Chicken Pizza: చికెన్ కర్రీ మిగిలిపోయిందా? ఇలా చికెన్ పిజ్జా సులువుగా చేసేయండి

ఇంట్లో చికెన్ కర్రీ వారానికి ఒక్కసారైనా కచ్చితంగా వండుతారు. అలాంటప్పుడు కూర మిగిలిపోతూ ఉంటుంది. అలా చికెన్ మిగిలిపోయినప్పుడు ఇండియన్ ఫ్లేవర్ తో ఇటాలియన్ స్టైల్ పిజ్జా చేసేయండి. ఇది పిల్లలకు పెద్దలకు ఎంతో నచ్చుతుంది. చాలా తక్కువ సమయంలోనే ఈ పిజ్జాను తయారు చేయవచ్చు.

చికెన్ పిజ్జా రెసిపీకి కావలసిన పదార్థాలు
చికెన్ కర్రీలోని పీసెస్ – ఒక కప్పు
పిజ్జా బేస్ – ఒకటి
పిజ్జా సాస్ – రెండు స్పూన్లు
మోజరెల్లా చీజ్ తురుము – ఒక కప్పు
ఉల్లిపాయ – ఒకటి
టమోటా – ఒకటి
ఒరిగానో – ఒక స్పూను
చిల్లీ ఫ్లేక్స్ – అర స్పూను
మిరియాల పొడి – చిటికెడు
ఉప్పు – రుచికి సరిపడా
కొత్తిమీర తరుగు – రెండు స్పూన్లు

Also read: Spinach Fry: పాలకూర నువ్వుల వేపుడు రెసిపీ, తింటే ఎంతో ఆరోగ్యం పైగా రుచికి రుచి

చికెన్ పిజ్జా రెసిపీ
1. మిగిలిన చికెన్ కర్రీ లోంచి ముక్కలను వేరు చేయండి. ఆ ముక్కలను చిన్నగా తురుముకోండి.
2. ఇప్పుడు ఒక పిజ్జా బేస్ తీసుకొని ఆ పిజ్జా బేస్ పై పిజ్జా సాస్ ను సమానంగా రాయండి.
3. సాస్ మీద కొద్దిగా మిరియాల పొడి చల్లండి. అలాగే చిటికెడు ఉప్పును కూడా చల్లండి.
4. ఇప్పుడు పిజ్జా బేస్ పై సన్నగా తరిగిన ఉల్లిపాయలు, టమోటా ముక్కలు చల్లండి.
5. ఇప్పుడు కోసి పెట్టుకున్న చికెన్ ముక్కలను కూడా సమానంగా సర్దండి. కావాలంటే గ్రేవీ ని కూడా అక్కడక్కడ చల్లవచ్చు.
6. ఇప్పుడు తురిమిన మోజరెల్లా చీజ్ ను పైన పూర్తిగా చల్లండి.
7. చికెన్ మొత్తం కనిపించకుండా ఉండేలా చీజ్ జల్లేయాలి.
8. ఇప్పుడు ఆ చీజ్ మీద ఒరిగానో, చిల్లీ ఫ్లాక్స్ చల్లండి. ఇప్పుడు పిజ్జాను ఓవెన్లో పెట్టి బేక్ చేయండి.
9. ఓవెన్ ను 180 డిగ్రీల వద్ద ఉంచి పావుగంట సేపు బేక్ చేస్తే సరిపోతుంది. చీజ్ పూర్తిగా కరిగి బేస్ క్రిస్పీగా మారుతుంది.
10. ఓవెన్ లేకపోతే మీరు నాన్ స్టిక్ పాన్ పై కూడా దీన్ని తయారు చేయవచ్చు.
11. నాన్ స్టిక్ పాన్ కాస్త వేడెక్కాక పిజ్జా అని పెట్టి పైన మూత పెట్టేయాలి.
12. ఒక పావుగంట పాటు అలా వదిలేస్తే పిజ్జా రెడీ అయిపోతుంది