French Romantic Drama: కాలేజ్ లైఫ్, బ్రేకప్, కొత్త పరిచయాలు.. ఇలాంటి అంశాలతో వచ్చే యూత్‌ఫుల్ రొమాంటిక్ సిరీస్‌లకు ఓటీటీలో ప్రత్యేకమైన క్రేజ్ ఉంటుంది. ముఖ్యంగా ఇద్దరి మధ్య మొదట గొడవలతో మొదలైన పరిచయం, ఆ తర్వాత ప్రేమగా మారితే ఆ ప్రయాణంలో వచ్చే సరదా సన్నివేశాలు ప్రేక్షకులను ఆకట్టుకుంటాయి. ఇక ఇలాంటి కంటెంట్ తో ట్రయాంగిల్ లవ్ స్టోరీ ఉంటే యూత్ చూడకుండా అస్సలు ఉండలేరు. అలాంటి కథతో వచ్చిన ఫ్రెంచ్ యూత్ రొమాంటిక్ డ్రామా ‘క్యాంపస్ డ్రైవర్స్’ (Campus Drivers). C.S. Quill రాసిన పాపులర్ నవలల ఆధారంగా రూపొందిన ఈ సిరీస్‌లో కార్మెన్ కాసోవిట్జ్, బాప్టిస్ట్ మాసెలిన్ ప్రధాన పాత్రల్లో నటించారు. ఆరు ఎపిసోడ్‌లతో రూపొందిన ఈ సిరీస్ ఈ రోజు (నవంబర్ 6) నుంచి స్ట్రీమింగ్ అవుతోంది. మరి దీని కథ ఏమిటి ? ఎక్కడ చూడచ్చు ? అనే వివరాల్లోకి వెళ్తే..
లూయి తన జీవితంపై ఎన్నో ఆశలు పెట్టుకుని ఉంటుంది. తాను ప్రేమించిన మ్యాక్స్‌తో కలిసి ప్రతిష్ఠాత్మకమైన బెల్రోస్ యూనివర్సిటీలో అడుగుపెట్టడంతో తన భవిష్యత్తు ఎంతో అందంగా ఉండబోతోందని అనుకుంటుంది. చదువుతో పాటు ప్రేమను కూడా ఆస్వాదిస్తూ కాలేజ్ లైఫ్‌ను సంతోషంగా గడపాలనుకుంటుంది. కానీ ఆమె అనుకున్నట్లుగా పరిస్థితులు సాగవు. మ్యాక్స్‌తో బంధంలో ఎదురైన సమస్యలు చివరకు బ్రేకప్‌కు దారితీస్తాయి. అప్పటివరకు తనకు తోడుగా ఉంటాడనుకున్న వ్యక్తి దూరం కావడంతో లూయి ఒక్కసారిగా కుంగిపోతుంది.
అలాంటి సమయంలో ఆమె జీవితంలోకి లేన్ వస్తాడు. క్యాంపస్‌లో అందరికీ తెలిసిన ఈ కుర్రాడు మంచి అందగాడే కాదు, ‘క్యాంపస్ డ్రైవర్స్’ అనే పాపులర్ యాప్‌ను రూపొందించిన వ్యక్తి కూడా. తన చుట్టూ ఎంతోమంది ఉన్నప్పటికీ, ప్రేమ విషయంలో మాత్రం ఎవరికీ దగ్గర కాకుండా ఉండటానికే ఇష్టపడుతుంటాడు. అలాంటి లేన్ జీవితంలోకి అనుకోకుండా లూయి ప్రవేశిస్తుంది. పరిస్థితుల కారణంగా ఆమె అతని ఇంట్లో ఉండాల్సి వస్తుంది.
ఇద్దరి స్వభావాలు పూర్తిగా భిన్నంగా ఉంటాయి. లూయి భావోద్వేగాలకు ఎక్కువ ప్రాధాన్యత ఇస్తే, లేన్ మాత్రం తనకు నచ్చినట్లు జీవించాలనుకుంటాడు. దీంతో ఒకే ఇంట్లో ఉండటం మొదలైనప్పటి నుంచి చిన్న చిన్న విషయాలకే వాదనలు మొదలవుతాయి. ఒకరి అలవాట్లు మరొకరికి నచ్చవు. ఇద్దరి మధ్య జరిగే మాటల యుద్ధం, సరదా గొడవలు కథకు కామెడీ టచ్‌ను అందిస్తాయి. అయితే రోజులు గడుస్తున్న కొద్దీ ఒకరినొకరు అర్థం చేసుకోవడం మొదలవుతుంది. లూయిలోని మంచితనం లేన్‌ను ఆకర్షిస్తే, లేన్‌లోని మరో కోణాన్ని చూసిన తర్వాత అతనిపై లూయి అభిప్రాయం కూడా మారుతుంది.
కానీ గతంలో ఎదురైన బాధలు, మనసులో దాచుకున్న గాయాలు వీరి బంధాన్ని అంత సులభంగా ముందుకు సాగనివ్వవు. మరోవైపు లూయి మాజీ ప్రియుడు మ్యాక్స్‌తో ఉన్న అనుబంధం కూడా ఆమె జీవితంలో కీలకంగా మారుతుంది. పాత ప్రేమను పూర్తిగా మర్చిపోలేని పరిస్థితి ఒకవైపు, కొత్తగా దగ్గరవుతున్న లేన్‌పై కలుగుతున్న భావాలు మరోవైపు ఆమెను సందిగ్ధంలో పడేస్తాయి. లేన్ కూడా తన మనసులోని భావాలను అంగీకరించగలడా? వీరిద్దరి మధ్య ఏర్పడిన అనుబంధం ప్రేమగా మారుతుందా? గతం నుంచి బయటపడి కొత్త జీవితాన్ని ప్రారంభించగలరా? అనేదే ఈ సిరీస్‌లో ఆసక్తికరమైన అంశం.
‘క్యాంపస్ డ్రైవర్స్’లో లూయిస్ పాత్రలో కార్మెన్ కాసోవిట్జ్, లేన్ పాత్రలో బాప్టిస్ట్ మాసెలిన్, మ్యాక్స్‌గా ఎంజో లోరెంటే నటించారు. థామస్ బౌల్లే ఈ సిరీస్‌ను రూపొందించగా, టామ్ గోరిస్, వియానీ లెబాస్క్ దర్శకత్వం వహించారు. ఈ సిరీస్‌లో మొత్తం ఆరు ఎపిసోడ్‌లు ఉన్నాయి. 2026 నవంబర్ 6 నుంచి Amazon Prime Videoలో తెలుగు సహా పలు భాషల్లో ఈ రొమాంటిక్ డ్రామా అందుబాటులోకి రావడంతో యూత్ ప్రేక్షకులు తమకు నచ్చిన భాషలో చూసే అవకాశం ఉంది.
Share
ముగిసిన 'ది ట్రైటర్స్' తెలుగు సీజన్ 1.. విజేతలు ఎవరంటే?
సన్ షీల్డ్, పిన్‌లాక్ లెన్స్‌ తో కొత్త స్టీల్‌బర్డ్ హెల్మెట్.. ధర ఎంత అంటే?
