Kova Bun: కోవా బన్ ఎక్కడ బాగా ఫేమస్? దాన్ని ఎలా తయారు చేసుకోవాలి?

Kova Bun: తెలంగాణలో ‘కోవా బన్’ అనగానే మనకు వెంటనే గుర్తొచ్చేది కరీంనగర్. అసలు కరీంనగర్ వెళ్లి కోవా బన్ తినకుండా వస్తే ఆ ట్రిప్ పూర్తి కానట్టే లెక్క. అక్కడి బేకరీల ముందు సాయంత్రం పూట ఉండే రద్దీ చూస్తేనే అర్థమవుతుంది ఈ స్వీట్ బన్‌కు ఉన్న క్రేజ్ ఏంటో. మరి అంత ఫేమస్ అయిన ఈ కోవా బన్‌ను ఇంట్లోనే బేకరీ స్టైల్‌లో ఎలా తయారు చేసుకోవాలో ఇప్పుడు చూద్దామా.

అసలైన కోవా తయారీ ఇలా..

కోవా బన్ రుచి అంతా అందులో పెట్టే కోవాలోనే ఉంటుంది. దీని కోసం ఒక లీటర్ పాలను వెడల్పాటి గిన్నెలో పోసి మరిగించాలి. మంట తగ్గించి, పాలు అడుగంటకుండా మధ్యమధ్యలో కలుపుతూ ఉండాలి. ఇలా ఓ 40 నిమిషాల పాటు ఓపిగ్గా చేస్తే, పాలలోని నీరంతా ఆవిరైపోయి చిక్కటి ముద్దలా తయారవుతుంది. ఇదే మనకు కావాల్సిన స్వచ్ఛమైన కోవా. లీటర్ పాలకు సుమారుగా ఓ పావు కిలో కోవా వస్తుంది.

Also Read: ముక్కంటికి నైవేద్యంగా పైనాపిల్ కేసరి.. 10 నిమిషాల్లో అద్భుతమైన రుచి!

బేకరీ స్టైల్ కోవా రహస్యం..

మనం తయారు చేసుకున్న కోవాను నేరుగా బన్‌లో పెట్టేయకూడదు. దానికి బేకరీ స్టైల్ టచ్ ఇవ్వాలి. ఒక పాన్‌లో కొంచెం నెయ్యి వేసి, ఈ కోవాను వేయించాలి. అది లైట్ గోల్డెన్ కలర్లోకి వచ్చాక.. అందులో తగినంత చక్కెర పొడి, కొంచెం ఏలకుల పొడి కలపాలి. ఇక్కడే అసలు సీక్రెట్ దాగుంది. అదేంటంటే.. రెండు స్పూన్ల మిల్క్ పౌడర్ కలపడం. దీనివల్ల కోవాకు మంచి టెక్స్చర్ వస్తుంది. ఈ మిశ్రమం మరీ డ్రైగా అయిపోకముందే స్టవ్ ఆఫ్ చేసి చల్లార్చుకోవాలి.

ఇంట్లోనే కరీంనగర్ కోవా బన్ రుచి:

బేకరీల్లో ఈ స్వీట్ బన్లను విడిగా కూడా అమ్ముతుంటారు. ఈ బన్‌ను మధ్యలోకి కట్ చేసి, మనం రెడీ చేసుకున్న కోవా మిశ్రమాన్ని అందులో నింపాలి. అయితే పాలను సరిగ్గా మరిగించి, చక్కెర పాళ్లను జాగ్రత్తగా కలిపితే కరీంనగర్ వెళ్లకుండానే ఆ ఫేమస్ కోవా బన్ రుచిని మన ఇంట్లోనే ఆస్వాదించవచ్చు. పిల్లలకైతే ఇది బెస్ట్ ఈవెనింగ్ స్నాక్ అవుతుంది. దశాబ్దాలు గడుస్తున్నా ఈ సంప్రదాయ బేకరీ స్వీట్ క్రేజ్ ఏమాత్రం తగ్గకపోవడానికి కారణం ఆ నోరూరించే తీపి కోవాయే మరి.

Also Read: అర్ధనారీశ్వరుడికి ఎంతో ప్రీతికరమైన ‘ఆమ్రఖండ్‌’ను ఇలా తయారు చేసుకోండి!