Kannada Action Drama on OTT: ఇటీవల కన్నడ సినీ పరిశ్రమ నుంచి వస్తున్న ప్రాంతీయ నేపథ్య కథలకు మంచి ఆదరణ లభిస్తోంది. ముఖ్యంగా అక్కడి సంప్రదాయాలు, ఆచార వ్యవహారాలను కథల్లో భాగం చేస్తూ తెరకెక్కిస్తున్న సినిమాలు ప్రేక్షకులను ఆకట్టుకుంటున్నాయి. అలాంటి కోవలో మంగళూరు తీర ప్రాంతపు సంస్కృతి, దసరా వేడుకల్లో కనిపించే ‘పులివేషం’ సంప్రదాయం నేపథ్యంలో రూపొందిన యాక్షన్ థ్రిల్లర్ ‘మార్ణమి’ (Maarnami). ‘సప్త సాగరాలు దాటి’ ఫేమ్ చైత్ర జె. ఆచార్, రిత్విక్ మఠద్ ప్రధాన పాత్రల్లో నటించిన ఈ సినిమా ఎలాంటి ముందస్తు హడావుడి లేకుండా ఓటీటీలోకి వచ్చేసింది. మరి ఈ సినిమాను ఏ ఓటీటీలో చూడవచ్చు? ఇందులో పులివేషం వెనుక దాగిన కథేంటి? తెలుసుకుందాం పదండి.
కర్ణాటకలోని మంగళూరు తీర ప్రాంతానికి చెందిన ఓ గ్రామంలో ఈ కథ సాగుతుంది. చిన్నతనంలో చేతు (రిత్విక్ మఠద్) అనారోగ్యానికి గురవుతాడు. దీంతో తన కొడుకు కోలుకుంటే మార్ణమి పండుగ సందర్భంగా పులివేషం వేయిస్తానని తల్లి జలజ (సోనూ గౌడ) మొక్కుకుంటుంది. అయితే తల్లి మరణం చేతు జీవితంలో తీవ్ర విషాదాన్ని నింపుతుంది. మేనమామ వసంతన్న (ప్రకాష్ తుమినాడ్) అండతో పెరిగి పెద్దవాడైన అతడు, ఇక జీవితంలో ఎప్పటికీ పులివేషం వేయకూడదని నిర్ణయించుకుంటాడు. అయినప్పటికీ వసంతన్నతో కలిసి పులివేషం బృందాన్ని నడిపిస్తూ జీవితం సాగిస్తుంటాడు.
ఈ క్రమంలో చేతు జీవితంలోకి దీక్ష (చైత్ర జె. ఆచార్) ప్రవేశిస్తుంది. ఇద్దరి పరిచయం ప్రేమగా మారి పెళ్లి వరకు వెళ్తుంది. మరోవైపు ఊరిలో ఇంకో పులివేషం బృందాన్ని నడిపించే జ్యోతిష్ (జ్యోతిష్ శెట్టి)తో చేతుకు విభేదాలు మొదలవుతాయి. ఇరు బృందాల మధ్య పాత కక్షలు, స్థానిక ఆధిపత్య పోరు క్రమంగా పెరిగి పెద్ద గొడవలకు దారితీస్తాయి. ఈ పరిణామాల వల్ల చేతు తన కుటుంబానికి సమయం కేటాయించలేకపోతాడు. దీంతో భార్య దీక్షతోనూ మనస్పర్థలు మొదలవుతాయి.
ఒకవైపు తన బృందాన్ని, తనను నమ్ముకున్నవాళ్లను శత్రువుల నుంచి కాపాడుకోవాలి. మరోవైపు తనకు దూరమవుతున్న భార్య ప్రేమను తిరిగి పొందాలి. ఈ రెండు సమస్యల మధ్య చిక్కుకున్న చేతు చివరకు ఏం చేశాడు? తన తల్లి మరణం తర్వాత దూరంగా పెట్టిన పులివేషాన్ని మళ్లీ ఎందుకు కట్టాల్సి వచ్చింది? తన శత్రువులపై ఎలా పోరాడాడు? అనేదే మిగతా కథ. మంగళూరు ప్రాంతపు సంప్రదాయాలను సహజంగా చూపిస్తూ, ఫ్యామిలీ ఎమోషన్స్, స్థానిక ఆధిపత్య పోరు, యాక్షన్ అంశాలతో ఈ చిత్రాన్ని రూపొందించారు.
‘మార్ణమి’ సినిమాలో రిత్విక్ మఠద్ చేతు పాత్రలో, చైత్ర జె. ఆచార్ దీక్షగా నటించారు. సోనూ గౌడ, ప్రకాష్ తుమినాడ్, జ్యోతిష్ శెట్టి, సుమన్ తల్వార్, స్వరాజ్ శెట్టి తదితరులు కీలక పాత్రల్లో కనిపించారు. రిషిత్ శెట్టి దర్శకత్వం వహించగా, చరణ్ రాజ్ సంగీతం అందించారు. ఈ సినిమా 2026 ఫిబ్రవరి 20న థియేటర్లలో విడుదలైంది. 2026 నవంబర్ 18 నుంచి Amazon Prime Videoలో స్ట్రీమింగ్ అవుతోంది. అయితే ప్రస్తుతానికి ఈ సినిమా తెలుగులో అందుబాటులో లేదు. ఒరిజినల్ కన్నడ ఆడియో, ఇంగ్లీష్ సబ్-టైటిల్స్తో మాత్రమే చూడటానికి వీలుంది.
Read Also: ఇంటి తలుపు తట్టిన పోలీసులు.. తలకిందులైన భార్య జీవితం.. దిమాక్ కరాబ్ చేసే క్రైమ్ థ్రిల్లర్