలో తీవ్ర విషాద ఛాయలు అలముకున్నాయి.

Also Read: యూపీలో ఘోర రోడ్డు ప్రమాదం.. ట్రక్కును ఢీకొట్టిన వ్యాన్.. ఆరుగురు దుర్మరణం!