తెలంగాణ స్టైల్ బగారా అన్నం.. ముద్దపప్పు లేదా నాటుకోడి కూరతో తింటే ఇక స్వర్గమే!

Bagara Annam: తెలంగాణ విందు భోజనాల్లో బగారా అన్నం లేకపోతే ఆ ముచ్చటే వేరుగా ఉంటుంది. పండుగైనా, ఫంక్షన్ అయినా అందరూ ఇష్టంగా అడిగి చేయించుకునే వంటకం ఇది. బిర్యానీ అంత హడావుడి లేకుండా.. కేవలం అర గంటలో ఘుమఘుమలాడే రుచితో దీన్ని తయారు చేసుకోవచ్చు. ముఖ్యంగా నాటు కోడి కూర లేదంటే గుత్తి వంకాయ కూరతో కలిపి తింటే టేస్ట్ భలే ఉంటుంది. మరి ఇంట్లోనే రెస్టారెంట్ రుచితో ఈ బగారా అన్నాన్ని ఎలా చేయాలో ఇప్పుడు చూద్దామా..

కావలసిన పదార్థాలు:

ఈ రుచికరమైన వంటకానికి రెండు కప్పుల బాస్మతీ బియ్యం లేదంటే సోనా మసూరి బియ్యం, తగినంత నూనె లేదా నెయ్యి, షాజీరా, దాల్చిన చెక్క, లవంగాలు, ఇలాచీలు, అనాస పువ్వు, బిర్యానీ ఆకు వంటి మసాలా దినుసులు అవసరం. అలాగే సన్నగా తరిగిన ఉల్లిపాయ ముక్కలు, పచ్చిమిర్చి చీలికలు, తాజాగా నూరిన అల్లం వెల్లుల్లి పేస్ట్, గుప్పెడు పుదీనా ఆకులు, కొత్తిమీర, తగినంత ఉప్పు సిద్ధం చేసుకోవాలి.

Also Read: రాయలసీమ స్పెషల్ నాటు కోడి పులుసు.. రాగి సంకటిలోకి అదిరిపోయే రుచి!

తయారీ విధానం:

బియ్యాన్ని శుభ్రంగా కడిగి ఒక అరగంట పాటు నానబెట్టుకోవాలి. ఇప్పుడు స్టవ్ మీద మందపాటి గిన్నె పెట్టి అందులో నూనె లేదా నెయ్యి వేసి వేడి చేయాలి. నూనె కాగాక షాజీరా, లవంగాలు వంటి మసాలా దినుసులన్నీ వేసి మంచి వాసన వచ్చే వరకు వేయించాలి. ఆ తర్వాత ఉల్లిపాయ ముక్కలు, పచ్చిమిర్చి వేసి అవి కాస్త రంగు మారే వరకు వేగనివ్వాలి. ఇప్పుడు అల్లం వెల్లుల్లి పేస్ట్ వేసి పచ్చి వాసన పోయే వరకు వేయించి, అందులోనే పుదీనా, కొత్తిమీర వేసి కలపాలి.

ఇవన్నీ బాగా వేగాక ఎసరు కోసం ఒక కప్పు బియ్యానికి రెండు కప్పుల చొప్పున నీళ్లు పోసి, తగినంత ఉప్పు వేయాలి. ఎసరు బాగా మరిగేటప్పుడు నానబెట్టిన బియ్యాన్ని వేసి మంటను మీడియంలో ఉంచాలి. ఎసరు సగానికి పైగా ఇగిరిపోయాక, మూత పెట్టి మంటను తగ్గించి మరో పది నిమిషాల పాటు దమ్ వేయాలి. అన్నం పొడిపొడిగా ఉడికాక స్టవ్ ఆపేసి ఓ పది నిమిషాలు అలాగే వదిలేస్తే.. వేడి వేడి బగారా అన్నం వడ్డించడానికి రెడీ అయినట్టే.

Also Read: పిల్లల జ్ఞాపకశక్తి పెరగాలా? షుగర్ లేకుండా ఇలా హెల్తీ బాదం స్వీట్ చేసి పెట్టండి!