Fantasy Comedy on OTT: పుస్తకంలో రాసిన పాత్రలు నిజంగా మనుషులుగా మారితే ఎలా ఉంటుంది ? పైగా ఆ పాత్రలకు ఈ ప్రపంచంలో ఎలా బతకాలో కూడా తెలియకపోతే ? అలాంటి వింత కాన్సెప్ట్‌తో ఫాంటసీ, కామెడీ, అడ్వెంచర్‌ను కలిపి తెరకెక్కించిన సినిమా ‘రాహు కేతు’ (Rahu Ketu). వరుణ్ శర్మ, పుల్కిత్ సామ్రాట్ కలిసి నటించిన ఈ సినిమాలో ఇద్దరూ మ్యాజికల్ బుక్ నుంచి బయటకొచ్చిన పాత్రలుగా కనిపిస్తారు. అమాయకత్వం, అల్లరి, బ్యాడ్ లక్‌తో తిరిగే ఈ ఇద్దరి జీవితాల్లోకి ఓ తెలివైన అమ్మాయి ఎంట్రీ ఇవ్వడంతో అసలు గందరగోళం మొదలవుతుంది. ఒక మాయా పుస్తకం కోసం మొదలైన వేట… చివరికి డ్రగ్ మాఫియా వరకు ఎలా వెళ్లింది? ఈ ఇద్దరు ఆ ప్రమాదం నుంచి బయటపడ్డారా? తెలుసుకోవాలంటే కథలోకి వెళ్లాల్సిందే.
చూరు లాల్ శర్మ అనే రచయిత దగ్గర ఓ విచిత్రమైన మ్యాజికల్ నోట్‌బుక్ ఉంటుంది. అందులో అతను ఏం రాసినా అది నిజ జీవితంలోకి వచ్చేస్తుంది. సమాజంలో జరుగుతున్న అవినీతి, చెడును అంతం చేయాలనే ఉద్దేశంతో చూరు లాల్ తన పుస్తకంలో రాహు, కేతు అనే ఇద్దరు పాత్రలను సృష్టిస్తాడు. పుస్తకం మాయతో రాహు, కేతు నిజమైన మనుషులుగా మారి బయట ప్రపంచంలోకి అడుగు పెడతారు. కానీ వారికి ఈ కొత్త ప్రపంచం గురించి ఏమీ తెలియదు. అమాయకంగా ప్రవర్తిస్తూ, తమకు తెలియని విషయాల్లో తలదూరుస్తూ ఇద్దరూ చేసే పనులు నవ్వు తెప్పిస్తాయి.
ఇంతలో వారి దగ్గరున్న మ్యాజికల్ బుక్‌పై మీను టాక్సీ కన్ను పడుతుంది. ఆ పుస్తకానికి ఉన్న శక్తిని తెలుసుకున్న ఆమె దాన్ని దొంగిలిస్తుంది. అంతటితో ఆగకుండా, పుస్తకం ద్వారా రాహు, కేతులను తనకు అనుకూలంగా ఉపయోగించుకోవాలని ప్రయత్నిస్తుంది. తమను సృష్టించిన పుస్తకం తమ చేతుల్లో లేకపోవడంతో రాహు, కేతు దాన్ని తిరిగి సంపాదించడానికి మీను వెంటపడతారు. ఈ ప్రయాణంలో వాళ్లకు ఊహించని సమస్య ఎదురవుతుంది. వాళ్లు ఏకంగా ఓ డ్రగ్ మాఫియా నెట్‌వర్క్ మధ్యలో చిక్కుకుంటారు.
ఒకవైపు మాయా పుస్తకం కోసం మీను టాక్సీతో పోరాటం… మరోవైపు ప్రమాదకరమైన మాఫియా గ్యాంగ్. ఈ రెండింటి మధ్యలో రాహు, కేతు పడే తిప్పలు కథను మరింత కామెడీగా మార్చేస్తాయి. ముఖ్యంగా వరుణ్ శర్మ, పుల్కిత్ సామ్రాట్ మధ్య కెమిస్ట్రీ, కామెడీ టైమింగ్ సినిమాకు హైలెట్ గా నిలుస్తుంది. చివరికి రాహు, కేతు మ్యాజికల్ బుక్‌ను తిరిగి దక్కించుకున్నారా? మీను టాక్సీ ప్లాన్ ఏమైంది? డ్రగ్ మాఫియా నుంచి ఈ ఇద్దరు ఎలా బయటపడ్డారు? పుస్తకంలో రాసిన పాత్రలుగా మొదలైన వీళ్లు నిజంగా సమాజానికి ఎలా ఉపయోగపడ్డారు? అనేదే క్లైమాక్స్‌లో తెలుస్తుంది.
‘రాహు కేతు’ ప్రస్తుతం Amazon Prime Videoలో స్ట్రీమింగ్ అవుతోంది. తెలుగు డబ్బింగ్‌తో అందుబాటులో లేదు. ఈ సినిమా ప్రస్తుతం ఒరిజినల్ హిందీ ఆడియోలో మాత్రమే స్ట్రీమింగ్ అవుతోంది. ఫాంటసీ, కామెడీతో పాటు వరుణ్ శర్మ–పుల్కిత్ సామ్రాట్ కాంబినేషన్‌లో వచ్చే ఎంటర్‌టైనింగ్ సీన్స్ చూడాలనుకునేవారికి ‘రాహు కేతు’ ఓ సరదా టైమ్‌పాస్ మూవీ. ముఖ్యంగా మ్యాజికల్ బుక్ అనే కాన్సెప్ట్ ఉండడంతో సినిమా ఇంట్రెస్టింగా సాగుతూనే నవ్వులు పూయిస్తుంది.
Read Also: 17 ఏళ్లుగా కూతురి కోసం వేట… రియల్ స్టోరీతో వచ్చిన యాక్షన్ థ్రిల్లర్ తెలుగులోనే స్ట్రీమింగ్
Share
అంబేద్కర్ టవర్ నిర్మాణానికి ప్రభుత్వం గ్రీన్ సిగ్నల్!
అగ్నిపరీక్ష కాదు.. అభిజిత్, నవదీప్ ల స్వయంవరం.. మండిపడ్డ కామన్ మ్యాన్!
